Umoyo pa charu chapasi ungaŵapo yayi kwambura zuŵa. Zuŵa likufumiska nkhongono iyo yikovwira kuti makuni ghaŵe na mahamba, maluŵa, na vipasi. Kweniso likovwira kuti makuni ghatorenge maji pasi pa dongo kwizira mu misisi ndipo maji agha ghakufika m’paka ku mahamba. Para zuŵa laŵala maji agha ghakulutaso kuchanya.

Vula ntchawanangwa chapadera chakufuma kwa Chiuta ndipo yikovwira kuti charu chapasi chiŵe na chakurya. Chiuta wakutipa vula kuti pa charu chapasi tiŵenge na nyengo za vipambi, wakutipa vyakurya na kuzuzga mitima yithu na chimwemwe.

Ŵapapi ŵanandi ŵakufipa mtima umo ŵangasangira mbumba zawo chakurya na vyakuvwara. Wonani ivyo Mazgu gha Chiuta ghakuyowoya: “Laŵisiskani viyuni vyamudera, vikuseŵa mbuto chara panji kuvuna nesi kulonga mu nthamba, kweni Awiskemwe ŵakuchanya ŵakuvilyeska. Asi imwe muli ŵakuzirwa kuluska ivyo?”—Mateyu 6:25, 26.

“Sambirani ku maluŵa ghamuthengere umo ghakukulira . . . Kweni nkhumuphalirani kuti, nanga ni [Fumu] Solomoni mu uchindami wake wose wandavwarepo laya lakutowa lakuyana na maluŵa agha. Sono usange Chiuta ndimo wakuvwalikira vyakumera vyamuthengere . . . , asi wavwalikenge chomene imwe?”—Mateyu 6:28-30.

Pakuti Chiuta wakutipa chakurya na vyakuvwara, wangatondeka yayi kutipaso vinyake vyakukhumbikwa pa umoyo. Para tikudangizga Ufumu wake, watitumbikenge para tikulima kuti tisange chakurya kweniso watovwirenge kuti tisange ntchito kuti tigure ivyo tikukhumbikwira pa umoyo.—Mateyu 6:32, 33.

Ntheura tili na vifukwa vyakupulikikwa vyakutemwera Chiuta withu para tikughanaghanira zuŵa, vula, viyuni na maluŵa. Mu nkhani yakulondezgapo tiwonenge umo Mlengi withu wakuyowoyera na ŵanthu.