Bamalumi alimwi abamakaintu ibacibikkila maano cikwati cabo, bacibona kuti cinooliko lyoonse alimwi eeci cibapa kulimvwa kukwabililwa. Umwi aumwi wabanabukwetene ulijisi lusyomo lwakuti mweenzinyina uyoozumanana kuba mucikwati nomuba muziindi zikatazya.

Banabukwetene bamwi balimvwa kuti beelede kuzumanana kukkala antoomwe akaambo kakuyanda kukkomanisya balongwe, babelesinyina naa banamukwasyi. Nokuba boobo, iciyandika kapati ncakuti beelede kucita oobo akaambo kaluyando alimwi abulemu mbobajisi kuli umwi amweenzinyina.

NJIISYO YAMU BBAIBBELE: “Mulumi teelede kusiya mukaintu wakwe pe.”—1 Bakorinto 7:11.

“Ikuti kamucibikkila maano cikwati canu, tamunoofwambaani kunyema. Muciindi caboobo, munoofwambaana kulekelela alimwi akulilekelela. Mapenzi munakwaabona mbuli kuti ncilebyo buyo, kutali mbuli cintu citakonzyi kubambwa icisololela kukulekana.”—Ba Micah.

Ciindi nobasikilwa mapenzi, banabukwetene ibatacibikkili maano cikwati cabo balakonzya kwaamba kuti, ‘Tatweelelani pe’ mpoonya balakonzya kutalika kuyandaula nzila zyakulekana.

“Bantu banji balanjila mucikwati kabajisi makanze aakuti, ikuti zintu zyakatazya mucikwati, balakonzya kulekana. Ciindi bantu nobanjila mucikwati kumwi kabajisi kale muzeezo wakulekana ikuti zintu zyakatazya, nkokuti inga tabacibikkilide maano cikwati cabo kuzwa kumatalikilo.”—Ba Jean.

AMULISUNKE

Ciindi nomuzwangana . . .

• Sena inga mulaakuusa akaambo kakukwatana amuntu ooyo ngomukwetene limwi?

• Sena kuli nomulombozya kuba amuntu uumbi kunze aayooyo ngomukwetene limwi?

• Sena kuli nomwaamba kuti, “Ndilakusiya” naa “Ndiyakujana muntu uumbi uunakundiyanda”?

Ikuti naa mwaingula kuti inzya kumubuzyo umwi akati kayeeyi, nkokuti lino nceciindi ncomweelede kucibikkila maano kapati cikwati canu.

AMUBANDIKE ANGOMUKWETENE LIMWI KUJATIKIZYA MIBUZYO IITOBELA

• Sena kubikkilana maano mucikwati cesu kwayaansi? Ikuti naa mboobo, nkaambo nzi?

• Ino nintaamu nzi nzyotweelede kubweza kutegwa katubikkilana maano kapati mucikwati cesu?

NZILA ZIGWASYA

• Muzimwi ziindi, amumulembele kagwalo kaluyando ooyo ngomukwetene limwi

• Amutondezye kuti mulacibikkila maano cikwati canu kwiinda mukubikka zifwoto zyamuntu ngomukwetene limwi adesiki naa atebulu lyakumulimo wanu

• Amumutumine fooni ngomukwetene limwi buzuba abuzuba ciindi nomuli kumulimo naa ciindi nomutali limwi

NJIISYO YAMU BBAIBBELE: “Aabo Leza mbaaswaanganya kutabi muntu uubaandaanya.”—Matayo 19:6.