Wanpela saveman i tok, sapos man i laik senisim pasin bilong em, em bai mekim olsem insait long 21 de. Tasol ol wok painimaut i soim olsem sampela man i mekim ol bikpela senis insait long liklik haptaim, na sampela i lusim longpela haptaim. Olsem wanem? Bai yu givap long senisim ol pasin bilong yu?

Tingim dispela: Sapos yu laik kisim pasin bilong eksasais 3-pela de long olgeta wik.

• Fes wik, yu eksasais long 3-pela de.

• Namba 2 wik, yu eksasais long 2-pela de.

• Namba 3 wik, yu eksasais long 3-pela de.

• Namba 4 wik, yu eksasais long 1-pela de.

• Namba 5 wik, yu eksasais long 3-pela de. Kirap long dispela taim, yu eksasais 3-pela de long olgeta wik.

Bihain long 5-pela wik, yu kisim pasin bilong eksasais. Yu inap ting em longpela taim, tasol taim yu winim mak yu putim, bai yu amamas olsem yu wok strong long kisim dispela gutpela pasin.

Baibel i kirapim yumi long wok strong na no ken givap. Bikpela samting em olsem, maski yumi pundaun planti taim yumi mekim yet ol gutpela pasin.

• No ken ting olsem taim yu pundaun long bihainim ol gutpela pasin, yu no inap mekim ol senis. Sampela taim ol samting inap kamap na nau yu no hariap long winim ol mak yu bin putim.

• Tingim ol gutpela samting yu bin mekim long winim ol mak yu putim. Olsem, sapos yu putim mak long toktok gut wantaim ol pikinini bilong yu, askim yu yet: ‘Wanem taim mi bin tingting long bikmaus long pikinini bilong mi, tasol mi no mekim? Na mi mekim wanem long dispela taim? Hau mi inap mekim gen dispela pasin?’ Ol kain askim olsem inap helpim yu long tingim ol gutpela samting yu bin mekim na yu no givap hariap.

Yu laik kisim save long hau ol stiatok bilong Baibel inap helpim yu long stap amamas tru, daunim pasin bilong tingting planti, na helpim famili long i stap amamas? Toktok wantaim wanpela Witnes Bilong Jehova o go long Web-sait bilong mipela long jw.org.