AMUBE ACILONGWE A LEZA

Jehova Wakamulekelela Camoyo Woonse’

Ba Edward Herbert, basyaazibwene mumakani aakaindi, ibakapona myaka iili 400 yainda bakaamba kuti: “Ooyo uutalekeleli bamwi uli mbuli muntu unyonyoona bbiliki ndyayelede kubelesya walo mwini.” Majwi aaya alakasinizya ikaambo ncotweelede kulekelela bamwi nkaambo kalitanalampa andiswe inga twayandika kuti bamwi batulekelele. (Matayo 7:12) Nokuba boobo, kuli kaambo kamwi kapati ncotweelede kulekelela bamwi. Amubone majwi aamwaapostolo Paulo mulugwalo lwa Bakolose 3:13.—Amubale.

Akaambo kakuti toonse tatulondekede, zimwi ziindi tulakonzya kubabisizya naa ikubanyemya bamwi alimwi abalo inga bacita mbubwenya. (Baloma 3:23) Pele mbuti mbotunga twaba aluumuno abantuma batalondokede? Kwiinda mukusololelwa amuuya wa Leza, imwaapostolo Paulo utukulwaizya kweengelelana alimwi akulekelelana. Lulayo oolu lulagwasya naaba mazuba aano mbubwenya mbolwakali kugwasya ciindi nolwakalembwa myaka iili 2000 yainda. Lino atwaalingaule majwi aamwaapostolo Paulo.

“Amuzumanane kweengelelana.” Majwi aakuti ‘amuzumanane kweengelela’ mumwaambo wa Chigiliki aamba kutafwambaana kunyema nokuba kuti cileelela kucita oobo. Bbuku lyabuvwuntauzi limwi lyaamba kuti Banakristo balatondezya bube oobu kwiinda “mukujatila baabo bakonzya kubabisizya naa bajisi bube bubanyemya.” Majwi aakuti “kweengelelana” aamba kuti kujatilana ooku kulacitwa kuli umwi amweenzinyina. Nkokuti, ikuti twazyiba kuti andiswe tulijisi bube bukonzya kubanyemya bamwi, tatukazumizyi zyintu nzyotutayandi kujatikizya bamwi kuti zinyonganye luumuno akati kesu. Ino mbuti kuti bamwi batubisizya?

“Amuzumanane . . . kulekelelana camoyo woonse.” Sikwiiya umwi wakaamba kuti, bbala lyamu Chigiliki lisanduludwe kuti “kulekelela camoyo woonse,” talyaambi buyo kulekelela pe . . . pele likankaizya kulekelela kuzwide luse. Alimwi bbuku limbi lyaamba kuti bbala eeli lilakonzya kwaamba “ikupa cintu cikondelezya, naa kucita cintu cibotu.” Tulatondezya kuti tulijisi luse kwiinda mukulekelela camoyo woonse nokuba kuti tujisi “kaambo kakutongooka” umwi. Pele ino nkaambo nzi ncotweelede kulekelela? Masimpe ngakuti, ooyo muntu watubisizya, bumwi buzuba andiswe twaakumubisizya inga twayandika kuti atulekelele.

“Mbubonya Jehova mbwaakamulekelela camoyo woonse, andinywe mweelede kucita mbubonya oobo.” Aaka nkakaambo kapati ncotweelede kulekelela bamwi camoyo woonse: Jehova wakatulekelela camoyo woonse. (Mika 7:18) Amuyeeye buyo kujatikizya luse Jehova ndwatondezya kuli basizibi ibeempwa. Kwiimpana andiswe, Jehova walo tabisyi. Pele ulalekelela camoyo woonse alimwi cakumaninina basizibi ibeempwa nokuba kuti ulizyi kuti kunyina nobanga bayandika kumulekelela walo. Ncobeni, caboola kumakani aakulekelela, Jehova nguuinda kulekelela camoyo woonse basizibi ibeempwa!

Luse lwa Jehova lulatukwela kulinguwe alimwi tulakulwaizyigwa kumwiiya. (Baefeso 4:32–5:1) Aboobo ncibotu kulibuzya kuti, ‘Mbwaanga Jehova ulandilekelela caluse, ino cinzi cikonzya kundikasya kulekelela bantuma batalondokede ibakandibisizya pele ibatondezya kweempwa ncobeni?’—Luka 17:3, 4.

Jehova nguuinda kulekelela camoyo woonse basizibi ibeempwa!

Magwalo aamu Bbaibbele aasalidwe kubalwa mu October

Bagalatiya 1–2 Timoteyo 4

[Majwi aakwelelezya sikubala aali apeej 11]