Tshinela Eka Xikwembu

Xana Wu Kona Nchumu Lowu Nga ‘Hi Hambanisaka Ni Rirhandzu Ra Xikwembu’?

Varhoma 8:38, 39

XANA u kona un’wana wa hina la nga swi laviki ku rhandziwa? Hakunene ha tsaka loko swirho swa ndyangu ni vanghana va hina va hi rhandza. Kambe lexi vavisaka hileswaku vunghana lebyi vanhu va nga na byona byi nga hela hi ku olova kumbe byi tsana loko nkarhi wu ri karhi wu famba kumbe loko swiyimo swi cinca. Vanhu lava hi va rhandzaka va nga ha hi khunguvanyisa, va hi fularhela kumbe hambi ku ri ku hi bakanyela ekule. Kambe ku ni munhu loyi rirhandzu rakwe ri tshamaka hilaha ku nga heriki. Ndlela leyi Yehovha Xikwembu a va rhandzaka ha yona vagandzeri vakwe yi hlamuseriwe kahle eka Varhoma 8:38, 39.

Muapostola Pawulo u vule leswaku wa “kholwa” leswaku ku hava lexi nga “hi hambanisa[ka] ni rirhandzu ra Xikwembu.” Pawulo a a nga vulavuleli yena ntsena kambe a a vulavulela na ‘hina’—leswi vulaka hinkwavo lava tirhelaka Xikwembu hi ku tshembeka. Leswaku Pawulo a kandziyisa yinhla leyi, u longoloxe swilo swo tala leswi nga ta ka swi nga swi koti ku sivela Yehovha leswaku a rhandza malandza yakwe lama tinyiketeleke.

Hambi ku ri “rifu ni vutomi.” Yehovha u hambeta a va rhandza vanhu vakwe hambiloko va file. Vumbhoni bya leswaku wa va rhandza byi vonaka hileswi a hlayisaka vanhu vo tano emianakanyweni ya yena naswona a nga ta va pfuxa eku feni emisaveni leyintshwa yo lulama leyi taka. (Yohane 5:28, 29; Nhlavutelo 21:3, 4) Nilokoswiritano, ndlela leyi Xikwembu xi va rhandzaka ha yona vagandzeri va xona a yi cinci ku nga khathariseki leswaku va humeleriwa hi yini evuton’wini eka mafambiselo lawa ya swilo.

Hambi ku ri “tintsumi ni tihulumendhe.” Vanhu va nga kuceteriwa hi ku olova hi vanhu lava nga ni vulawuri kumbe hi mimfumo, kambe a swi tano hi Yehovha. Swivumbiwa leswi nga ni matimba leswi nga vonakiki, swo fana ni ntsumi leyi hundzukeke Sathana, a swi nge swi koti ku endla leswaku Xikwembu xi tshika ku rhandza vagandzeri va xona. (Nhlavutelo 12:10) Hambi ku ri tihulumendhe leti nga ha kanetaka Vakreste va ntiyiso, a ti nge swi koti ku cinca ndlela leyi Xikwembu xi langutaka malandza ya xona ha yona.—1 Vakorinto 4:13.

Hambi ku ri “swilo leswi nga laha sweswi ni leswi taka.” Rirhandzu leri Xikwembu xi nga na rona a ri heli loko nkarhi wu ri karhi wu famba. Ku hava nchumu lowu nga endlekaka eka malandza ya xona sweswi kumbe enkarhini lowu taka, lowu nga endlaka leswaku Xikwembu xi tshika ku ma rhandza.

Hambi ku ri “vaungameri.” Pawulo u vulavule hi mavuthu ya le tilweni ku nga “tintsumi” ni vulawuri bya laha misaveni ku nga “tihulumendhe”—kambe sweswi u vulavula hi “vaungameri.” Rito ra Xigriki leri tirhisiweke laha ri ni tinhlamuselo to hambana-hambana. Ku nga khathariseki leswaku nhlamuselo ya kona leyi kongomeke hi yihi, ku ni mhaka yin’we leyi hi nga tiyisekaka ha yona: Ku hava muungameri etilweni kumbe emisaveni loyi a nga sivelaka Yehovha ku rhandza vanhu vakwe.

Hambi ku ri “vutlakuki ni vuenti.” Yehovha u rhandza vanhu vakwe ku nga khathariseki swiyimo swihi ni swihi leswi va nga tikumaka va ri eka swona.

Hambi ku ri “xivumbiwa xihi ni xihi.” Hi marito lawa lama katsaka swivumbiwa hinkwaswo, Pawulo u vula leswaku ku hava nchumu ni wun’we lowu nga hambanisaka vagandzeri vo tshembeka va Yehovha ni rirhandzu rakwe.

Ku hambana ni rirhandzu ra vanhu leri nga tsanaka kumbe ri hela, ndlela leyi Xikwembu xi va rhandzaka ha yona vanhu lava nga ni ripfumelo eka xona a yi cinci; xi va rhandza hilaha ku nga heriki. Hakunene ku tiva leswi, swi hi susumetela ku tshinela eka Yehovha ni ku endla leswi nga ematimbeni ya hina leswaku hi n’wi kombisa leswaku ha n’wi rhandza.