Yu Save Long Dispela?

Olsem wanem sampela nem i stap long ol mak bilong bipo em ol i wokim long klei, ol i wankain long ol nem i stap long Baibel?

▪ Long bipo, ol man i gat wok long ol pepa bilong gavman samting ol i save rolim pepa na pasim long rop, na ol i putim klei antap long rop na putim mak long en. Dispela i olsem ol i sainim nem, stap olsem witnes, na soim olsem rait bilong dispela pepa i bilong husat tru.

Sampela taim ol i wokim ol ring i gat mak na ol i tingim dispela olsem samting i dia tumas. (Stat 38:18; Esta 8:8; Jeremaia 32:44) Planti taim dispela mak i gat nem bilong man yet, namba bilong em, na nem bilong papa bilong em.

Ol saveman i painim pinis planti handret mak olsem, ol i kolim bulla. Sampela i gat nem bilong ol man em Baibel i stori long ol. Olsem: Ol saveman bilong painim ol samting bilong bipo ol i bin painim sampela mak ol i ting ol i bilong tupela king bilong Juda. Wanpela i gat rait olsem: “Em bilong Ahas [pikinini bilong] Yehotam [Jotam], King Bilong Juda.” Na sampela rait moa i tok: “Em bilong Hesekia [pikinini bilong] Ahas, King Bilong Juda.” (2 King 16:1, 20) Ahas na Hesekia i bin i stap king long yia 700 B.C.E. samting.

Ol saveman i bin glasim sampela bulla i gat mak long en na ol i ting ol dispela mak i bilong ol man em Baibel i stori long ol. Sampela i gat nem bilong ol man i stap long ol rait bilong Jeremaia, olsem Baruk (kuskus bilong Jeremaia), Gemaria (“pikinini bilong Safan”), Jeramel (‘pikinini bilong king’), Jehukal (“pikinini bilong Selemia”), na Seraia (brata bilong Baruk).—Jeremaia 32:12; 36:4, 10, 26; 38:1-3; 51:59.

Baibel i stori olsem wanem long ol narapela narapela taim insait long wanpela de?

▪ Ol Skripsa Hibru i kolim ol tok olsem “moningtaim,” “belo,” “biksan,” na “apinun tru.” (Stat 24:11; Lo 28:29; 1 King 18:26) Ol Hibru bilong bipo ol i bin brukim taim bilong nait i go long 3-pela hap i gat 4-pela 4-pela aua long en, tasol bihain ol i kisim pasin bilong ol Grik na ol Rom, ol i save brukim taim bilong nait i go long 4-pela hap. Ating Jisas i bin toktok long dispela kain pasin bilong makim taim, em i tok: “Yupela i mas was i stap, long wanem, yupela i no save long wanem taim Papa bilong haus bai i kam. Bai em i kam taim san i go daun pinis o long biknait o taim kakaruk i krai o long bikmoning.” (Mak 13:35) Dispela haptaim olsem “san i go daun pinis” em i kirap long taim san i go daun i go inap long 9 klok nait. Namba 2 haptaim i pinis long biknait, na namba 3, em “taim kakaruk i krai,” i go inap long 3 klok samting long bikmoning. Laspela haptaim, em long bikmoning i go inap long sankamap. Jisas i bin wokabaut antap long raunwara Galili long “namba 4 hap bilong nait.”​—Matyu 14:23-26.

Long Ol Skripsa Grik, dispela tok “aua” i makim wanpela aua bilong haptaim i gat 12-pela aua bilong en, na ol i kaunim ol dispela aua kirap long sankamap i go inap long san i go daun. (Jon 11:9) Long Israel, taim bilong sankamap na san i go daun i save senis senis insait long yia, olsem na bilong kolim taim bilong wanpela samting i bin kamap, ol i tok “namba 6 aua,” o kain samting olsem.​—Aposel 10:9.

[Piksa Long Pes 15]

Ol mak i stap long klei i gat nem bilong hesekia na ahas (fran) na ating baruk (baksait)

[Credit Lines]

Back: Courtesy of Israel Museum, Jerusalem

Front: www.BibleLandPictures.com/​Alamy

[Piksa Long Pes 15]

San klok bilong ol Rom bilong bipo (27 B.C.E.–476 C.E.)

[Credit Line]

© Gerard Degeorge/​The Bridgeman Art Library International