Umo Tingalombera—Kasi Lurombo lwa Fumu Pera Ndilo Ndwakuzomerezgeka?
Ivyo Baibolo likuyowoya
Lurombo lwa Fumu lukutilongora waka umo tingalombera kweniso vinthu ivyo tingalomba. Yesu wakayowoya lurombo ulu apo ŵasambiri ŵake ŵakamupempha kuti: “Fumu, mutisambizge kulomba.” (Luka 11:1) Ndipouli, ni Lurombo lwa Fumu pera panji kuti lurombo lwa Adada Ŵithu pera yayi ilo ndwakuzomerezgeka kwa Chiuta. a M’malo mwake, Yesu wakayowoya lurombo ulu kuti chiŵe chiyelezgero cha malurombo agho Chiuta wakutegherezga.
Mu nkhani iyi
Kasi Lurombo lwa Fumu ndwakuti wuli?
Lurombo lwa Fumu ulo lukusangika pa Mateyu 6:9-13, luli kulembeka mwakupambanapambana mu Mabaibolo ghanandi. Wonani viyelezgero viŵiri ivi.
Mang’anamuliro gha Charu Chiphya: “Adada ŵithu imwe muli kuchanya, zina linu lituŵiskike. Ufumu winu wize. Khumbo linu lichitike pano pasi nga nkhuchanya. Mutipe chakurya chithu cha zuŵa ili. Mutigowokere zakwananga zithu, nga umo nase taŵagowokera awo ŵatinangira. Ndipo mungatitoleranga mu kuyezgeka chara, kweni mutiwombore kwa muheni.”
Tumbuka Bible: “Ŵadada ŵitu mwa ŵa kucanya, Litumbikike zina linu. Ufumu winu wize. Khumbo linu licitike pano pasi, nga nkucanya. Mutipe lero kurya kwitu kwa lero. Ndipo mutigowokere mateu ghitu, umo nase taŵagowokerera ŵa mateu ŵitu. Ndipo mungatitoreranga mu kuyezgeka, kweni mutitaske kwa Muheni.” b
Kasi lurombo ulu lukung’anamurachi?
Ivyo Yesu wakasambizganga vikukolerana na Malemba ghose, ntheura tili na chigomezgo chose kuti vigaŵa vinyake vya mu Baibolo vingatovwira kuti tipulikiske makora ng’anamuro la Lurombo lwa Fumu.
“Adada ŵithu imwe muli kuchanya”
Ntchakwenelera nadi kuti timuchemenge Chiuta kuti “Adada ŵithu” chifukwa ndiyo wakatilenga na kutipa umoyo.—Yesaya 64:8.
“Zina linu lituŵiskike”
Zina la Chiuta lakuti, Yehova, likwenera kupika ntchindi kweniso likwenera kuŵa lituŵa panji kuti lapadera. Ŵanthu ŵakovwirapo pa kutuŵiska zina la Chiuta para ŵakuyowoya vyakukhwaskana na makhaliro ghake na kovwira ŵanji kuti ŵamanye khumbo lake.—Salimo 83:18; Yesaya 6:3.
“Ufumu winu wize”
Ufumu wa Chiuta ni boma la kuchanya ilo themba lake ni Yesu. Yesu wakatisambizga kuti tilombenge kuti boma ili lize na kwamba kuwusa pa charu chose chapasi.—Daniyeli 2:44; Chivumbuzi 11:15.
“Khumbo linu lichitike pano pasi nga nkhuchanya”
Nga umo viliri kuti kuchanya kukuchitika viheni yayi ndipo kulije nyifwa, Chiuta wakukhumba kuti ŵanthu pano pa charu ŵakhalenge kwamuyirayira mu mtende kweniso mwakuvikilirika.—Salimo 37:11, 29.
“Mutipe chakurya chithu cha zuŵa ili”
Mu nyengo ya Yesu chingwa ndicho ŵanthu ŵanandi ŵakatemwanga kurya. Tikwenera kukumbuka kuti tikuthemba Mlengi withu kuti watipe vinthu ivyo tikukhumbikwira kuti tilutilire kuŵa na umoyo.—Milimo 17:24, 25.
“Mutigowokere zakwananga zithu, nga umo nase taŵagowokera awo ŵatinangira”
Pa lemba ili mazgu ghakuti “zakwananga” ghangalembekaso kuti ngongoli. (Luka 11:4) Tose tikubuda ndipo tikukhumba chigowokero. Kweni para tikukhumba Chiuta watigowokerenge, nase tikwenera kuŵa ŵakukhumbisiska kugowokera ŵanyithu para ŵatibudira.—Mateyu 6:14, 15.
“Mungatitoleranga mu kuyezgeka chara, kweni mutiwombore kwa muheni”
Yehova Chiuta wakutiyezga kuti tichite chiheni yayi. (Yakobe 1:13) Kweni tikuyezgeka na “muheni,” Satana Dyabulosi, uyo wakumanyikwaso kuti “Muyezgi.” (1 Yohane 5:19; Mateyu 4:1-4) Tikupempha Yehova watovwire kuti tileke kuthera para tayezgeka kuti tileke kumupulikira.
Kasi kuyowoya waka pamtima Lurombo lwa Fumu ndiyo nthowa yekha yakulombera?
