OL I bin painim dispela gutpela samting long Disemba 1922, taim saveman Ivané Javakhishvili i wok long stadi na kisim save long hau ol i bin kamapim ol leta alfabet bilong tokples Jojia long pastaim tru. Em i painim wanpela kopi bilong Jerusalem Talmut. Taim em i glasim gut, em lukim ol hap hap rait i stap aninit long rait Hibru em ol leta alfabet bilong tokples Jojia. a

Dispela rait i bin stap “hait” aninit long Talmut, em i kopi bilong wanpela hap bilong Buk Jeremaia long Baibel, ol i bin raitim long yia 450 C.E. samting. Paslain long ol i bin painim dispela rait, i gat wanpela olpela manuskrip bilong Baibel Jojia, em i bilong yia 800 C.E. samting. I no longtaim na ol i wok long painim ol narapela hap bilong Baibel i bilong yia 450 C.E. samting na sampela i bilong ol yia paslain long dispela. Tingim olsem ol i painim ol hap bilong Baibel em ol man i bin raitim sampela handret yia tasol bihain long taim bilong Jisas na ol aposel!

Husat i bin tanim ol dispela tok bilong Baibel? Wanpela man tasol i mekim o wanpela lain i bin givim bel tru long mekim dispela? Ol i no bin painim yet sampela rait bilong bipo i bekim ol dispela askim. Tasol i luk olsem ol i bin tanim Baibel olgeta, o sampela hap bilong en long tokples Jojia long yia 350 C.E. samting, na kirap long dispela taim Baibel i bin stap long tokples Jojia na ol man inap ritim long tokples bilong ol yet.

Buk The Martyrdom of St. Shushanik the Queen em ol i bin raitim long yia 480 C.E. samting i soim olsem lain Jojia i bin save long Baibel long dispela taim bipo. Dispela buk i kamapim stori bilong Kwin Shushanik, na i kolim tu sampela tok bilong Buk Song na ol Gutnius na sampela hap moa bilong Baibel. Na buk i stori tu long man bilong Shushanik, em Varsken, wanpela gavana bilong Katli, em nau kantri Jojia, em i laik mekim gut bel bilong ol bikman bilong Persia na em i lusim “lotu Kristen” na em i lotuim god Soroastrian bilong  Persia, na em i strong long meri bilong em tu i mas mekim olsem. Tasol buk i tok kwin i no laik lusim bilip bilong em, na em i kisim bel isi long rot bilong ritim Baibel i go inap long taim ol i kilim em i dai.

Kirap long yia 400 C.E. samting na i kam, i luk olsem ol i no bin lusim wok bilong tanim na raitim ol kopi bilong Baibel Jojia. I gat planti manuskrip bilong Baibel long tokples Jojia ol i painim pinis, na dispela i kamapim klia olsem ol man bilong tanim na wokim ol kopi bilong Baibel ol i bin givim bel tru long wok bilong ol. Orait nau yumi ken skelim tupela samting bilong dispela stori—wok bilong tanim na prinim Baibel.

Wanpela bruder bilong Misin long yia 1050 samting, em Giorgi Mtatsmindeli, i tok: “Mi, Giorgi, wanpela bruder nating, i bin tanim dispela Buk Song i stap long nupela tok Grik i go long tokples Jojia na mi bin wok strong na taitim bun tru long mekim dispela wok.” Bilong wanem ol i mas tanim tok bilong Baibel taim i gat wanpela Baibel i stap pinis long tokples Jojia inap sampela handret yia?

Long yia 1050 samting, i no gat planti manuskrip bilong Baibel i stap yet long tokples Jojia em ol i bin raitim long han. Sampela hap bilong Baibel i lus olgeta. Na tu, tokples i senis liklik, olsem na ol man bilong ritim ol i hatwok long kisimgut tok bilong ol olpela kopi bilong Baibel. Tru sampela trensleta i bin wok strong long kamapim gen Baibel Jojia, tasol wok bilong Giorgi i gutpela moa. Ol Baibel Jojia i stap yet, em i skelim wantaim ol manuskrip Grik na em i tanim ol hap hap i bin lus, na sampela buk olgeta bilong Baibel. Long san em i mekim wok olsem bosman bilong haus bruder. Na long nait em i save tanim tok bilong Baibel.

