LONG 1958 samting, papa bilong John i kisim baptais long liklik taun long Gujarat long India, na em i kamap wanpela Witnes Bilong Jehova. John wantaim ol brata na susa bilong em na mama bilong em i bilong lotu Katolik, na ol i no amamas long bilip bilong Papa.

Wanpela taim, papa bilong John i askim em long bringim envelop i go long wanpela pren long kongrigesen. Tasol long dispela moning, taim John i laik opim wanpela bikpela tin, em i katim bikpela pinga long han sut. Em i no laik sakim tok bilong Papa, olsem na em i taitim pinga long hap laplap na kisim envelop na i go.

Taim John i kamap long haus bilong pren bilong Papa, em i no stap, tasol meri bilong em i stap na em i wanpela Witnes Bilong Jehova. Taim dispela meri i laik kisim envelop, em i luksave olsem John i katim pinga bilong em. Olsem na em i kisim John i go na klinim sua bilong em long marasin na pasim gut. Bihain, em i wokim ti bilong John na stori gut long em long ol tok bilong Baibel.

Gutpela pasin bilong sista i senisim tingting John i gat long ol Witnes. John i askim em long 2-pela bilip bilong ol Witnes we i narapela kain long bilip bilong ol Katolik—olsem Jisas em i God, na i stret long ol Kristen i beten long Maria o nogat. Dispela sista i save long tokples bilong John, em Gujarati. Olsem na em i yusim Baibel long bekim askim bilong John na givim em buklet “This Good News of the Kingdom.”

Taim John i ritim dispela buklet, em i pilim olsem em i harim tok i tru long namba 1 taim. Em i go long wanpela pris na givim wankain askim olsem em i bin askim dispela sista. Dispela pris i kros na tromoi Baibel long John na i bikmaus na tok: “Yu kamap olsem Satan! Soim mi wanem hap long Baibel i tok olsem Jisas i no God. Soim mi tu long wanem hap i tok olsem yumi no ken lotuim Maria. Soim mi!” John i kirap nogut tru long pasin pris i mekim na em i tokim pris olsem, “Mi no inap kam insait gen long haus lotu bilong Misin Katolik.” Em i lusim dispela lotu olgeta!

John i kirap stadi wantaim ol Witnes, na em i holim strong tok i tru na lotuim Jehova. Bihain, ol narapela long famili i kam insait long lotu i tru. Long nau, John i gat mak i stap yet long pinga we em i bin katim long tin inap 60 yia i go pinis. Em i tingim yet gutpela pasin helpim we i bin kirapim em long kam insait long lotu i tru.—2 Kor. 6:4, 6.