“Webo ooswiilila zikombyo, bantu boonse bayoosika kulinduwe.”—Intembauzyo 65:2.

NZYOBAAMBA BANTU

Bamwi bantu baamba kuti mipailo “kunyina nkoiya pe.” Bantu ibajisi mapenzi kanji-kanji balakonzya kudooneka naa mipailo yabo ilaingulwa.

NCOLYAAMBA BBAIBBELE

Ibbaibbele lyaamba kuti: “Nkaambo meso aa Jehova [Leza] ali kubalulami, amatwi aakwe aswiilila mipailo yabo yakukombelezya; pele busyu bwa Jehova bulabasyuuluka aabo bacita zibi.” (1 Petulo 3:12) Kwaamba masimpe, Leza ulaswiilila mipailo. Nokuba boobo, uyandisya kapati kuswiilila mipailo yabaabo batobela milawo yakwe. Kujatikizya luyandisisyo ndwajisi Leza lwakuswiilila mipailo ciindi notupaila, alumbi lugwalo lwaamba kuti: “Oolu ndolusinizyo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.” (1 Johane 5:14) Aboobo, aabo bapaila kuzwa ansi aamoyo beelede kwiizyiba misyobo yamipailo iikonzya kweendelana akuyanda kwa Leza.

“Ciindi nomupaila, mutani kwaambi majwi ngeena cakwiinduluka.”—Matayo 6:7.

NZYOBAAMBA BANTU

Bantu ibanjila zikombelo zisiyene-siyene mbuli ci Buddha, ci Katolika, ci Hindu, alimwi aci Islamu, balayiisyigwa kubelesya bulungu kupeta alimwi akubala mipailo.

NCOLYAAMBA BBAIBBELE

Mipailo yeelede kuzwa ansi aamoyo alimwi yeelede kwaambwa cakusinizya, tayeelede kuyiigwa cakupeta buya kakunyina kuzyiba ncoyaamba, alimwi akwaambwa cakwiinzya buyo mulawo. Magwalo atukulwaizya kuti: “Ciindi nomupaila, mutani kwaambi majwi ngeena cakwiinduluka mbuli bantu bamasi mbobacita, nkaambo bayeeya kuti bayoomvwugwa ikuti babelesya majwi manji. Aboobo mutabi mbuli mbabo, nkaambo Leza Uso ulizyi zyintu nzyomuyandika kamutana kumulomba.”—Matayo 6:7, 8.

NKAAMBO NZI MAKANI AAYA NCAAYELEDE KUMUJATIKIZYA?

Ciindi mipailo noyaambwa munzila njatakkomanini Leza, sikupa mupailo ooyo ambweni inga ulisowela buyo ciindi naa kunyemya buyo Leza. Bbaibbele licenjezya kuti mipailo iipegwa abaabo bakaka kutobela milawo ya Leza ‘ncisesemyo’ kulinguwe.—Tusimpi 28:9.

“Amuyandaule Jehova [Leza] naacijanika. Amumukwiilile naacili afwiifwi.”—Isaya 55:6.

NZYOBAAMBA BANTU

Bantu bamwi balapaila kuli Mariya, kubangelo naa “kubasaante.” Akati kabantu aaba kuli “Musaante” uutegwa Anthony waku Padua, walo iwaambwa kuti nguulanganya “zintu zyakumuuya alimwi azintu nzyobayandika bantu,” mpoonya kuli “Musaante” uutegwa Jude, walo uubonwa kuti ngosikupa lugwasyo “mubukkale bukatazya.” Bantu banji ibakomba balapaila “kubasaante” alimwi akubangelo kabayeeya kuti inga babaiminina kuli Leza.

NCOLYAAMBA BBAIBBELE

Bakombi bakasimpe beelede kupaila kuli ‘Taateesu uuli kujulu.’ (Matayo 6:9) Ibbaibbele litukulwaizya kuti: “Mutalibiliki acintu niciba comwe, pele muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila.”—Bafilipi 4:6.