Mbwali cilenge camuuya, Diabolosi ukkala kubusena butalibonyi. Busena oobu tabuli busena bwahelo kwalo nkwapenzya bantu babyaabi, mbuli mbokutondezyedwe mucifwanikiso cili mucibalo eeci.

‘Nkondo kujulu’

 Kwaciindi cili mbocibede, Saatani Diabolosi wakalizumizyidwe kweendeenda kujulu, kubikkilizya akusika munsi-munsi a Leza antoomwe abangelo basyomeka. (Jobu 1:6) Pele Bbaibbele lyakasinsima kuti kuyooba ‘nkondo kujulu’ iyoopa kuti Saatani atandwe kujulu alimwi ‘akuwaalwa ansi, anyika.’ (Ciyubunuzyo 12:​7-9) Mbozyakali kutobelana kucitika zyintu izyaambwa mu Bbaibbele, alimwi azyintu zicitika munyika mazuba aano, zyoonse zitondezya kuti nkondo eeyi yakujulu yakacitika kale. Lino Diabolosi uli mubusena butalibonyi mpoona aano anyika, kunyina kumbi nkwanga waunka.

 Sena eeci caamba kuti Diabolosi ukkala kubusena bugaminide aano anyika? Mucikozyanyo, munzi wansiku wa Pergamo wakali kwaambwa kuti ‘nkokuli cuuno cabwami ca Saatani’ alimwi “ooko nkwabede Saatani.” (Ciyubunuzyo 2:13) Mubwini, kweelede kuti majwi aaya aamba bukombi bwabusaatani bwakadumide mumunzi ooyu. Bbaibbele lyaamba kuti Diabolosi weendelezya “mami oonse aamunyika,” aboobo takkede mubusena bomwe anyika pe, pele uli mubusena butalibonyi mpoonya aano anyika, kunyina kumbi nkwanga waunka.​—Luka 4:​5, 6.