SINGSING 100
Mekim Gut Long Man i Kam Long Haus Bilong Yu
-
1. Jehova i mekim gut long yumi man.
Em mekim wankain pasin long olgeta.
Em givim ren na san long olgeta lain man;
Em mekim yumi stap belgut tru.
Taim yumi mekim gut long ol man nating,
Nau yumi bihainim pasin bilong God.
Em bai bekim gutpla pasin bilong yumi,
Em pasin laikim i as blong en.
-
2. Taim yumi helpim man i nidim helpim,
Planti gutpela samting inap kamap.
Mekim gut long ol lain yu no save long ol,
Na givim samting ol i nidim.
Olsem Lidia, tok: ‘Kam long haus blong mi.’
Ol inap malolo, kisim bel isi.
Papa blong yumi bai luksave taim yumi
Bihainim ol pasin bilong em.
(Lukim tu Apo. 16:14, 15; Rom 12:13; 1 Tim. 3:2; Hib. 13:2; 1 Pita 4:9.)