Yesu wakayowoya Lurombo lwa Fumu kuti luŵe chiyelezgero. Chikung’anamura kuti mbwenu ndilo tikwenera kuliyowoyanga pamtima yayi. Nakuti pambere wandayowoye lurombo ulu, Yesu wakachenjezga kuti: “Para ukulomba, ungayowoyanga vinthu vimoza pera mwakuwerezgawerezga chara.” (Mateyu 6:7) Apo wakayowoyaso lurombo lwakuwonerapo ulendo unyake, wakagwiliskira ntchito mazgu ghakupambanako.—Luka 11:2-4.
Nthowa yiwemi chomene yakulombera, ndiyo kuyowoya mazgu ghithu na ghithu ghakufumira pasi pa mtima.—Salimo 62:8.
Kasi tikwenera kulomba wuli?
Lurombo lwa Fumu lukutipa waka chiyelezgero cha umo tingalombera kuti Chiuta watipulike. Wonani umo lurombo ulu lukukolerana na mavesi ghanyake gha mu Baibolo agho ghakuyowoya vya lurombo.
Lombani kwa Chiuta pera
Lemba: “Mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta.”—Ŵafilipi 4:6.
Ng’anamuro lake: Tikwenera kulomba kwa Chiuta—kwa Yesu, Mariya panji ŵatuŵa yayi. Mazgu ghakwambilira gha lurombo ulu, ghakuti, “Adada ŵithu,” ghakutisambizga kuti tikwenera kulomba kwa Yehova Chiuta pera.
Lombani vinthu ivyo vikukolerana na khumbo la Chiuta
Lemba: “Kalikose ako tingalomba mwakuyana na khumbo lake, wakutipulika.”—1 Yohane 5:14.
Ng’anamuro lake: Tingalomba chilichose icho takhumba, chikuru chikukolerana na khumbo la Chiuta. Yesu wakasambizga kuzirwa kwa khumbo la Chiuta apo wakasazgamo mu Lurombo lwa Fumu mazgu ghakuti “khumbo linu lichitike.” Kuti timanye vinandi vyakukhwaskana na khumbo la Chiuta ku ŵanthu kweniso charu chapasi, tikwenera kusambira Baibolo.
Lombani ivyo mukufipa navyo mtima
Lemba: “Katundu wako umuthwikiske Yehova, ndipo wakovwirenge.”—Salimo 55:22.
Ng’anamuro lake: Chiuta wakukhwaskika na ivyo vikutifipiska mtima. Nga ni umo Yesu wakazunulira vinthu vyakupambanapambana ivyo tingafipa navyo mtima mu Lurombo lwa Fumu, nase tingalomba vyakukhumbikwa vya zuŵa na zuŵa, kulomba kuti watilongozge apo tikukhumba kusankha chakuchita pa nkhani zakuzirwa, kuti watovwire para tikujumpha mu nyengo zakusuzga, kweniso kuti watigowokere zakwananga zithu. c
a Mwachiyelezgero, Yesu na ŵasambiri ŵake ŵakalombaso malurombo ghanyake agho mazgu ghake ghakapambananga na agho ghali mu Lurombo lwa Fumu.—Luka 23:34; Ŵafilipi 1:9.
b Mabaibolo ghanyake ghakumalizga Lurombo lwa Fumu na mazgu ghakuti: “Kwa imwe kuŵenge ufumu, na nkhongono, na uchindami, muyirayira swii. Ameni.” Mazgu ghakupeleka uchindami kwa Chiuta agha ghakumanyikwa kuti mazgu ghakupeleka uchindami. Ndipouli, buku la The Jerome Biblical Commentary likuti: “Mazgu agha . . . ghakusangika yayi mu mipukutu yakugomezgeka.”
c Awo ŵakukhumba kuti Chiuta waŵagowokere, nyengo zinyake ŵangajiwona nga kuti mbakweneleraso yayi kulomba kwa Chiuta. Kweni Yehova wakuphalira ŵanthena aŵa kuti: “Tiyeni tidumbiskane na kunyoloska vinthu.” (Yesaya 1:18) Iyo wangamukana yayi munthu uyo wakukhumba nadi kuti wamugowokere zakwananga zake.
Panji Mungatemwa Kuŵerengaso Nkhani Izi
GONGWE LA MULINDA
Chifukwa Wuli Tikwenera Kulomba Kwa Chiuta?
Kasi nyengo yinyake mukalombapo kwa Chiuta na kuwona kuti wakazgora yayi lurombo lwinu? Usange ni nthena, manyani kuti muli mwekha yayi.
VISAMBIZGO VYAKUZIRWA VYA MU BAIBOLO
Kasi Chiuta Wakupulika Malurombo Ghose?
Wuli usange munthu wakulomba waka kuti wasange ivyo wakukhumba? Wuli usange mfumu wakuchitira nkhaza muwoli wake, ndipo wakulomba Chiuta kuti wamutumbike?
GONGWE LA MULINDA
Chifukwa Wuli Chiuta Wakuzgora Yayi Malurombo Ghanyake?
Baibolo likutiphalira mtundu wa malurombo agho Chiuta wakuzgora kweniso agho wakuleka kuzgora.
GONGWE LA MULINDA
“Ufumu Winu Wize”—Ŵanthu Ŵanandi Ŵakulomba Lurombo Ulu
Kasi ni mafumbo wuli ghakukhwaskana na Ufumu wa Chiuta agho tikwenera kuzgoreka kuti tipulikiske ivyo lurombo ulu lukung’anamura?