Ino Kuboola kwa Kristo Caamba nzi?
Bwiinguzi bwamu Bbaibbele
Ziindi zinji Magwalo alaamba kujatikizya kuboola kwa Kristo anyika kuzoobeteka bantu. a Mucikozyanyo, lugwalo lwa Matayo 25:31-33 lwaamba kuti:
“Mwanaamuntu aakuboola mubulemu bwakwe, antoomwe abangelo boonse, uyookkala acuuno cakwe cabwami cabulemu. Masi oonse ayoobunganizyigwa kumbele lyakwe, mpoonya uyoobaandaanya bantu mbubonya mweembezi mbwaandaanya mbelele ampongo. Uyoobikka mbelele kujanza lyakwe lyalulyo, pele mpongo uyoozibikka kujanza lyakwe lyalumwensyi.”
Eeci ciindi cakubeteka cinooli cibeela “camapenzi mapati” cintu citanacitikide mubuumi bwabantu. Aaya mapenzi ayoomanana lyankondo ya Amagedoni. (Matayo 24:21; Ciyubunuzyo 16:16) Basinkondonyina Kristo, aabo ibaambwa kuti nimpongo mucikozyanyo cakwe, “bayoopegwa cisubulo calubeta lwakunyonyweedwa limwi kukabe kutamani.” (2 Batesalonika 1:9; Ciyubunuzyo 19:11, 15) Mukwiimpana, babelesi bakwe basyomeka, imbelele, banoojisi bulangizi bwakupona “buumi butamani.”—Matayo 25:46.
Ino Kristo uyooboola lili?
Jesu wakaamba kuti: “Kujatikizya buzuba oobo alimwi aciindi kunyina uuzyi pe.” (Matayo 24:36, 42; 25:13) Nokuba boobo, wakapandulula “citondezyo” ciyoosololela kukuboola kwakwe.—Matayo 24:3, 7-14; Luka 21:10, 11.
Sena Kristo uyooboola mumubili wanyama naa wamuuya?
Jesu wakabusyigwa kajisi mubili wamuuya, aboobo uyakuboola kajisi mubili wamuuya, kutali wanyama pe. (1 Bakorinto 15:45; 1 Petro 3:18) Nkakaambo kaako, Jesu katanafwa wakaambila baapostolo bakwe kuti: “Muciindi cisyoonto inyika tiikandiboni limbi pe.”—Johane 14:19.
Makani aakubeja aadumide aajatikizya kuboola kwa Kristo
Makani aakubeja: Ciindi Bbaibbele nolyaamba kuti bantu bayoomubona Jesu “kaboola mumakumbi aakujulu,” lipandulula kuti Jesu uyoolibonya aakuboola.—Matayo 24:30.
Makani aamasimpe: Kanji-kanji Bbaibbele likozyanisya makumbi kucintu citalibonyi. (Levitiko 16:2; Myeelwe 11:25; Deuteronomo 33:26) Mucikozyanyo, Leza wakaambila Musa kuti: “Ndilaboola kulinduwe mukkumbi lisiya.” (Kulonga 19:9) Musa kunyina naakamubona cacigaminina Leza pe. Mbubwenya buyo, Kristo ‘uyooboola mumakumbi’ alimwi bantu bayoozyiba kuboola kwakwe nokuba kuti tabakamuboni cacigaminina.
Makani aakubeja: Mabala aabelesyedwe mulugwalo lwa Ciyubunuzyo 1:7 aakuti, “meso oonse ayoomubona” ikupandulula kuboola kwa Kristo, bantu baamvwa kuti aamba kumubona cacigaminina.
Makani aamasimpe: Mabala aali mu Bbaibbele aa Chigiriki aakuti “liso” alimwi “akubona” zimwi ziindi taapandululi kubona cacigaminina, pele aamba kuzyiba. b (Matayo 13:15; Luka 19:42; Baroma 15:21; Baefeso 1:18) Ibbaibbele lyaamba kuti ooyo Jesu iwakabusyigwa ngonguwe “uukkala mumumuni uutaswenwi afwaafwi, ooyo uutanabonwa.” (1 Timoteyo 6:16) Aboobo, “meso oonse ayoomubona” mukuti bantu boonse bayoozyiba kuti Jesu ngonguwe uuleta lubeta lwa Leza.—Matayo 24:30.
Makani aakubeja: Lugwalo lwa 2 Johane 7 lutondezya kuti Jesu uyooboola mumubili wanyama.
Makani aamasimpe: Kapango aaka kamu Bbaibbele kaamba kuti: “Nkaambo kuli basilweeno banji bamwaikide munyika, ibantu batazumini Jesu Kristo kuti wakaboola mumubili wanyama.”
Mumazuba aamwaapostolo Johane, bantu bamwi bakali kukazya kuti Jesu wakaliboolede anyika kajisi mubili wanyama. Aabo bantu bakali kwiitwa kuti Gnostics. 2 Johane 7 yakalembelwa kusalazya makani aaya aakubeja.
Andiza Inga Mwaakkomanina Ayaaya
NGAZI YAMULINDIZI
MIBUZYO YAMU BBAIBBELE YAINGULWA
MIBUZYO YAMU BBAIBBELE YAINGULWA
Ino Nkondo ya Amagedoni Ninzi?
Ibbala lyakuti Amagedoni lijanwa buyo ciindi comwe mu Bbaibbele, pele inkondo njoyiiminina ilabandikwa mu Magwalo oonse.
MIBUZYO YAMU BBAIBBELE YAINGULWA
Ino Mapenzi Mapati Ninzi?
Businsimi ibwaambwa kuti ‘mbusinsimi bwakuciindi camamanino’ bwaamba zyamapenzi aakatakazya kapati ngobatanabwene bantu. Ino ncinzi ncotukonzya kulangila kucitika?
NJIISYO ZYAMU BBAIBBELE ZIGWASYA
Bwami bwa Leza Bwakatalika Kulela mu 1914
Myaka 2,600 yainda, Leza wakasololela mwami ulaanguzu kulota ciloto icili mukuzuzikizyigwa lino.
NGAZI YAMULINDIZI
Ino Jesu Kristo Nguni?
NJIISYO ZYAMU BBAIBBELE
Amulembe Foomu Kuti Kamuyanda Kwiiya
Amwiiye Bbaibbele amwiiyi kakunyina kubbadela.