Ephrem Mtsire, i bin stap long taim bilong Giorgi, em tu i wok long tanim Baibel, na tu, em i wokim wanpela buk bilong helpim ol man bilong tanim tok. Buk i gat sampela stiatok bilong tanim Baibel, olsem ol i mas lukim tokples em ol i bin raitim Baibel long en long pastaim, na tanim stret olgeta tok bilong en, tasol ol i mas tanim long pasin ol man inap kisimgut. Na tu, em i kirapim pasin bilong raitim ol tok daunbilo i gat sta, na ol skripsa long namel bilong pes long ol Baibel Jojia. Ephrem i tanim planti buk bilong Baibel na em i no kisim sampela tok long ol Baibel ol i tanim pinis bipo. Wok bilong Giorgi na Ephrem i stap olsem as bilong wok ol man bilong tanim Baibel i mekim bihain long ol.

Insait long wan handret yia bihain, ol i bin wokim planti buk long Jojia. Ol i kamapim ol skul kolis long taun Gelati na Ikalto. Planti saveman i ting, Baibel Gelati, nau i stap long Georgian National Centre of Manuscripts, em nupela Baibel we wanpela saveman bilong taun Gelati o Ikalto i bin tanim.

 Dispela bikpela wok bilong tanim Baibel i bin mekim wanem long ol manmeri bilong Jojia? Long yia 1150 samting, man bilong raitim stori, em Shota Rustaveli bilong Jojia, em i raitim stori Knight in the Panther Skin, na insait long planti handret yia dispela stori em i bikpela samting tru long ol Jojia, olsem na ol i kolim dispela buk olsem namba 2 Baibel bilong ol Jojia. Long nau, wanpela saveman bilong Jojia, em K. Kekelidze, em i tok, maski man bilong raitim dispela stori i bin kisim sampela tok bilong en long Baibel o nogat, “sampela tok bilong em i kamapim stret tingting i stap long sampela ves bilong Baibel.” Tru, em i bilasim gut dispela stori, tasol planti taim em i kamapim tok long pasin pren tru, pasin bilong givim ol samting, rispek long ol meri, na laikim tru ol man bilong narapela hap. Ol dispela gutpela pasin Baibel i skulim yumi long en i bin stiaim tru tingting bilong ol Jojia inap sampela handret yia na i wok yet long stiaim tingting bilong ol long pasin bilong wokabaut stret.

Klostu long yia 1700, famili bilong king bilong Jojia i gat bikpela laik long ol i mas prinim Baibel. Olsem na King Vakhtang Namba 6 i wokim wanpela haus bilong prinim ol buk long biktaun Tbilisi. Tasol Baibel i no redi yet long prinim. I olsem Baibel Jojia i stap hait gen. Ol inap kisim ol wan wan hap manuskrip bilong sampela hap bilong Baibel tasol, na tokples bilong en i bilong bipo. King i givim wok bilong stretim na kamapim bek ol tok bilong Baibel long Sulkhan-Saba Orbeliani, em wanpela saveman tru bilong ol tokples.

Orbeliani i kirap givim bel olgeta long mekim dispela wok. Em i gat save long mekim tok Grik na tok Latin na sampela tokples moa, olsem na em inap skelim ol narapela narapela rait na ol manuskrip long tok Jojia i stap pinis. Tasol Misin Otodoks bilong Jojia i no amamas long pasin bilong em long skelim ol narapela narapela manuskrip ol i bin tanim. Ol pris i sutim tok long em olsem em i givim baksait long Misin na ol i kirapim king long pasim em long mekim sampela wok moa long Baibel. Sampela narapela rait bilong Jojia i tok, long wanpela bung bilong Misin, ol pris i fosim Orbeliani long kukim long paia dispela Baibel em i bin mekim wok long en inap planti yia!

Gutpela tru olsem wanpela kopi bilong Mtskheta (Mcxeta) Manuskrip, narapela nem bilong en Baibel Bilong Saba, i stap yet i kam inap long nau na i gat sampela tok bilong Orbeliani em i bin raitim long han. Tasol sampela i no ting dispela em Baibel ol pris i bin birua long en. Ol i ting ol tok bilong apendiks tasol em ol tok em i bin raitim tru tru.

Maski i gat ol dispela hatwok na pasin birua i stap, wok bilong prinim Baibel i stap olsem nambawan bikpela samting bilong sampela long famili bilong king. Namel long 1705 na 1711, ol i bin prinim sampela hap bilong Baibel. Prins Bakari na Prins Vakhushti bilong Jojia i bin wok strong na long yia 1743 ol i bin prinim Baibel olgeta. Em i no inap i stap hait moa.