Sena Tweelede Kupaila Kubasaante?

BANTU banji balalibilika alimwi balimvwa kuti bayandika lugwasyo lwamuntu uumbi mubuumi. Ciyabuyo mbuli mbocibede cintu citupa kulibilika, ambweni inga twasala mweenzuma uuli aluse alimwi uubuzyi kabotu buyumuyumu mbotujisi. Muntu siluse alimwi uujisi luzyibo nguukonzya kuba mulongwe mubotu kwiinda.

Bamwi balakonzya kulimvwa mbubwenya oobo caboola kumupailo. Muciindi cakuunka kuli Leza—walo uulibonya mbuli kuti uli kule alimwi ulayoosya—balaliiba kuunka kubasaante. Bayeeya kuti basaante balaaluse kwiinda, nkaambo abalo bakainda mumasunko ngaonya alimwi abuyumuyumu bucitikila bantu. Mucikozyanyo, bantu bakasweekelwa cintu ciyandika kapati balakonzya kupaila ku “Musaante” Anthony waku Padua—walo uulanganya zyintu zyakasweeka naa izyakabbigwa. Naa bapailila munyama waciswa, balakonzya kupaila ku “Musaante” Francis waku Assisi, alimwi kuti kabatyompedwe balakonzya kupaila ku “Musaante” Jude Thaddeus.

Aboobo, mbuti mbotukonzya kusinizya naa kupaila kubasaante njenzila mbotu yakupaila kweelana a Magwalo? Mbwaanga tupaila kuli Leza, masimpe inga twayanda kuzyiba kuti: Sena mipailo yesu ulaiswiilila? Alimwi tweelede kubuzya kuti: Ino Leza ulimvwa buti kujatikizya kupaila kubasaante?

BBAIBBELE NCOLYAAMBA KUJATIKIZYA KUPAILA KUBASAANTE

Cilengwa cakupaila kubasaante ciyeeme anjiisyo yakuti basaante mbaasimwiima akati, iyiisyigwa aba Cikombelo ca Katolika. Kweelana abbuku lya New Catholic Encyclopedia, iciyandika “nkukombelezya kuti Leza abafwide luse kwiinda mubasaante.” Aboobo, muntu uupaila kubasaante ujisi bulangizi bwakuti ulabikkilwa maano kwiinda mubasaante akaambo kacuuno cisumpukide ncobapedwe kuli Leza.

Sena Bbaibbele lilayiisya njiisyo eeyi? Bamwi baamba kuti mwaapostolo Paulo nguwakapa kuti bantu batalike kupaila kubasaante akaambo kazyintu nzyaakalemba. Mucikozyanyo, ku Banakristo baku Roma, wakalemba kuti: “Lino ndamukulwaizya bakwesu, kwiinda mu Mwami wesu Jesu Kilisito akwiinda muluyando lwamuuya, kuti mulitakate antoomwe andime mumipailo kuli Leza kujatikizya ndime.” (Baloma 15:30) Sena Paulo wakali kulomba Banakristonyina kuti bamukombelezezye kuli Leza? Peepe. Balo mbabakali kukonzya kulomba Paulo, mwaapostolo wa Kristo kuti abakombelezezye. Paulo wakali kutondezya kuti cileelela kulomba Banakristoma kuti batupailile kuli Leza. Pele eeci ciliindene kapati akupaila kumuntu uusyomwa kuti uli kujulu kuti atulombele kuli Leza kujatikizya zyintu nzyotuyanda. Nkaambo nzi?

 Mumakani mabotu aa Johane, Jesu wakaamba kuti: “Ndime nzila, kasimpe alimwi abuumi. Kunyina uuboola kuli Taata ccita kuti wainda mulindime.” (Johane 14:6) Alimwi wakaamba kuti: “Kufwumbwa ncomumulomba Taata kwiinda muzyina lyangu, akamupe ncico.” (Johane 15:16) Jesu kunyina naakaamba kuti tweelede kupaila kulinguwe mpoonya walo uyootulombela kuli Leza. Muciindi caboobo, kutegwa Leza aiswiilile mipailo yesu, tweelede kupaila kwiinda muli Jesu kutali mumuntu uumbi uuli woonse.

