Chaka cha 2022 chikukwaniska vyaka 100 kufuma apo Ŵakaboni ŵa Yehova ŵakamba kusangika ku Colombia. a

Mu 1922, Heliodoro Hernández, uyo wakatemwanga chomene kuŵazga Baibolo, wakabwereka magazini ghakupambanapambana gha Gongwe la Mulinda kwa mubwezi wake uyo wakaŵa Kaboni wa Yehova yayi. Mwaluŵiro Heliodoro wakawamo kuti wasanga unenesko ndipo wakamba kuphalirako ŵanyake ivyo wakasambira. Wati wapharazga kwa vyaka viŵiri, wakasangana na Juan Estupiñán, uyo ŵakamba kupharazgira lumoza makani ghawemi. Wose ŵaŵiri ŵakabatizika mu 1932.

Kufuma apo, Mubali Hernández na Estupiñán ŵakapokera mashini ghakuti ŵategherezgerengepo nkhani zakujambulika kale kufuma ku Watchtower Society. Ŵakategherezgeskanga ŵanthu nkhani za mu Baibolo, nga zakuti “The Trinity Unveiled” na “End of the World,” ndipo ŵakenda mu mizi yose ya mu mapiri gha Andes. Kanandi ŵakasangananga na ŵakususka chifukwa cha Tchalitchi la Katolika.

Ŵamishonale ŵakufuma ku sukulu ya Giliyadi ŵakafika mu charu ichi mu 1945. Yumoza wa ŵamishonale aŵa, Mubali Olaf Olson, wakazakayowoya mu nkhani yakulongosora umoyo wake kuti: “Kuno kuli mberere zinandi za Yehova, ndipo tikuwonga kuti wakatituma ise kuti tizakawovwirepo kuzipenja na kuziryeska.”

Kuti ntchito ya kupharazga yilute panthazi ku Colombia, kukajulika ofesi ya munthavi iyo yikamba kugwira ntchito pa May 1, 1946. Mubali Arthur Green, uyo wakaŵa wakwamba kuŵa mulaŵiliri wa munthavi, wakalemba kuti: “Na wovwiri wa mzimu utuŵa wa Yehova, kusopa kutuŵa kwakhazikiskika kuno ku Colombia.”

Pasono, pali Ŵakaboni ŵa Yehova pafupifupi 190,000 awo ŵakupharazga makani ghawemi ku Colombia.

Charu cha Colombia chikumanyikwa chomene chifukwa cha dongo lake lavundira kweniso malibwe gha mtengo wapatali. Kweni unenesko ngwakuti “vinthu vyakuzirwa,” mbanthu awo Yehova wakulutilira kuŵaguzira kwa iyo. Tikukondwa kuwona Yehova wakulutilira kutumbika ntchito yakupharazga iyo ‘yikuzuzga nyumba yake na uchindami.’—Hagayi 2:7.