Mpatswa wun’wana lowu humaka exihlaleni xa Vanuatu, lowu a wu endzele miako ya Timbhoni ta Yehovha ya le United States, wu te: “Hi tsundzuka minkarhi yo tsakisa leyi hi veke na yona loko hi endzela eBethele, leyi hi nga ta ka hi nga yi rivali.” Vanhu vo tlula 70 000 lava endzelaka miako leyi lembe ni lembe va titwa hi ndlela leyi fanaka.

Xana u tshame u endzela miako ya le Bethele ya le United States? Loko u nga si tshama u endla tano, u amukeriwile leswaku u endza.

Ntsindza wa Misava Hinkwayo, eBrooklyn, le New York. Valanga kutani u dyondza hi matshalatshala yo hleleka lama endliwaka ku pfuna ni ku seketela ntirho wo chumayela mahungu lamanene emisaveni hinkwayo. U nga tlhela u vona tindhawu timbirhi leti u tivalangisaka hi wexe. Yo sungula yi ni hlokomhaka leyi nge “Vanhu Lava Vitaniwaka Hi Vito Ra Yehovha,” leyi hlamuselaka matimu ya vanhu va Yehovha ku sukela hi lembexidzana ro sungula ku fikela eminkarhini ya namuntlha. Ya vumbirhi yi ri, “Bibele Ni Vito Ra Xikwembu,” leyi hlamuselaka vuhundzuluxeri byo tala bya Bibele lebyi nga ni vito ro hlawuleka ra Xikwembu.

Dyondzo Leyi Humaka Eka Xikwembu, ePatterson, Le New York. Dyondza hi swikolo leswi nga endhawini yoleyo, swo fana ni Xikolo xa Bibele xa Giliyadi xa Watchtower ni Xikolo xa Swirho swa Komiti ya Rhavi ni Vasati va Swona. U ta tlhela u vona minkombiso ni tivhidiyo leti kombisaka ndlela leyi mintirho yi endliwaka ha yona etihofisini, leyi katsaka ku Mpfampfarhuta, ku rhekhoda Rungula leri ngo Yingiseriwa Kunene kumbe Tivhidiyo, Timhaka ta swa Nawu ni tindzawulo ta Ntirho.

Wallkill, Le New York, Ku Kandziyisa Ni Ku Rhumela Minkandziyiso. Valanga u vona ndlela leyi Tibibele ni minkandziyiso leyi sekeriweke eBibeleni yi kandziyisiwaka ha yona, hlanganisiwaka ni ku rhumeriwa ha yona emavandlheni ya le United States, Kharibiya ni le tindhawini tin’wana ta misava.

Ku valanga eBrooklyn swi teka kwalomu ka awara; ePatterson swi teka kwalomu ka tiawara timbirhi naswona eWallkill swi teka kwalomu ka awara ni hafu.

Hi lava tirhaka eBethele eka tindzawulo to hambanahambana. Va swi teka ku ri lunghelo ro seketela ntirho wa hina wo dyondzisa emisaveni hinkwayo. Ku sukela hi May 2014, a ku ri ni vanhu vo tlula 5 000 lava tirhaka eka miako leyi yinharhu naswona vo tlula 3 600 va leteriwe ku valangisa. Ku valangisiwa loku ku endliwa hi tindzimi ta kwalomu ka 40.

I mahala.

A swi bohi. Vo tala lava endzaka a hi timbhoni. Timbhoni swin’we ni lava nga riki Timbhoni va ta twisisa matshalatshala yo hleleka lama endliwaka ku seketela ntirho wa misava hinkwayo wa Timbhoni ta Yehovha.

Wansati un’wana wa Mumoslem la humaka eIndiya u endzele ePatterson. Endzhaku ka loko a valangisiwile, u te: “Ndzi nga swi tsakela ku tirha endhawini leyi. Ndza khensa swinene mi nga ndzi komba xichavo.”

Ina! Ku endza swi nga va ni vuyelo bya kahle swinene eka vana. John, loyi a humaka le United States, u tsale leswi: “Vana lava a va ri eka ntlawa wa hina a va tshamela ku vulavula hi riendzo leri hi veke na rona ku sukela loko hi vuyile laha kaya. Loko hi nga si valanga, a va nga swi tivi leswaku ku tirhiwa njhani eBethele kambe sweswi va tivekele pakani yo ya tirha kona.”

Ina, swa koteka. U nga valanga ematikweni yo tala. Ku kuma ndhawu yo valanga, vona tluka leri nge Rhavi Ni Rungula Ro Valanga. Ha ku amukela hi mandla mambirhi leswaku u ta valanga eka rin’wana ra marhavi ya Timbhoni ta Yehovha.