Tshinela Eka Xikwembu

Xana Minkarhi Yin’wana Xikwembu Xa Tisola?

VAAVANYISI 2:11-18

TANIHI vanhu lava nga hetisekangiki, hinkwerhu ha tisola minkarhi yin’wana. Hi xikombiso, hi nga ha tisola endzhaku ka loko hi xiye leswaku hi endle xihoxo. Lexi hlamarisaka, Bibele yi vula leswaku Yehovha minkarhi yin’wana wa tisola. U nga ha tibyela leswaku ‘Kambe Xikwembu xi hetisekile. A xi swi endli swihoxo!’ Kutani, xana Xikwembu xi tisola hi ndlela yihi? Nhlamulo ya xivutiso xexo yi nga hi pfuna ku twisisa mhaka yin’wana leyi hlamarisaka: Yehovha u ni mintlhaveko naswona swiendlo swa hina swi nga khumba ndlela leyi a titwaka ha yona. Xiya marito lama tsariweke eka Vaavanyisi 2:11-18.

Buku ya Bibele ya Vaavanyisi yi hlamusela leswi a swi endleka eIsrayele hi nkarhi lowu a ku ri ni mpfilumpfilu. Tiko a ri tshamisekile eKanana, ku nga tiko leri Xikwembu xi ri tshembiseke Abrahama. Eka malembe-xidzana yo hlayanyana lama landzeleke, tiko ra Israyele a ri hanya hi ndlela leyi katsaka swiyenge leswi swa mune: ku xandzuka, ku tshikileriwa, ku kombela ni ku kutsuriwa. *

Ku xandzuka. Vaisrayele “va [tshike] ku tirhela Yehovha” hikwalaho ko kuceteriwa hi Vakanana naswona va sungule ku landzela swikwembu swin’wana; “va tirhela Bali ni swifaniso swa Axitoreti.” * Ku xandzukela Yehovha hi ndlela yo tano a ku ri vugwinehi. A swi hlamarisi leswi Vaisrayele ‘va hlundzukiseke Yehovha,’ Xikwembu lexi va kutsuleke aEgipta!—Tindzimana 11-13; Vaavanyisi 2:1.

Ku tshikileriwa. Leswi Vaisrayele va hlundzukiseke Yehovha hikwalaho ka leswi va n’wi fularheleke, a nga ha ta va sirhelela. Kutani Vaisrayele a va ta wela “evokweni ra valala va vona” lava a va ta nghena kutani va teka tiko.—Ndzimana 14.

Ku kombela. Leswi Vaisrayele a va ri ekhombyeni lerikulu a va tisola eka swiendlo swa vona swo biha kutani va lava mpfuno eka Xikwembu. Xikombelo xa vona xi nga ha va xi kombisiwe hi marito ya leswaku a va ‘konya hikwalaho ka vatshikileri va vona.’ (Ndzimana 18) Ku kombela eka Xikwembu a ku ri tshamelo-maxelo. (Vaavanyisi 3:9, 15; 4:3; 6:6, 7; 10:10) Xana Xikwembu xi angule njhani?

Ku kutsuriwa. Yehovha u twe ku konya ka Vaisrayele kutani “a tisola.” Rito ra Xiheveru leri hundzuluxeriweke ri va ku “tisola” ri nga ha vula ku “cinca miehleketo kumbe leswi a wu lava ku swi endla.” Buku yin’wana yi ri: “Yehovha u susumetiwe hi ku konya ka vona kutani a cinca xikongomelo xakwe xa ku va xupula kutani a va kutsula.” Hikwalaho ka tintswalo takwe, Yehovha u ‘veke vaavanyisi’ lava a va ta kutsula vanhu vakwe eka valala va vona.—Ndzimana 18.

Xana wa swi tiva leswaku i yini lexi susumeteleke Xikwembu leswaku xi tisola kumbe xi cinca miehleketo ya xona? A ku ri ku cinca ka langutelo ra vanhu va xona. Hi xikombiso: Tatana la nga ni rirhandzu a nga ha tshinya n’wana wakwe loyi a dyoheke kumbexana hi ku n’wi tsona swo karhi. Kambe loko a vona leswaku n’wana yoloye wa tisola, tatana a nga ha endla xiboho xo herisa nxupulo wolowo.

Hi dyondza yini hi Yehovha emhakeni leyi? Hambileswi a hlundzukaka hikwalaho ka swidyoho leswi vanhu va swi endlaka hi vomu, loko va tisola u va komba tintswalo. I swa nkoka ku ehleketa leswaku leswi hi swi endlaka swi nga khumba ndlela leyi Xikwembu xi titwaka ha yona. Ha yini u nga dyondzi ndlela leyi u nga ‘tsakisaka mbilu’ ya Yehovha ha yona? (Swivuriso 27:11) A wu nge pfuki u tisorile.

[Tinhlamuselo ta le hansi]