Kasi Mbanjani Ŵakuluta Kuchanya?
Ivyo Baibolo likuyowoya
Chiuta wakusora Ŵakhristu ŵakugomezgeka ŵachoko waka, awo para ŵafwa, ŵakuwuskikira kuchanya. (1 Petrosi 1:3, 4) Ndipo para ŵasoleka, ŵakwenera kulutilira kuŵa na chipulikano chakukhora kweniso kuŵa na makhaliro ghawemi kuti ŵazakaŵe ŵakwenelera kupokera chiharo chawo cha kuchanya.—Ŵaefeso 5:5; Ŵafilipi 3:12-14.
Kasi awo ŵakuluta kuchanya ŵamuchita vichi?
Iwo ŵamuteŵetera pamoza na Yesu nga mathemba na ŵasembe kwa vyaka 1,000. (Chivumbuzi 5:9, 10; 20:6) Iwo ŵamupanga “machanya ghaphya,” panji kuti boma lakuchanya, ilo lizamulamulira “charu chapasi chiphya,” panji kuti ŵanthu wose awo ŵazamuŵa pa charu chapasi. Ndipo awo ŵakuluta kuchanya ŵazamovwira ŵanthu kuti ŵaŵe ŵakufikapo nga umo Chiuta wakakhumbiranga pakwamba.—Yesaya 65:17; 2 Petrosi 3:13.
Kasi mbalinga awo ŵazamuwuskikira kuchanya?
Baibolo likulongora kuti ŵanthu 144,000 ndiwo ŵazamuwuskikira kuchanya. (Chivumbuzi 7:4) Pa lemba la Chivumbuzi 14:1-3, tikuŵerenga kuti mpositole Yohane wakawona “Mwana wa mberere wimilira pa Phiri la Ziyoni, ndipo wakaŵa pamoza na ŵanthu 144,000.” Mu mboniwoni iyi, “Mwana wa mberere” wakwimira Yesu uyo wali kuwuskika. (Yohane 1:29; 1 Petrosi 1:19) “Phiri la Ziyoni” likwimira udindo wapachanya wa Yesu na ŵanthu 144,000 awo ŵamulamulira na iyo kuchanya.—Salimo 2:6; Ŵahebere 12:22.
Awo ‘mbakuchemeka na kusoleka’ kuti ŵakalamulire lumoza na Khristu mu Ufumu wake ŵakumanyikwa kuti “ŵakamskambo kachoko.” (Chivumbuzi 17:14; Luka 12:32) Ivi vikulongora kuti ŵanthu aŵa mbachoko chomene pakuyaniska na mberere zose izo Yesu wali nazo.—Yohane 10:16.
Utesi pa nkhani ya awo ŵakuluta kuchanya
Utesi: Ŵanthu wose ŵawemi ŵakuluta kuchanya.
Unenesko: Chiuta wakulayizga umoyo wamuyirayira pa charu chapasi ku ŵanthu ŵawemi ŵanandi.—Salimo 37:11, 29, 34.
Yesu wakati: “Palije munthu uyo wali kukwelera kuchanya.” (Yohane 3:13) Iyo wakalongora kuti ŵanthu ŵawemi awo ŵakafwa pambere iyo wandize pa charu chapasi, nga ni Abrahamu, Mozesi, Yobu, na Davide ŵali kuluta kuchanya yayi. (Milimo 2:29, 34) Kweni ŵakulindilira kuzakawuskika na kuzakakhala pa charu chapasi.—Yobu 14:13-15.
Chiwuka cha kuchanya chikuchemeka “chiwuka chakwamba.” (Chivumbuzi 20:6) Ivi vikulongora kuti pazamuŵaso chiwuka chinyake. Ndipo awo ŵazamuwuskika ŵazamukhala pa charu chapasi.
Baibolo likusambizga kuti para Ufumu wa Chiuta wazakamba kulamulira, “nyifwa yizamuŵakoso yayi.” (Chivumbuzi 21:3, 4) Layizgo ili likwenera kuzakafiskika pano pa charu chapasi, chifukwa kuchanya kulije nyifwa.
Utesi: Waliyose wakusankha yekha kuzakakhala pano pa charu chapasi panji kuluta kuchanya.
Unenesko: Chiuta ndiyo wakusankha Ŵakhristu ŵakugomezgeka awo ŵangapokera “njombe ya ntchemo yakuchanya,” kung’anamura kuti ŵakakhale kuchanya. (Ŵafilipi 3:14) Apa vikulongora kuti palije uyo wali na mazaza ghakusankha yekha uko wakwenera kukhala.—Mateyu 20:20-23.
Utesi: Wose awo ŵali na chilindizga chakuzakakhala pa charu chapasi mbapasi, ndipo mbakwenelera yayi kuluta kuchanya.
