Madián na Marcela va tiphinile hi vutomi byo tsakisa eMedellín eColombia. Ntirho wa Madián a wu holela swi nyawula naswona va kote ku tshama endhawini yo saseka. Kambe leswi a va ri malandza ya Xikwembu, va boheke ku cinca ndlela leyi a va hanya hayona. Loko va hlamusela, va ri: “Hi 2006, hi ye enhlengeletanweni yo hlawuleka leyi a yi ri ni nhlokomhaka leyi nge: ‘Keep Your Eye Simple.’ Mivulavulo yo tala a yi kandziyisa xilaveko xo hanya vutomi byo olova hi xikongomelo xo endla swo tala entirhweni wa Xikwembu. Loko hi huma enhlengeletanweni yoleyo, hi xiye leswaku a hi endla leswi hambaneke ni leswi a swi dyondzisiwa. A hi tshamela ku xava swilo leswi nga bohiki naswona a hi ri ni xikweleti lexikulu lexi a hi fanele hi xi hakelela.”

 Mivulavulo yoleyo yi endle leswaku Madián na Marcela va sungula ku hanya vutomi byo olova. Va ri: “Hi sungule ku hunguta swikweleti. Hi rhurhele eka yindlu leyitsongo, hi xavisa movha wa hina kutani hi xava xithuthuthu.” Nakambe va tshike ku ya etindhawini leti a ti ta va endla va ringeka ku xava swilo. Va sungule ku heta nkarhi wo tala va ri karhi va burisana ni vaakelani va vona hi Bibele. Nakambe va sungule ku va ni vanghana lava nga maphayona yo hlawuleka lava a va heta nkarhi wo tala va ri karhi va dyondzisa van’wana hi Yehovha. a

 Endzhakunyana, Madián na Marcela va teke xiboho xo ndlandlamuxa ntirho wa vona wo chumayela hi ku rhurhela eka vandlha leritsongo leri a ri lava mpfuno. Leswaku va kota ku endla tano, Madián u tshike ntirho. Muthori wakwe a ehleketa leswaku se a ta ha teki kahle hileswi a tshikeke ntirho. Kambe Madián u n’wi vutise a ku: “U hola mali yo tala, kambe xana u tsakile?” U pfumerile leswaku a a nga tsakanga hikuva a a ri ni swiphiqo swo tala leswi a tsandzeka ku swi tlhantlha. Endzhaku Madián u te: “Nchumu wa nkoka evuton’wini a hi mali yo tala leyi u yi holaka. Kambe i ku endla swilo leswi ku tsakisaka. Ku dyondzisa vanhu hi Xikwembu swi endla leswaku mina ni nkatanga hi tsaka naswona hi lava ku khapakhapa hi ntsako hi ku heta nkarhi wo tala eka ntirho lowu.”

 Madián na Marcela va kume ntsako ni ku eneriseka hileswi va nga na swona hikuva ku tirhela Xikwembu hi swona swi nga swa nkoka evuton’wini bya vona. Eka malembe ya 13 lama hundzeke, va tirhe emavandlheni lama nga ni xilaveko lexikulu etindhawini ta le n’walunguvupeladyambu bya Colombia. Sweswi hi vulavulaka, va le ku tiphineni tanihi maphayona yo hlawuleka.