Ikuti kwacitika nkondo, kulabesyegwa mali manji kapati.

•   “Mwaka wamana, mfwulumende munyika yoonse zyakabelesya mali aasika ku $2.2 tililiyoni munkondo ziindene-indene. Ooyu mweelwe munji kapati tweezyanisya amali aakali kubelesyegwa munkondo myaka yainda.”​—The Washington Post, February 13, 2024.

 Zijatikizyidwe munkondo nzinji kunze buyo aamali. Amubone cikozyanyo comwe: Nkondo iili ku Ukraine.

•   Basikalumamba. Kuyeeyelwa kuti, basikalumamba batandila ku 500,000 bakajaigwa naa kulicisa kuzwa ciindi nkondo niyakatalika myaka yobilo yainda.

•   Bantu-bantu buyo. Bantu bainda ku 28,000 bakajaigwa naa kulicisa kweelana alipooti njobakapa ba United Nations. Nokuba boobo, walupati-pati umwi uubeleka ku UN wakaamba kuti: “Tacikonzyeki kuzyiba mweelwe wini wabantu bakajatikizyigwa ankondo eeyi.” a

 Mweelwe wabantu ibapenga akaambo kankondo amazwanga nyika yoonse wavwula.

•   114 miliyoni. Ooyu ngomweelwe wabantu bakasiya maanda aabo akaambo kankondo amanyongwe munyika yoonse kusikila mu September 2023.

•   783 miliyoni. Ooyu ngomweelwe wabantu batajisi zyakulya zikkwene. “Nkondo ncecintu cipati cipa kuti kakuli nzala. Alimwi mweelwe uusika ku 70 pesenti mbaabo ibakkala mumasena aajatikizyidwe ankondo alimwi amazwanga.”​—World Food Programme.

 Sena nkondo kuli noiyoomana? Sena kuli nokuyooba luumuno? Sena lubono lwamunyika kuli noluyoobelesyegwa kumana nzala akugwisya bucete? Ino Bbaibbele lyaamba nzi?

 Bbaibbele lyakasinsima kujatikizya nkondo zili mukucitika munyika. Lyaamba nkondo munzila yacikozyanyo kuti ngusibbiza uutantide abbiza.

•   “Eelyo kwakazwa limbi, ibbiza lisalala pyu mbuli mulilo, mpoonya ooyo wakatantide alindilyo wakazumizyigwa kugusya luumuno anyika ikutegwa bantu batalike kujayana, alimwi wakapegwa panga lipati.”​—Ciyubunuzyo 6:4.

 Sibbiza wacikozyanyo ulatobelwa abasimabbiza bobilo ibaiminina nzala alimwi alufwu ziboola akaambo kamalwazi naa zintu zimwi. (Ciyubunuzyo 6:5-8) Kutegwa mwiiye zinji kujatikizya businsimi oobu bwamu Bbaibbele alimwi ancotukonzya kusyoma kuti buli mukuzuzikizyigwa mumazuba eesu, amubale cibalo cakuti “Basimabbiza Bone​—Ino Mbaani?”

 Ino-ino, lubono lwamunyika talukabelesyegwi limbi kunkondo. Nokuba boobo, eeci tacikacitiki akaambo kazintu bantu nzyobacita. Bbaibbele lyaamba kuti:

•   Leza ‘uyoomanizya nkondo munyika yoonse mboizulwa.’​—Intembauzyo 46:9.

•   Leza uyoogusya mapenzi aaboola akaambo kankondo. “Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”​—Ciyubunuzyo 21:4.

•   Leza uyooba masimpe kuti bantu boonse bakkede muluumuno. “Bantu bangu bayookkala mubusena bwaluumuno, mumakkalilo aakwabilidwe alimwi amumasena aakulyookezyela aaluumuno.”​—Isaya 32:18.

 Kweelana abusinsimi bwamu Bbaibbele, nkondo alimwi azintu zimwi zicitika nzyotubona mazuba aano zitondezya kuti ciindi eeci cakuti kube luumuno cili afwaafwi.

 Ino Leza uyooluleta buti luumuno oolu kumbele? Uyoocita oobo kwiinda mumfwulumende yakwe yakujulu, naa Bwami. (Matayo 6:10) Kutegwa mwiiye kujatikizya Bwami oobu ancobukonzya kwaamba kulindinywe, amweebelele vidiyo iijisi mutwe wakuti Ino Bwami bwa Leza Ninzi?