XIDJONDZO 2
Xikwembu I Mani?
1. Hayini hifanele higandzela Xikwembu?
Xikwembu xa ntiyisu hi xona xingamaha swilo hinkwaswu. Axi na masungulu naswona axingevi na makumu. (Tipisalema 90:2) Xahirhandza; hikolahu, xihinyike mahungu yotsakisa lamakumekaka Bibeleni. (1 Timotiya 1:11) Leswi xihinyikeke wutomi, hifanele higandzela xona ntsena. — Lerha Nhlavutelo 4:11.
2. Xana Xikwembu i munhu wa njhani?
Aku na munhu lweyi angake avona Xikwembu hikuva xona i moya, leswivulaka leswaku xitlakukile naswona xi ni wutlharhi lotlula la vanhu. (Yohane 1:18; 4:24) Hambileswo, hingaswikota kutiva wumunhu la xona hi kuvona swilo leswi xiswimaheke. Hi xikombisu, amihandzu ni swiluva swo hambanahambana swihikomba wutlharhi ni lirhandzu la xona. Wukulu la swilo leswi xiswimaheke swotani hi tilu, tinyeleti ni dlambu swihikomba ntamu wa xona. — Lerha Varhoma 1:20.
Hingativa swotala hi wumunhu la Xikwembu loko hidjondza Bibele. Hi xikombisu, lihibyela hi leswi Xikwembu xiswirhandzaka ni leswi xingaswirhandziki, leswi xiswimahaka loko vanhu vayendla swilo leswinene kumbe loko vamaha swilo swobiha. — Lerha Tipisalema 103:7-10.
3. Xana vitu la Xikwembu i mani?
Yesu ate: “Tata wa hina lweyi anga matilweni, vitu la wena alihlawuleke.” (Matewu 6:9) Hambileswi Xikwembu xinga ni mavitaniwela yotala, xi ni vitu lin’we ntsena. Ka tirimi tin’wani vitu leli livitaniwa hi ndlela leyihambaneke; kambe hi xiChangana i “Yehovha.” — Lerha Esaya 42:8.
Ka ma Bibele yotala vitu la Xikwembu lisusiwile ivi kuvekiwa mavitaniwela lamange Hosi kumbe Xikwembu. Kambe loko Bibele litsaliwile, vitu la Xikwembu alikumeka makhambi lamatlulaka 7.000. Phela, hambi nkama lowu Yesu adjondziseke vanhu ntiyisu hi Xikwembu avabyele ni vitu la xona. — Lerha Yohane 17:26.
Sixtira vhidiyu lelinge Xana Xikwembu Xi ni Vitu?
4. Xana Yehovha wakhatala hi hina?
Kufana ni papayi lweyi anga ni lirhandzu, Xikwembu ximaha xokarhi leswaku hitava ni wumundzuku lelinene
Leswi vanhu vanyingi vahluphekaka, xana swikomba leswaku Yehovha i Xikwembu lexinga khataliki hi hina? Ku ni lavavulaka leswaku loko hihlupheka, Xikwembu xohiringa. Kuvula leswo i mavunwa. — Lerha Yakobo 1:13.
Xikwembu xihiyendle hi ndlela ya kukota kutilangela leswi hilavaka kuswiyendla. Xana ahiwutlangeli ntshunxeko wa hina wotilangela kutirhela Xikwembu? (Yoxuwa 24:15) Lexitwisaka kuvava, vanhu van’wani valanga kumahela van’wani swilo swobiha; i hikolahu ka leswo vanhu votala vahluphekaka. Phela Yehovha atwa kuvava loko avona wubihi lolelo. — Lerha Genesa 6:5, 6.
Yehovha i Xikwembu lexikhatalaka hi hina. Xilava leswaku hitikhorisa hi wutomi. Kungalikhale, xitahelisa kuhlupheka hinkwaku ni lava kuvangaka. Kutafikela swoswi, xi ni xivangelo lexitwalaka xopfumelela kuhlupheka. Ka djondzo 8 ya broxura leli hitadjondza hi xivangelo xa kona. — Lerha 2 Petro 2:9; 3:7, 13.
5. Xana hingaliyakisa kuyini wuxaka la hina ni Xikwembu?
Yehovha ahirhamba leswaku hitshinela ka yena hi kumaha xikhongelo. Wakhatala hi mun’wani ni mun’wani wa hina. (Tipisalema 65:2; 145:18) Atiyimisele kuhirivalela. Wayivona minzamu ya hina yolava kumutsakisa, hambiloko hipfa hitsandzeka. Hikolaho, hingaswikota kuva ni wuxaka lelitiyeke ni Xikwembu. — Lerha Tipisalema 103:12-14; Yakobo 4:8.
Leswi Yehovha ahinyikeke wutomi, hifanele himurhandza kutlula ndlela leyi hirhandzaka munhu wihi ni wihi. (Marka 12:30) Loko uya ukombisa lirhandzu la wena ka Xikwembu hi kudjondza leswi engetelekeke ni kumaha leswi xiswirhandzaka, utaya utshinela swinene ka xona. — Lerha 1 Timotiya 2:4; 1 Yohane 5:3.
