“Ungawopanga yayi, pakuti nili nawe. Ungenjerwanga chara, pakuti ndine Chiuta wako. Nikukhozgenge, enya, nikovwirenge, nikukolenge na woko lane lamalyero laurunji.”—Yesaya 41:10. Mang’anamuliro gha Charu Chiphya.

 “Sono ungopanga, pakuti Ine ndiri nawe, ungofiwanga, chifukwa Ine ndine Chiuta wako; tindikukhozge na kukovwira, enya, tindikufighirire na woko lane la malyero ilo ndakutonda vyose.”—Yesaya 41:10. Tumbuka Bible.

 Yehova a Chiuta wakuŵasimikizgira awo ŵakumusopa mwakugomezgeka kuti waŵawovwirenge, nanga ŵangasangana na suzgo uli.

 “Nili nawe.” Yehova wakuphalira awo ŵakumusopa kuti ŵaleke kopa chifukwa ŵali ŵekha yayi. Iyo wakuwona masuzgo agho ghakuŵawira, wakupulika malurombo ghawo, ndipo wakuŵa nawo pafupi.—Salimo 34:15; 1 Petrosi 3:12.

 “Ndine Chiuta wako.” Yehova wakuŵazikiska mtima awo ŵakumusopa mwakuŵakumbuska kuti mulimose umo vingaŵira iyo ni Chiuta wawo ndipo iwo mbanthu ŵake. Ndipo ŵakwenera kumanya kuti palije icho chingajandizga Chiuta kuti wachitepo kanthu kuŵawovwira.—Salimo 118:6; Ŵaroma 8:32; Ŵahebere 13:6.

 “Nikukhozgenge, enya, nikovwirenge, nikukolenge na woko lane lamalyero laurunji.” Yehova wawelezgapo fundo yimoza katatu kuti wadidimizge kuti mulimose umo vingaŵira waŵawovwirenge ŵanthu ŵake. Wali kugwiliskira ntchito mazgu ghakuti nikukolenge na woko lane lamalyero laurunji kuti walongore umo wakuchitira para ŵanthu ŵake ŵakukukhumbikwira wovwiri. Para munyake wawa, Chiuta wakunyoloska woko lake kuti wamuwuske.—Yesaya 41:13

 Mazgu gha Chiuta, Baibolo ni nthowa yikuru iyo Chiuta wakukhozgera na kovwilira awo ŵakumusopa. (Joshuwa 1:8; Ŵahebere 4:12) Mwachiyelezgero, mu Mazgu gha Chiuta muli vinjeru vyakovwira ku awo ŵakusangana na masuzgo, nga ukavu, ulwari, panji nyifwa ya wakutemweka wawo. (Zintharika 2:6, 7) Chiuta wangagwiliskiraso ntchito nkhongono yake ya mzimu utuŵa kuti awo ŵakumusopa ŵaghanaghanenge makora na kuleka kuhangayika na masuzgo ghawo.—Yesaya 40:29; Luka 11:13.

 Mazgu gha pa lemba ili ghakapembuzga chomene Ŵayuda ŵakugomezgeka awo pamanyuma ŵakatolekera ku wuzga ku Babuloni. Yehova wakayowoyerathu kuti para Ŵayuda ŵazamuŵa pafupi kufwatulika ku wuzga, kuzamuŵa mbiri zakuti mulwani wakwiza kuzakathereska vyaru vyapafupi na kofya Babuloni. (Yesaya 41:2-4; 44:1-4) Apo Ŵababuloni na vyaru vyapafupi ŵakaŵa na wofi chomene na nkhani iyi, Ŵayuda ŵakeneranga kopa yayi, Chifukwa Yehova wakati waŵavikilirenge. Maulendo ghatatu wakaŵasimikizgira kuti “ungawopanga yayi.”—Yesaya 41:5, 6, 10, 13, 14.

 Nangauli mazgu agha pakwamba ghakalutanga kwa Ŵayuda ŵakugomezgeka awo ŵakaŵa ku wuzga ku Babuloni, kweni Yehova Chiuta wakazomerezga kuti mazgu gha pa Yesaya 41:10 ghasungike kuti ghapembuzge wose awo ŵakumusopa mu unenesko. (Yesaya 41:10; 40:8; Ŵaroma 15:4) Iyo wakuŵawovwira, nga umo wakawovwilira ŵateŵeti ŵake ŵa mu nyengo yakale.