Loko ndzi velekiwa, vatswari va mina a va ri ni purasi leritsongo eGalicia, le n’walungu vupela-dyambu bya Spain. A ndzi ri n’wana wa vumune eka va nhungu naswona ekaya a ku tsakisa swinene. Hi nkarhi wolowo eSpain, a swi tolovelekile leswaku n’wana un’we endyangwini a va nani. Hikwalaho, mina ni vamakwenu vambirhi hi ve tinani.

Loko ndzi ri ni malembe ya 13, ndzi ye endlwini ya tinani laha sesi wa mina a a tshama kona eMadrid. Ndhawu yoleyo a yi nga tsakisi, vanhu va kona a va nga ri na xinghana kambe a ko va ni swinawanawana ni swikhongelo ntsena. Nimpundzu a hi hlangana ekerekeni leswaku hi anakanyisisa hambileswi minkarhi yin’wana a ndzi tikuma ndzi nga ri na nchumu xo anakanya ha xona. Endzhaku ka sweswo, a hi yimbelela tinsimu ta kereke hi Xilatini hi tlhela hi tlangela Masa. A ndzi nga twisisi nchumu naswona a ndzi vona onge Xikwembu xi le kule swinene na mina. A ndzi tshama ndzi miyerile naswona loko ndzi hlangana ni sesi wa mina a hi pfuxelana ntsena hi ku “A ku dzunisiwe Mariya.” A hi pfumeleriwa ku vulavula timinete ta 30 ntsena loko hi heta ku dya. Vutomi bya kwalaho a byi hambane swinene ni bya le kaya, a ndzi titwa ndzi nga amukelekanga naswona a ndzi tshamela ku rila.

Hambileswi a ndzi nga si tshama ndzi titwa ndzi ri ni vuxaka ni Xikwembu, ndzi endle xiboho xa ku va nani loko ndzi ri ni malembe ya 17. Entiyisweni a ndzo endla leswi a ndzi byeriwa swona kambe ku nga ri khale ndzi sungule ku tivutisa loko Xikwembu xi ndzi hlawurile hakunene. Tinani a ti tshamela ku vula leswaku munhu loyi a titwaka hi ndlela yoleyo, u ta ya etiheleni. Nilokoswiritano, ndlela leyi a ndzi titwa ha yona a yi cincanga. A ndzi swi tiva leswaku Yesu Kreste a a nga tihambanisi ni van’wana kambe a a va dyondzisa a tlhela a va pfuna. (Matewu 4:23-25) Loko ndzi ri ni malembe ya 20, a ndzi nga ha lavi ku va nani. Lexi hlamarisaka hileswaku, nani leyikulu yi ndzi byele leswaku a ndza ha faneleki ku va nani swa antswa ndzi famba. Ndzi vona onge a yi chava leswaku ndzi ta kucetela van’wana kutani ndzi nambe ndzi famba.

Loko ndzi tlhelela ekaya, vatswari va mina va ndzi amukele  hi mandla mambirhi. Kambe leswi ntirho a wu kala laha a hi tshama kona, ndzi ye eJarimani laha buti wa mina a a tshama kona. A a ri eka ntlawa wa Makhomunisi lama yimelaka tiko ra Spain. A ndzi titwa ndzi ntshunxekile loko ndzi ri ni vanhu lava, lava a va lwela timfanelo ta vatirhi ni ta vavasati. Hikwalaho, ndzi ve Mukhomunisi ivi ndzi tekana ni un’wana loyi na yena a a ri eka ntlawa wolowo. A ndzi anakanya leswaku ku nyika vanhu swiphephana swa Vukhomunisi ni ku tereka, a swi ri swinene.

Kambe hi ku famba ka nkarhi ndzi tlhele ndzi hela matimba. Ndzi xiye leswaku Makhomunisi a ma nga endli leswi a ma swi vula. Hi 1971, loko swirho swin’wana swa ntlawa wa hina swi hisa Hofisi ya muyimeri wa tiko ra Spain edorobeni ra Frankfurt, a ndzi nga ha swi tsakeli ku va eka wona. Swi yi hise hileswi a swi lwisana ni tihanyi leti tiko ra Spain a ri ri na tona. Kambe sweswo a ndzi vona ku nga ri ndlela leyinene ya ku lwisana ni mhaka leyi.

Loko ndzi kuma n’wana wa mina wo sungula, ndzi byele nuna wa mina leswaku a ndzi nge he yi etinhlengeletanweni ta Makhomunisi. A ndzi titwa ndzi ri ni xivundza hileswi vanghana va mina va khale a va nga hi endzeli mina ni n’wana wa mina. A ndzi tivutisa loko ndzi ta swi kota ku lulamisa swiphiqo swa vanhu ni leswaku hi xihi xikongomelo xa vutomi.

Hi 1976, Timbhoni timbirhi to huma eSpain ti te ekaya ka mina kutani ti ndzi nyika minkandziyiso leyi sekeriweke eBibeleni. Loko ti ndzi endzela ra vumbirhi, ndzi sungule ku ti vutisa swivutiso swo tala malunghana ni ku xaniseka, xihlawuhlawu ni tihanyi. Ndzi hlamarisiwe hileswi ti tirhiseke Bibele ku hlamula swivutiso hinkwaswo leswi a ndzi ri na swona. Hi ku hatlisa ndzi pfumerile leswaku ti ndzi dyondzisa Bibele.

Eku sunguleni a ndzo lava ku kuma vutivi ntsena. Kambe leswi swi cince loko mina ni nuna wa mina hi sungula ku ya eminhlanganweni eHolweni ya Mfumo ya Timbhoni ta Yehovha. Hi nkarhi wolowo se a hi ri ni vana vambirhi. Timbhoni ti ve ni musa hi ku hi landza ekaya ni ku hi pfuna ku khathalela vana va hina hi nkarhi wa minhlangano. Ndzi sungule ku rhandza Timbhoni ta Yehovha.

Nilokoswiritano, a ka ha ri ni leswi a swi ndzi kanakanisa hi vukhongeri. Ndzi endzele ndyangu wa ka hina eSpain. Papa-ntsongo wa mina la nga mufundhisi u ringete ku ndzi heta matimba leswaku ndzi nga ha dyondzi Bibele. Kambe Timbhoni tin’wana leti a ti tshama kwalaho, ti ndzi pfunile swinene. Ti hlamule swivutiso swa mina hi ku tirhisa Bibele hilaha Timbhoni ta le Jarimani ti endleke hakona. Loko ndzi tlhelela eJarimani ndzi tlhele ndzi sungula ku dyondza Bibele kambe nuna wa mina a a nga ha swi tsakeli ku dyondza Bibele. Hi 1978 ndzi khuvuriwile kutani ndzi va Mbhoni ya Yehovha.

Ku dyondza ntiyiso lowu nga eBibeleni swi ndzi pfune ku vona leswaku vutomi byi ni xikongomelo. Hi xikombiso, 1 Petro 3:1-4 yi khutaza vavasati leswaku va ‘tiveka ehansi’ ka vanuna va vona hi “xichavo lexi enteke” ni leswaku va fanele va tikarhatela ku va ni ‘moya wo rhula lowu nga ni risima lerikulu emahlweni ka Xikwembu.’ Sweswo swi ndzi pfune leswaku ndzi va wansati wa Mukreste tlhelo manana lonene.

Se ndzi ni malembe ya 35 ndzi ri Mbhoni ya Yehovha. Ndza tsaka swinene leswi ndzi gandzelaka Xikwembu swin’we ni vana va mina va mune.