LONG narapela taim, dispela meri i kros gen long Antoñia. Antoñia i mekim wanem? Em i tok: “Kros bilong em i sikirapim tru bel bilong mi. Dispela meri i kros nating.” Antoñia i tok sori gen na tokim dispela meri olsem em i pilim hevi bilong em.

Sapos yu Antoñia, yu ting yu bai bihainim pasin isi? Yu ting yu bai hatwok long bosim belhat bilong yu? Em tru olsem i hatwok long stap bel isi taim kain hevi olsem i kamap. Taim ol narapela i putim hevi o sikirapim bel bilong yumi, yumi bai hatwok long bihainim pasin isi.

Baibel i kirapim ol Kristen long bihainim pasin isi. Man bai bihainim pasin isi sapos em i gat savetingting. Jems i tok: “Husat namel long yupela i gat savetingting na i save kliagut long ol tok? Pasin bilong em long wokabaut stret, na ol samting em i mekim i mas kamapim pasin isi em savetingting i as bilong en.” (Jems 3:13) Sapos man i bihainim pasin isi, olsem wanem dispela i soim klia olsem em i gat savetingting i kam long God? Olsem wanem yumi inap kisim pasin isi?

Pasin isi inap daunim belhat. “Sapos man i belhat long yu, orait bekim tok isi long em, na bai belhat bilong en i dai. Tasol sapos yu rabisim narapela man long tok bilong yu, bai yu mekim em i belhat nogut tru long yu.”—Snd. 15:1.

Sapos man i krosim yumi na yumi tu i kros long em, dispela bai kamapim bikpela hevi moa—i olsem yumi putim paiawut long paia. (Snd. 26:21) Tasol sapos yumi bekim tok long pasin isi, dispela inap daunim kros. Na tu, pasin isi inap senisim pasin bilong man i belhat.

Dispela samting i kamap long Antoñia. Meri i krai taim em i lukim olsem Antoñia i soim pasin isi long em. Meri i kros bikos hevi bilong em yet na hevi bilong famili i putim presa long em. Antoñia i autim tok long em na stadi wantaim em long Baibel—dispela gutpela samting i kamap bikos Antoñia i bihainim pasin isi na toktok gut long dispela meri.

Pasin isi inap mekim yumi amamas. “Ol man i bihainim pasin isi, ol i ken amamas, long wanem, ol bai kisim graun olgeta.”—Mat. 5:5.

Bilong wanem ol man i bihainim pasin isi, ol i ken amamas? Planti manmeri husat i gat pasin bilong belhat, nau ol i stap amamas bikos ol i bihainim pasin isi. Sindaun bilong ol i kamap gutpela moa, na ol i save olsem ol bai kisim gutpela laip long bihain. (Kol. 3:12) Adolfo em wanpela wasman sekit long Spen, na em i tingim bek laip bilong em paslain long em i kisim tok i tru.

Adolfo i tok: “Laip bilong mi i pulap tru long ol hevi. Mi gat pasin antap na mi save belhat kwik, olsem na sampela pren i save pret long mi. Bihain, wanpela bikpela hevi i kamap na i kirapim mi long senisim pasin bilong mi. Mi pait wantaim ol man na ol i sutim mi long naip inap 6-pela taim. Mi lusim planti blut na klostu mi dai.”

Long nau, toktok na pasin bilong Adolfo i senis na em i skulim ol narapela long bihainim pasin isi. Planti manmeri i laikim tru pasin bilong em. Adolfo i tok em i amamas olsem em inap senisim ol pasin bilong em. Em i tenkyu tru long Jehova i helpim em long kisim pasin isi.

Jehova i amamas long man i mekim pasin isi. “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—Snd. 27:11.

Satan em nambawan birua bilong Jehova, na em i wok long sutim tok long God. God i gat rait long kros long Satan, tasol Baibel i tok Jehova i “no save belhat kwik.” (Kis. 34:6) Taim yumi wok strong long bihainim pasin isi na yumi no belhat kwik, dispela i soim olsem yumi bihainim savetingting na Jehova i amamas tru long yumi.—Efe. 5:1.

Long nau, ol manmeri i gat hatpela pasin. Ol i gat pasin bilong ‘litimapim nem bilong ol yet, pasin antap, tok nogut long ol arapela, bagarapim gutnem bilong ol arapela, ol i no gat pasin bilong bosim bel, na ol i kamap wail olgeta.’ (2 Tim. 3:2, 3) Dispela i no ken pasim ol Kristen long kisim pasin isi. Baibel i tok: “Savetingting i kam long heven . . . i mekim man i stap wanbel wantaim ol arapela, [na] bihainim pasin isi.” (Jems 3:17) Taim yumi stap wanbel wantaim ol narapela na bihainim pasin isi, yumi soim olsem yumi kisim savetingting i kam long God. Savetingting bai kirapim yumi long bihainim pasin isi taim ol narapela i sikirapim bel bilong yumi, na yumi bai i go klostu moa long Jehova, em Man i pulap tru long savetingting.