Tshinela Eka Xikwembu

“Tlakula N’wana Wa Wena”

2 TIHOSI 4:8-37

NCHUMU wun’wana lowu swi nga oloviki ku wu tiyiselela i ku feriwa hi n’wana. Yehovha Xikwembu u ni matimba yo herisa ku vava koloko. Sweswo i ntiyiso hikuva u nyike vavanuna van’wana va le minkarhini ya Bibele matimba yo pfuxa vanhu lava feke. Rungula leri nga eka Tihosi ta Vumbirhi 4:8-37 ri vulavula hi ku pfuxiwa ka xifanyetana xin’wana hi muprofeta Elixa.

Mhaka leyi yi endleke emutini wa Xunemi. Wansati la nga mhika swin’we ni nuna wakwe nkarhi na nkarhi a va kombisa Elixa malwandla hi ku n’wi nyika swakudya ni byetlelo. Hikwalaho ko tlangela, siku rin’wana muprofeta yoloye u byele wansati yoloye a ku: “Hi lembe leri tlhandlamaka enkarhini lowu vekiweke, u ta va u angarhe n’wana.” Wansati yoloye a a nga swi tshembi sweswo, kambe swi endlekile, hiloko a tikuma a ri ni n’wana wa mufana. Lexi twisaka ku vava hileswaku ntsako wakwe a wu tlhaveriwanga hi dyambu. Endzhaku ka malembe ma nga ri mangani xifanyetana xakwe xi khomiwe hi nhloko loko xi ri ensin’wini hiloko xi yisiwa ekaya, laha xi nga fika xi fela “ematsolweni ya [mana wa xona.]” (Tindzimana 16, 19, 20) Wansati yoloye, loyi a a twa ku vava u teke ntsumbu wa n’wana wakwe a ya wu veka esangwini leri muprofeta Elixa a a etlela eka rona.

Leswi nuna wakwe se a a n’wi nyike mpfumelelo, wansati yoloye u lo namba a teka riendzo ra kwalomu ka 30 wa tikhilomitara a ya eNtshaveni ya Karimeli leswaku a ya vitana Elixa. Loko a fika eka yena, a nga rilanga kumbe ku kombisa leswaku u ni gome. Swi nga ha endleka leswaku leswi swi vangiwe hileswi a a swi tiva leswaku Eliya la tlhandlamiweke hi Elixa, u tshame a pfuxa n’wana wa jaha wa noni yin’wana. (1 Tihosi 17:17-23) Xana wansati loyi wa Muxulami a a tshemba leswaku Elixa u ta endla hilaha ku fanaka eka n’wana wakwe? Ku nga khathariseki xivangelo xa kona, a nga pfumelanga ku tlhelela ekaya loko Elixa a nga si pfumela ku famba na yena.

Loko va fika eXunemi, Elixa u nghene ekamareni rakwe a ri swakwe hiloko a vona ntsumbu “esangwini rakwe.” (Ndzimana 32) U khongele Yehovha hi mbilu ya yena hinkwayo. Loko a khoma xifanyetana xexo, “hakatsongo-tsongo nyama ya n’wana yi kufumela.” Hiloko mbilu ya xona yi sungula ku tlhela yi ba! Endzhaku ka sweswo, Elixa u vitane wansati yoloye kutani a n’wi byela mahungu yo tsakisa a ku: “Tlakula n’wana wa wena.”—Tindzimana 34, 36.

Rungula ra ku pfuxiwa ka n’wana wa wansati wa Muxulami ri nyika ntshembo naswona ra chavelela hakunene. Yehovha wa ku twisisa ku vava loku vatswari lava feriweke hi vana va ku twaka. Ku engetela kwalaho, u tshembisa leswaku u ta va pfuxa vana volavo. (Yobo 14:14, 15) Singita ro pfuxa munhu la feke leri endliweke hi Elixa ni hi vanhu van’wana eBibeleni ri kombisa leswi Yehovha a nga ta swi endla emisaveni leyintshwa yo lulama leyi nga ta ta. *

Ntshembo wa le Bibeleni wa ku pfuxiwa ka vafi a wu ku herisi ku vava loku hi ku twaka loko hi feriwe hi varhandziwa va hina. Wanuna un’wana wo tshembeka la nga Mukreste u feriwe hi n’wana wakwe loyi o va swakwe, hiloko a ku: “Ku vava loku ndzi ku twaka a ku nge heli kukondza ndzi tlhela ndzi vona n’wana wa mina.” Anakanya hi ntsako lowu hi nga ta va na wona loko hi tlhela hi hlangana ni varhandziwa va hina lava feke. Ku tiva leswaku u nga tlhela u va vona, swi nga antswisa ku vava loku u ku twaka. Xana u nga swi tsakela ku dyondza swo tala hi Xikwembu lexi hi nyikaka ntshembo lowu wo tsakisa?

[Nhlamuselo ya le hansi]