MULWEENDO lwakatobela, mukaintu ooyu wakabakalalila alimwi ba Toni. Ino balo bakacita buti? Bakaamba kuti: “Zintu zyakabija kapati, kwakanyina kaambo kaya koomoonga kakapa kuti mukaintu ooyu akalale. Nokuba boobo, ba Toni bakalilekelela alimwi akwaambila mukaintu ooyu kuti bakali kwaamvwisya mapenzi aakwe.

Ikuti nomwakali ndinywe ba Toni, ino nomwakacita buti? Sena nomwakatondezya kubomba moyo? Sena nocakamuyumina kulijata? Cakutadooneka inga tiicaba cuuba-uba kulijata mubukkale buli boobu. Ikuti naa tulikopene mumizeezo naa ikuti umwi watunyemya, inga nciyumu kapati kubomba moyo.

Nokuba boobo, Bbaibbele likulwaizya Banakristo kubomba moyo. Alimwi Jwi lya Leza lyaamba bube oobu kuti mbusongo. Jakobo wakabuzya kuti: “Ino nguni musongo alimwi uumvwisya zintu akati kanu? Kwiinda mukulilemeka kabotu, aatondezye milimo iicitwa cakulibombya akaambo kabusongo.” (Jak. 3:13) Muunzila nzi kubomba moyo mbokutondezya kuti  mbusongo buzwa kujulu? Alimwi ncinzi cikonzya kutugwasya kuba abube oobu bwabunaleza?

Kubomba moyo kulakonzya kumana mazwanga. “Kuvwiila kabotu kulalesya bukali, pele majwi mabi alanyemya.”—Tus. 15:1.

Kuvwiila cabukali inga kwapa kuti zintu ziindile kubija nkaambo cili buyo mbuli kuti muyungizya nkuni kumulilo. (Tus. 26:21) Mukwiimpana, kuvwiila cabubombe kanji-kanji inga kumanizya mazwanga. Alimwi buya kulakonzya kupa muntu uunyemede kuti atontomane.

Eeci cakabacitikila ba Toni. Mukaintu ooyu naakabona mbobakaingula ba Toni cakubomba moyo, yakamweenda misozi. Wakapandulula kuti wakajisi mapenzi manji walo alimwi amumukwasyi. Ba Toni bakapa bumboni bubotu, alimwi ciiyo ca Bbaibbele cakatalisyigwa—zyoonse eezyi zyakacitika akaambo kakuti bakali babombe moyo.

Kubomba moyo kulakonzya kutupa kukkomana. “Balikkomene babombe myoyo, nkaambo bayookona nyika.”—Mt. 5:5.

Nkaambo nzi kapa kuti bantu babombe myoyo kabakkomana? Kwiinda mukulisamika bube oobu bwakubomba moyo, bantu banji ibakali bakali lino balikkomene. Lino bapona buumi bubotu alimwi balizyi kuti buumi bubotu bwakumbele bulabalindila. (Kol. 3:12) Ba Adolfo, imulangizi wabbazu ku Spain, balayeeya mbobwakabede buumi bwabo kabatanaiya kasimpe.

Bakaamba kuti: “Buumi bwangu tiibwakajisi mpindu, ndakali kufwambaana kunyema cakunga beenzuma bamwi bakali kubuyoowa bube bwangu bubyaabi bwakulwana-lwana alimwi akulisumpula. Kumamanino ndakacinca. Cimwi ciindi notwakali kulwana bakandiyasa naifi ziindi zili cisambomwe aboobo ndakazwa bulowa bunji cakuti ndakali kuyanda kufwa.”

Nokuba boobo, kwiinda muzintu nzyobaamba alimwi akucita ba Adolfo lino bayiisya bantu kuba amoyo mubombe. Bantu banji balabayanda akaambo kakuba abube bubotu busangalizya. Ba Adolfo bakaamba kuti balikkomene akaambo kakucinca nkobakacita. Alimwi balumba Jehova kuti wakabagwasya kutegwa babe amoyo mubombe.

Kubomba moyo kulamukkomanisya Jehova. “Kosongwaala mwanaangu, ukkomanisye moyo wangu, kutegwa ndikonzye kumuvwiila ooyo uundisampaula.”—Tus. 27:11.

Munzila imwi, Jehova uli mukusampaulwa asinkondonyina, Diabolosi. Leza ulijisi twaambo tubotu itweelede kumupa kukalala akaambo kakusampaulwa ooko, pele Bbaibbele lyaamba Jehova kuti ‘tafwambaani kukalala.’ (Kul. 34:6) Ciindi notusolekesya kwiiya bube bwa Leza bwakutafwambaana kukalala alimwi akubomba moyo, tutobela nzila yabusongo iimukkomanisya kapati Jehova.—Ef. 5:1.

Nyika mazuba aano yabija. Tuyaanya bantu “basikulidunda, basikulisumpula, basikusampaula, . . . basikubejelezya, batalilesyi, bakali.” (2Tim. 3:2, 3) Nokuba boobo, eeci taceelede kulesya muna Kristo kuba amuuya wakubomba moyo. Jwi lya Leza lituyeezya kuti “busongo buzwa kujulu . . . buleta luumuno, bulanyoneka.” (Jak. 3:17) Kwiinda mukutondezya muuya waluumuno alimwi awakunyoneka, tupa bumboni bwakuti twaba abusongo buzwa kuli Leza. Busongo buli boobo buyootupa kuvwiila camoyo mubombe ciindi nobatunyemya alimwi buyakutupa kuswena kuli Jehova, Kasensa kabusongo butamani.