Nkhababikira ku Spain, ndipo ŵapapi ŵane ŵakaŵa na munda mu muzi wa Galicia kumanjiliro gha dazi. Ndine wacinayi pa ŵana 8. Tikakhalanga makora pakwithu. Pa nyengo iyi ku Spain cikaŵa cacilendo yayi kuti pa mbumba yiliyose, mwana yumoza panji kujumbirapo wanjire sukulu ya usembe panji usisitele. Ntheura, taŵatatu ndivyo tikacita.

Apo nkhaŵa na vyaka 13, nane nkhaluta kukasambira vya usisitele ku Madrid, uko kukaŵa mukuru wane. Malo agha ghakaŵa ghambura kukondweska. Cikaŵa cakusuzga kuŵa na ŵabwezi, kweni tikakhaliranga waka malango, malurombo kweniso kukaŵa masuzgo gha vyacuma. Mulenji uliwose tikalutanga ku chalichi kuti tikasope. Tikayimbanga sumu na kucita Misa ndipo vyose vikacitikiranga mu Cilatini. Palije ico nkhatorangapo ndipo nkhawonanga nga Ciuta wali nane kutali comene. Kanandi pakajumphanga nyengo yitali kwambura kuyowoya na waliyose. Nanga tingakumana na mukuru wane tikayowoyanga vinandi yayi, tikatenge waka ‘Timuwoneni Mariya mutuŵa nkhanira.’ Ŵakatipanga waka maminiti 30 ghakuti tingacezga para tamara kurya. Ivi vikapambana comene na umo tikakhaliranga ku nyumba. Nkhaŵanga na phukwa ndipo kanandi nkhakhaliranga waka kulira.

Apo nkhaŵa na vyaka 17, nkhamba usisitele kweni mwakucicizgika waka. Nkhacita ivi cifukwa waliyose ndivyo wakakhazganga, kweni nkhakayika kuti Ciuta wanisora nadi. Ŵasambizgi ŵithu ŵakatemwanga kutiphalira kuti waliyose uyo wali na maghanoghano ghanthena wamuphya ku moto. Ndipouli, maghanoghano agha ghakalutilira. Nkhamanyanga kuti Yesu Khristu wakajipaturanga yayi, kweni kanandi wakatangwanikanga kusambizga na kovwira ŵanji. (Mateyu 4:23-25) Apo nkhaŵa na vyaka 20, nkhawona kuti palije cifukwa ca kulutilira kuŵa sisitele. Ico cikanizizikaso nchakuti, sisitele mulara wakaniphalira kuti para nkhukayikakayika nchiwemi nifumepo luŵiro. Nkhughanaghana kuti panji wakawopanga kuti ningakopa ŵanyane. Ntheura, nkhajiwelera.

 Ŵapapi ŵakanipokelera kwambura suzgo. Kweni pakuti kukaŵavya kwakuti ungasanga mcere, nkhaluta kwa mudumbu wane ku Germany. Iyo wakaŵa mu gulu ilo likalweranga wanangwa wa ŵanthu ŵa ku Spain. Vikanikondweska ndipo nane nkhajoyina gulu ili. Pamasinda nkhatengwa kwa yumoza wa ŵanthu aŵa. Nkhawonanga kuti nkhucita cinthu ciwemi, ndipo nane nkhagaŵanga mabuku gha gulu ili na kucita nawo viwoneskero.

Kweni nyengo yikati yajumphapo, nkhakhuŵaraso. Nkhawona kuti gulu ili likatondekanga kucita ivyo likayowoyanga. Ivyo vikacitika mu 1971, ndivyo vikanigongoweska comene. Ŵanyamata ŵanyake mu gulu lithu ŵakawocha ofesi yithu. Ŵakacita nthena na cilato ca kucicizga boma la Spain kuti licitenge vinthu mwaurunji. Nkhawona kuti iyi yikaŵa nthowa yiwemi yayi yakunozgera vinthu.

Nati nababa mwana wane wakwamba, nkhaphalira mfumu wane kuti nafumamo mu gulu ili. Nkhaŵanga na phukwa comene cifukwa pakaŵavya mubwezi uyo wakazakaniwona apo nkhaŵa na bonda. Nkhawona kuti umoyo ulije nchito. Ndipo nkhajifumbanga kuti, kasi nchamahara nadi kulimbana na kusintha vinthu mu caru?

Mu 1976, Ŵakaboni ŵaŵiri ŵakutorana ŵakiza pa nyumba ndipo ŵakanipa mabuku ghakulongosora Baibolo. Ŵati ŵizaso, nkhaŵaphulunga na mafumbo. Nkhaŵafumba cifukwa ico tikusuzgikira, kweniso cifukwa ico paliri vinthu vyambura urunji. Nkhazizwa comene kuwona kuti ŵakazgora mafumbo ghose kufuma mu Baibolo. Ntheura nkhazomera kuti ŵanisambizgenge Baibolo.

Pakwamba, vikanikondweskanga waka kusambira. Kweni vinthu vikasintha ine na mfumu wane tati tamba kuluta ku maungano gha Ŵakaboni ŵa Yehova. Pa nyengo iyi tikaŵa na ŵana ŵaŵiri ŵanyamata. Ŵakaboni ŵakatitoranga pakuya ku Nyumba ya Ufumu ndipo ŵakatovwiranga kupwelelera ŵana. Nkhamba kuŵatemwa comene Ŵakaboni ŵa Yehova.

Ndipouli, nkhaŵa kuti nicali kukayikira cisopa cilicose. Apo nkhaluta kukaya ku Spain kukawona ŵanthu, adada ŵacoko awo ŵakaŵa ŵasembe ŵakanigongoweska kuti nisambirenge Baibolo. Kweni Ŵakaboni ŵa Yehova ŵakanovwira comene. Ŵakazgora mafumbo ghane ghose kufuma mu Baibolo nga umo ŵakacitira Ŵakaboni ŵa ku Germany. Nati nawelera ku Germany, nkhalutizga kusambira Baibolo. Nangauli mfumu wane wakaleka kusambira Baibolo, kweni ine nkhawelera nyuma yayi. Ndipo mu 1978 nkhabapatizika kuŵa Kaboni wa Yehova.

Fundo za mu Baibolo zanovwira kumanya cilato ca umoyo kweniso umo ningaŵira na nkharo yiwemi. Mwaciyelezgero, pa 1 Petrosi 3:1-4 pakuciska ŵawoli kuti ‘ŵajilambikenge’ ku ŵafumu ŵawo “na nchindi zikuru,” kweniso kuti ŵaŵe na “mzimu wakufwasa na wakuzika, uwo ngwakuzirwa comene pamaso pa Ciuta.” Fundo izi zanovwira comene kuti nicite makora udindo wane pakuŵa muwoli na mama.

Pajumpha vyaka 35 kufuma apo nkhaŵira Kaboni wa Yehova. Nili wakukondwa comene pakuti nane nili mu gulu la ŵanthu awo ŵakuteŵetera Yehova pa caru cose. Kweniso pa ŵana ŵane ŵankhondi, ŵanayi, wakuteŵetera Ciuta mwakugomezgeka.