MUBANDI AMUKAMWINI ŊANDA

Sena Leza Ulakubikkila Maano Kupenga Kwesu?

Mubandi uutobela utondezya Bakamboni ba Jehova mbobakonzya kubandika abasimukobonyina. Atweezeezye kuti Kamboni uutegwa Mutinta wasika kuŋanda yamukaintu uutegwa Miyanda.

INO INGA WACILEKELA BUTI EECI KUCITIKA?

Mutinta: Sunu ndiyabwaabila katulakiti aaka kubantu boonse bamucilawo cino. Kajisi mutwe wakuti: Sena Inga Mwayanda Kuzyiba Bwiinguzi Bwakasimpe? Nkaaka kanu.

Miyanda: Sena kajatikizya bukombi?

Mutinta: Inzya. Amubone mibuzyo iili cisambomwe iili acivwumbyo. Nguuli mubuzyo akati kayeeyi—

Miyanda: Amulindile saansi. Mulasowa buyo ciindi canu kubandika andime.

Mutinta: Nkaambo nzi ncomwaambila boobo?

Miyanda: Bwini mbwakuti, tandili masimpe naa ndilasyoma muli Leza.

Mutinta: Oowo, ndalumba kundaambila masimpe, Sena lyoonse mbomwali kulimvwa oobo?

Miyanda: Peepe, kuzwa kubwana ndakali kuunka kucikombelo. Pele ndakacileka kaindi kuunka.

Mutinta: Oowo. Pele amuleke ndimwaambile zyina lyangu. Mebo ndime Mutinta.

Miyanda: Mebo ndime Miyanda.

Mutinta: Ndakkomana kumuzyiba, ba Miyanda.

Miyanda: Andime ndakkomana kumuzyiba.

Mutinta: Tiindaboolela kuti ndimusinikizye kuzumina nzyondisyoma, ba Miyanda. Pele kuli ncondiyanda kuzyiba. Sena kuli cintu cimwi cigaminide icakamupa kutalika kudooneka kuti naa Leza nkwali?

Miyanda: Inzya. Bamaama bakali muntenda yamumugwagwa myaka iili 17 yainda.

Mutinta: Cabija eeco. Sena bakalicisa?

Miyanda: Inzya, bakalebuka mubili kuzwa leelyo kusikila sunu.

Mutinta: Cilausisya eeco. Kweelede kuti mulityompedwe.

Miyanda: Inzya, ndilityompedwe kapati. Nkakaambo kaako ndilalibuzya kuti, ikuti naa Leza nkwali, ino inga wacilekela buti eeci kucitika? Nkaambo nzi ncalekela kuti katupenga boobu?

SENA CILILUBIDE KUBUZYA KUTI NKAAMBO NZI?

Mutinta: Takuli kulubizya kulimvwa boobo alimwi mibuzyo yanu iili buyo kabotu. Ciindi notuli mumapenzi, tacigambyi kubuzya kuti kaambo nzi. Nobaba baalumi abamakaintu basyomeka bakaindi bakali kubuzya oobo!

Miyanda: Sena masimpe aayo?

Mutinta: Inzya. Sena cili kabotu kuti ndimutondezye cikozyanyo cimwi mu Bbaibbele?

Miyanda: Inzya cili kabotu.

Mutinta: Amubone musinsimi uusyomeka Habakkuku ncaakabuzya Leza kweelana ambokulembedwe mulugwalo lwa Habakkuku, caandaano 1, kapango 2 alimwi a 3 kuti: “O Jehova, njooleka lili kukukwiilila notamvwi? Ndakulilila nkaambo kakupyopyongana kwabantu, pele toswiilili. Ino nkaambonzi wandibonya zibi akundilanzya bupilingene?” Sena mibuzyo eeyi tiikozyenye amibuzyo njomwali kubuzya?

Miyanda: Ilakozyanya.

Mutinta: Leza kunyina naakamukalalila Habakkuku akaambo kakubuzya mibuzyo eeyi, alimwi taakwe nakaambila Habakkuku kuti wakali kuyandika lusyomo luyumu.

Miyanda: Eeci cilakkomanisya.

JEHOVA ULAKUSULAIKA KUPENGA

Mutinta: Ibbaibbele lituyiisya kuti Leza ulakubona kupenga kwesu alimwi akuti ulakubikkila maano.

 Miyanda: Ino mupandulula nzi?

Mutinta: Amuleke ndimutondezye cikozyanyo cimwi cili mulugwalo lwa Kulonga 3:7. Sena inga mwakabala kapango aaka?

