OL MAN I TOK

Planti man i ting pasin bilong pait na bagarapim man i rot bilong stretim hevi. Ol man i gat lotu i holim wankain tingting olsem. Planti i pilim olsem em rot bilong stretim hevi taim ol yet i nogat asua. Na planti milion man i orait long ol muvi na musik samting i stori long pasin bilong pait na bagarapim man.

BAIBEL I TOK

Klostu long biktaun Mosul long noten Irak, i gat ol pipia ston bilong biktaun Ninive bilong bipo, em biktaun bilong kantri Asiria. Baibel i tok profet long God bai “bagarapim Ninive,” maski long dispela taim i gat planti wok bisnis long biktaun Ninive. (Sefanaia 2:13) God i tok: “Olgeta kantri bai i lukim yu na i pret.” Em i tok olsem, long wanem, Ninive i ples bilong “kilim ol man i dai.” (Nahum 1:1; 3:1, 6) Na tu, Song 5:6 i tok, Jehova i “no laikim tru ol man bilong kilim man i dai.” Ol pipia ston bilong Ninive i stap yet i soim olsem God i bin truim tok bilong em.

Pasin bilong pait na bagarapim man i bin kamap long rot bilong Satan, em nambawan birua bilong God na ol man. Jisas Krais i kolim em “man bilong kilim man i dai.” (Jon 8:44) Na tu, “dispela graun olgeta i stap long han bilong Satan,” olsem na planti i bihainim pasin bilong em long pait na bagarapim man, na ol i laikim ol muvi na musik samting i stori long dispela samting. (1 Jon 5:19) Bilong amamasim God, yumi mas heitim pasin bilong pait na bagarapim man, na laikim ol samting God i laikim. * Yu ting yumi inap mekim olsem?

“Jehova . . . i heitim tru ol man i laikim pasin pait.”—Song 11:5, NW.

OL MAN I TOK

Pasin bilong pait na bagarapim narapela em pasin bilong ol man.

BAIBEL I TOK

“Lusim olgeta kain pasin olsem, . . . belhat, kros, pasin nogut, tok nogut, na ol tok doti.  . . Rausim olpela bel wantaim ol pasin bilong en. Na yupela i mas werim nupela pasin olsem yupela i werim klos.” (Kolosi 3:8-10) Yu ting God i tokim yumi long mekim ol samting em yumi no inap mekim? Nogat tru. Olsem na ol man inap senisim pasin bilong ol. * Tasol ol inap mekim olsem wanem?

Namba 1, kisim stretpela save long God. (Kolosi 3:10) Taim man i gat gutpela bel i kisim save  long ol gutpela pasin na lo bilong Krieta bilong yumi, orait pasin bilong em long laikim God bai kirapim em long i go klostu long God na amamasim Em.—1 Jon 5:3.

Namba 2, makim ol gutpela poroman. Baibel i tok: “Yu no ken pren long ol man bilong kros kwik na bilong pairap nabaut. Nogut yu kisim pasin bilong ol na bihain ol samting nogut i bagarapim yu.”—Sindaun 22:24, 25.

Namba 3, kisim gutpela savetingting. Man i save pait long narapela, long wanem, em i no inap long bosim gut bel. Tasol ol man bilong bel isi i save bosim gut bel. Sindaun 16:32 i tok: “Man i no save belhat kwik,   . . dispela pasin i winim pasin bilong pait strong olsem gutpela soldia.”

“Yupela i mas wok strong long sindaun gut wantaim olgeta manmeri.”—Hibru 12:14.

OL MAN I TOK

Pasin bilong pait na bagarapim man bai i no inap pinis.

BAIBEL I TOK

“I no longtaim na bai ol man nogut i lus olgeta.  . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:10, 11) Bilong kisim bek ol man i gat pasin daun na bel isi, God bai bagarapim ol man bilong pait na bagarapim ol narapela olsem em i bin mekim long biktaun Ninive bilong bipo. Bihain long dispela, ol man bai i stap bel isi long graun olgeta!—Song 72:7.

Olsem na bilong God i ken orait long yumi, yumi mas kisim pasin bilong stap bel isi. Long 2 Pita 3:9, Baibel i tok: “Jehova . . . i wetim yupela na i no les kwik, long wanem, em i no laik bai wanpela i kisim bagarap. Em i laik bai olgeta i tanim bel.”

“Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip.”—Aisaia 2:4.