Habakuku 1:1-17
1 Ngaaya makani musinsimi Habakuku* ngaakapegwa mucilengaano:
2 O Jehova, ino ndilalilila lugwasyo kwaciindi cilamfwu buti yebo kotandimvwi?+
Ino ndilalomba kwaciindi cilamfwu buti kuti undivwune kuzigwebenga pele yebo kotabwezi ntaamu?+
3 Ino nkaambo nzi ncondipa kubona zintu zibi?
Alimwi nkaambo nzi ncolekelela mapenzi kuti kaacitika?
Nkaambo nzi ncokuli lunyonyooko abugwebenga kumbele lyangu?
Alimwi nkaambo nzi mazwanga akulwana ncozivwulide?
4 Aboobo mulawo wabula nguzu,Abwalo bululami tabucitiki pe.
Nkaambo babi bazinguluka balulami;Nkakaambo kaako bululami bwanyonganizyigwa.+
5 “Amulange akati kamasi, mubikkile maano!
Amulangisisye kamugambidwe, mulamwe;Nkaambo kuli cintu ciyoocitika mumazuba aanuEeco ncomutakasyomi nokuba kuti mwaambilwa ncico.+
6 Nkaambo amubone ndibusya bana Kasidi,+Icisi cikali alimwi citeengeleli.
Balakukulula muzilawo zipati zyamunyikaKuti babweze maanda aatali aabo.+
7 Balayoosya alimwi bantu balabayoowa kapati.
Balalibikkila bululami bwabo beni alimwi abweendelezi.*+
8 Mabbiza aabo alalunduka kapati kwiinda basiluwe,Alimwi mbakali kwiinda baumpe bamasiku.+
Mabbiza aabo aankondo alauluka naabalika;Mabbiza aabo azwida kule.
Alaliwaala mbuli sikwaze uufwuumukila cakulya.+
9 Boonse balaboola kabakanzide kusaala.+
Masyu aabo boonse alangide kumbele mbuli muwo wakujwe,+Alimwi bapinka baange banji mbubonya mbuli musenga.
10 Baweela bamiAkuseka nkumekume.+
Masena oonse aakwabilidwe balaaseka;+Alimwi balundika bulongo akwaazunda.
11 Mpoonya baleenda mbuli muwo akwiinda,Pele bayoopegwa mulandu,+Akaambo kakuti batembaula leza wabo kuti nguubapa nguzu.”*+
12 O Jehova, sena yebo tonooliko kuzwa lili alili?+
O Leza wangu, Uusalala wangu, yebo tofwi pe.*+
O Jehova, nkaambo yebo wakabasala kuti babeteke;Yebo O Ndomba yangu,+ wakababikkila kuti bape cisubulo.+
13 Yebo ulasalala kapati cakuti meso aako taakonzyi kulangilila cintu cibi,Alimwi tokonzyi kubulangilila buyo bubi.+
Aboobo, ino nkaambo nzi ncobalanga buyo bantu bampelenge+Ancoumuna buyo ciindi muntu mubi namena muntu uululeme kwiinda nguwe?+
14 Nkaambo nzi bantu ncobapa kuba mbuli nswi zyamulwizi,Mbuli zilenge zyamumaanzi zitakwe muleli?
15 Zyoonse eezyi sinkondo* ulaziloba akalobyo.
Ulazijata akkombe lyakwe,Alimwi ulazibunganya mulunsabwe lwakwe.
Ncencico cimupa kukkomana kapati.+
16 Nkakaambo kaako ncatuulila kkombe lyakwe zipaizyoAkuumpila lunsabwe lwakwe zipaizyo;*Nkaambo eezyi zimupa kuba acaabilo camafwuta,Alimwi zyakulya zyakwe nzibotu.
17 Aboobo sena walo ulazumanana kudikimuna kkombe lyakwe?*
Sena ulazumanana kujaya bantu mumasi cakuteengelela?+
Bupanduluzi buyungizyidwe
^ Ambweni nkokwaamba kuti “Kutambula Cabusungu.”
^ Naa “abulemu.”
^ Naa ambweni, “Akaambo kakuti nguzu zyabo nguleza wabo.”
^ Naa ambweni, “swebo tatukafwi pe.”
^ Nkokuti, sinkondo muna Kasidi.
^ Naa “Akuuntumwida lunsabwe lwakwe busi.”
^ Naa ambweni, “ulazumanana kugwisya panga lyakwe?”
