Siku rin’wana loko Eliso, un’wana wa Timbhoni Ta Yehovha, a fambisa dyondzo ya Bibele ekaya ra wansati loyi a a kombise ku tsakela, ku fike vaendzi vambirhi lava wansati yoloye a a nga va rindzelanga. A ku ri Mufundhisi ni nsati wakwe. Eliso a a swi twile leswaku vatekani lava a va ha ku feriwa hi n’wana wa vona wa jaha.

 Loko Eliso a ha va chavelela hikwalaho ka leswi va ha ku feriwaka hi n’wana wa vona, mufundhisi loyi ni nsati wakwe va sungule ku rila hi xiviti. Kutani, hi ku hlundzuka mufundhisi u te: “A ndzi swi twisisi leswaku hikwalahokayini Xikwembu xi pfumelele ndzingo lowu! Hikwalaho ka yini xi ndzi tekele n’wana wa mina loyi a nga yexe? Ndzi tirhele Xikwembu malembe ya 28 ndzi endla swilo swo tala leswinene kambe sweswi xi ndzi hakela hi ndlela leyi! Hikwalaho ka yini Xikwembu xi dlaye n’wana wa mina?”

 Eliso u hlamusele vatekani lava leswaku Xikwembu a xi tekanga n’wana wa vona. U tlhele a bula na vona hi tinhlokomhaka leti vulavulaka hi nkutsulo, ku pfuxiwa ka vafi ni leswaku hikwalaho ka yini Xikwembu xi pfumelela swilo swo biha swi endleka. Mufundhisi ni nsati wakwe va byele Eliso leswaku u va nyike tinhlamulo ta swivutiso leswi a va khongelela ku kuma tinhlamulo ta swona.

 Vhiki leri landzeleke mufundhisi ni nsati wakwe va ve kona loko Eliso a dyondza ni wansati luya a kombiseke ku tsakela. Eliso ni wansati loyi a va dyondza ndzima leyi nge “Ntshembo Wa Xiviri Hi Varhandziwa Va Wena Lava Feke,” eka buku leyi nge Xana Bibele Yi Dyondzisa Yini Hakunene? Vatekani lava a va hlamula swinene eka dyondzo yoleyo.

 Hi ku famba ka nkarhi havumbirhi bya vona va ve kona enhlengeletanweni ya Timbhoni ta Yehovha eTbilisi le Georgia naswona swi va khumbile swinene loko va vona rirhandzu ro hlamarisa ni vun’we lebyi a byi ri kona, ku nga swilo leswi a ku ri khale va ri karhi va ringeta ku dyondzisa swirho swa kereke ya vona kambe a ko fana ni kwala.