Miyanda: Inzya. Kaamba kuti: “Lino Jehova wakaamba kuti, ‘Ncobeni ndibwene mapenzi aabantu bangu bali mu-Egepita. Ndimvwide mbubalila nkaambo kabaabo bababelesya. Ndizi buusu bwabo mbobubede.’”

Mutinta: Ndalumba. Kweelana alugwalo oolu, sena Leza ulabona ciindi bantu bakwe nobapenga?

Miyanda: Inzya, kulibonya kuti ulabona.

Mutinta: Alimwi tacaambi kuti tazyi kabotu zitucitikila. Amulange alimwi majwi aali kumamanino aakapango aaka. Leza wakaamba kuti: “Ndizi buusu bwabo mbobubede.”Sena majwi aaya amvwika kuba aamuntu uutabikkili maano bamwi?

Miyanda: Peepe.

Mutinta: Masimpe aayo, Leza taaboni buyo mapenzi eesu, pele alimwi ulausa ciindi notuli mumapenzi.

Miyanda: Masimpe.

Mutinta: Katukayeeyede kaambo aaka, atubale citondezyo acimbi ciindi bantu ba Leza nobakali kupenga. Cilembedwe mulugwalo lwa Isaya 63:9. Cibeela cakusaanguna cakapango aaka caamba kuti: “Mumapenzi aabo oonse wakapenga alakwe.” Aboobo, sena inga mwaamba kuti Leza cakamucisa akaambo kakupenga kwabantu bakwe?

Miyanda: Inzya, mbocilimvwisya oobo.

Mutinta: Aayo masimpe ba Miyanda, Leza ulatubikkila maano kapati, alimwi ulacimwa natubona katupenga. Kuti twacimwa awalo ulacimwa.

NKAAMBO NZI NCATABWEZI NTAAMU?

Mutinta: Kanditanaunka, kuli kaambo kambi nkondiyanda kubandika andinywe.

Miyanda: Taakwe bubi.

Mutinta: Amubone Bbaibbele ncolituyiisya kujatikizya nguzu zya Leza. Lugwalo ndondiyeeya ndugwalo lwa Jeremiya 10:12. Sena inga mwalubala?

Miyanda: Inzya. Lwaamba kuti: “Nguwe iwakalenga nyika kunguzu zyakwe, iwabamba luwa mubusongo bwakwe, akutandabika majulu mumaanu aakwe.”

Mutinta: Ndalumba. Atuzinzibale kuyeeya alugwalo oolu kwakaindi kasyoonto. Sena Leza wakali kuyandika nguzu zinji kutegwa alenge bubumbo oobu bupati alimwi azyintu zili mumo?

Miyanda: Inzya.

Mutinta: Lino, ikuti Leza kajisi nguzu zyakulenga zyintu zyoonse zituzingulukide, sena inga tiitwalangila kuti ulijisi nguzu zyakweendelezya zilenge zyakwe?

Miyanda: Inzya.

Mutinta: Amuyeeye alimwi kujatikizya banyoko. Nkaambo nzi ncocimunyonganya kubabona kabapenga?

Miyanda: Nkaambo ndilabayanda. Mbaamaama.

Mutinta: Alimwi kuti nomwalijisi nguzu zyakumana kupenga kwabo sunu, sena inga mwacita oobo?

Miyanda: Inzya inga ndacita.

Mutinta: Amuyeeye buyo ncocaamba eeco. Ibbaibbele lyaamba kuti Leza ulikubwene kupenga kwesu, ulatweetelela, alimwi ulijisi nguzu zinji kapati. Aboobo, sena inga mweezeezya Leza mbwalijata kutegwa atabwezi ntaamu yakumana mapenzi eesu cakufwambaana?

Miyanda: Mwati kuli nondali kucibona boobo!

Mutinta: Sena muyeeya kuti kuli kaambo kabotu nkajisi kamupa kuti atabwezi ntaamu yakumana mapenzi eesu? *

Miyanda: Mm, Ndiyeeya kuti ulijisi.

Mutinta: Ndamvwa fooni yanu ilalila, nkokuti andikaboole ciindi cimbi kutegwa tuzoozumanane amubandi wesu.

Miyanda: Ndalumba. Mukaboole. *

Sena kuli mubuzyo wamu Bbaibbele ngomwakalibuzyide kale? Sena mulayandisisya kuzyiba njiisyo zimwi nzyobasyoma naa mbobakomba Bakamboni ba Jehova? Ikuti kacili boobo, mutakawayiwayi kubabuzya Bakamboni ciindi mwaakubaswaanya. Bayookkomana kubandika andinywe kujatikizya makani aaya.

[Bupanduluzi buyungizidwe]