Ciindi basikwiiya ba Jesu nibakamulomba kuti abayiisye kupaila, Jesu wakaingula kuti: “Nomupaila, amwaambe kuti: ‘Taata, alisalazyigwe zyina lyako.’” (Luka 11:2) Inzya, ‘notupaila,’ naa kufwumbwa ciindi notupaila, tweelede kupaila kuli Leza kutali kuli Jesu naa kumuntu uumbi uuli woonse. Kweelana anjiisyo eezyi zya Jesu izilimvwisya, sena tacili camaano kwaamba kuti tweelede kugamika mipailo yesu kuli Leza kwiinda muli Jesu Kristo kutali kubaiminizi bali boonse naa “basaante”?

Mupailo ncibeela ciyandika kapati mubukombi bwesu, alimwi cilisalede kuti kupaila kumuntu uumbi kunze lya Leza, taceendelani anjiisyo zyamu Bbaibbele. (Johane 4:23, 24; Ciyubunuzyo 19:9, 10) Nkakaambo kaako tweelede kupaila buyo kuli Leza alikke.

SENA MWEELEDE KUYOOWA KUSIKILA LEZA MUMUPAILO?

Mu Mulumbe wakwe waa Cilundu, Jesu wakapa cikozyanyo camwana uulomba cakulya kuli bausyi. Sena bausyi inga bapa mwanaabo ibbwe muciindi cakumupa cinkwa? Naa kumupa nzoka muciindi canswi? (Matayo 7:9, 10) Inga tiicaba camaano kumuzyali siluyando kucita cintu cili boobu.

Amuyeeye cikozyanyo cikozyenye aceeci icijatikizya mbwayeeya muzyali. Amweezeezye kuti mwanaanu kuli cintu ncayanda kulomba kulindinywe. Mwalikucibikkila maano cilongwe canu anguwe, alimwi lyoonse muli bantu basikilika. Nokuba boobo, akaambo kakuyoowa mbomutilimvwe, waambila muntu uumbi kuti amulombele ncayanda kulindinywe. Ino inga mwalimvwa buti? Ino kuti lyoonse kabandika andinywe kwiinda mukubelesya muntu ooyu nguwenya alimwi calibonya kuti uyanda kunoocita boobu lyoonse? Sena inga mwacikkomanina eeci? Peepe! Bazyali basiluyando bayanda kuti bana babo kabaanguluka kubasikila alimwi akubalomba zyintu nzyobayanda.

Kwiinda mukubelesya cikozyanyo cakwe camwana uulomba cakulya, Jesu waambila nkamu yabantu kuti: “Aboobo ikuti nywebo nokuba kuti muli babi, mulicizyi kupa zipego zibotu kubana banu, nkokuti Uso uuli kujulu uyooinda kupa zyintu zibotu kuli baabo bamulomba!” (Matayo 7:11) Cakutadooneka, muzyali ulayandisya kapati kupa mwanaakwe zyintu zibotu. Taateesu wakujulu ulayandisya kapati kwiinda bantunsi kuswiilila akwiingula mipailo yesu.

Leza uyanda kuti katumusikila mumupailo nokuba kuti tuluuside akaambo kakulubizya kwesu. Kunyina naambila bantu bambi kuswiilila mipailo yesu. Ibbaibbele litukulwaizya kuti: “Bika makani aako oonse mumaanza aa-Jehova, lino ulakutabilila.” (Intembauzyo 55:22) Muciindi cakusyoma kwiimininwa abasaante naa muntu uuli woonse, tweelede kumuzyiba kabotu Jehova Leza.

Taateesu wakujulu ulatubikkila maano umwi aumwi kumugama. Uyanda kutugwasya mumapenzi ngotujisi alimwi ututamba kuti tuswenenene kulinguwe. (Jakobo 4:8) Eelo kaka tulikkomene kuti tulijisi coolwe cakusikila Leza wesu Taata, ‘sikuswiilila zikombyo”!—Intembauzyo 65:2.

[Cifwanikiso icili apeeji 13]

Mbuli muzyali siluyando amwanaakwe, Leza uyanda kuti katubandika anguwe