Unenesko: Chiuta wakuchema wose awo ŵazamukhala pa charu chapasi kuti “ŵanthu ŵane,” “ŵakusoleka ŵane,” kweniso “awo ŵatumbikika na Yehova.” (Yesaya 65:21-23) Ŵanthu aŵa ŵazamuŵa na mwaŵi wakufiska ivyo Chiuta wakakhumbanga pakwamba. Iwo ŵazamufiska khumbo la Chiuta lakuti ŵanthu ŵakhale na umoyo wamuyirayira mu paradiso pa charu chapasi.—Genizesi 1:28; Salimo 115:16; Yesaya 45:18.
Utesi: Nambara ya 144,000 iyo yikuzunulika mu buku la Chivumbuzi yikwimira chinthu chinyake.
Unenesko: Mbunenesko kuti mu buku la Chivumbuzi mukusangika manambara agho ghakwimira vinthu vinyake, kweni mukuŵaso manambara agho ghakwimira vinyake yayi. Mwachiyelezgero, likuzunura za “mazina 12 gha ŵapositole 12 ŵa Mwana wa mberere.” (Chivumbuzi 21:14) Wonani ukaboni uwo ukulongora kuti nambara ya 144,000 yikwimira nadi chiŵelengero cheneko cha ŵanthu.
Lemba la Chivumbuzi 7:4 likuyowoya kuti “chiŵelengero cha awo ŵakadindika [panji kuti, awo ŵasimikizgirika kuluta kuchanya], chikaŵa 144,000.” Ndipo mavesi ghakulondezgapo, ghakuyowoya za gulu lachiŵiri ilo likuyowoyeka kuti ni: “mzinda ukuru, uwo pakaŵavya munthu wakamanya kuwupenda.” Ŵa “mzinda ukuru” nawo ŵazamuponoskeka na Chiuta. (Chivumbuzi 7:9, 10) Ntheura viŵenge kuti nambara ya 144,000 yikwimira nadi chinthu chinyake, mbwenu chingaŵa chakusuzga kupambaniska magulu ghaŵiri agha. a
Kweniso Baibolo likuti ŵa 144,000 “ŵakagulika pakati pa ŵanthu kuŵa vipambi vyakwamba.” (Chivumbuzi 14:4) Mazgu ghakuti “vipambi vyakwamba” ghakwimira za chiŵelengero chichoko waka cha awo ŵasankhika. Ntheura tingati mazgu agha ghakuyowoya za awo ŵamulamulira pamoza na Khristu kuchanya ndipo ŵazamulamulira ŵanthu wose awo ŵazamukhala pa charu chapasi awo chiŵelengero chawo ntchambura kumanyikwa.—Chivumbuzi 5:10.
a Purofesa Robert L. Thomas, nayo wakalemba ivyo nambara ya 144,000 iyo yikuzunulika pa Chivumbuzi 7:4 yikwimira. Iyo wakati: “Nambara iyo yikuzunulika pa lemba ili yikwimira chinthu chinyake yayi ndipo yikupambana na ivyo vikuzunulika pa chaputara 7:9. Usange nambara ya pa lemba ili yikwimira chinthu chinyake, mbwenu ndikuti manambara ghose gha mu buku ili ghakwimira vinthu vinyake.”—Chivumbuzi 1-7: Buku la An Exegetical Commentary, peji 474.
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Mazgu Ghakuti Kuchanya Ghakung’anamurachi?
Kuyana na umo ghali kugwiliskikira ntchito mu Baibolo, mazgu agha ghakung’anamura vinthu vikuruvikuru vitatu.
VISAMBIZGO VYAKUZIRWA VYA MU BAIBOLO
Kasi Ufumu wa Chiuta Ni Vichi?
Pa uteŵeti wake wa pa charu chapasi, Yesu wakapharazga chomene vya Ufumu wa Chiuta. Kwa vyaka vinandi, ŵalondezgi ŵake ŵalutilira kulomba kuti Ufumu uwu wize.
WUKANI!
Ivyo Baibolo Likuyowoya pa Nkhani ya Kuchanya
Kasi ŵanthu wose ŵawemi ŵakuluta kuchanya para ŵafwa?
MAVESI GHA MU BAIBOLO GHALONGOSOREKA
Lemba la Chivumbuzi 21:1, Lalongosoreka—“Kucanya Kupya na Caru Cipya”
Kasi Baibolo likutovwira wuli kuti tipulikiske ng’anamuro la vesi ili?
IVYO BAIBOLO LIKUSAMBIZGA
Yezgani Kusambira Nase Baibolo
Sangani mwaŵi wakusambira Baibolo munthowa yakudumbiskana na munthu.