Ikai. E fakaasi mai i te fakatusatusaga o peluga tusi mua me e seki mafuli eiloa te Tusi Tapu, faitalia te uke o taimi ne toe ‵kopi ei ki luga i mea kolā e ma‵sei vave.

E lau i afe a peluga tusi mua o te Tusi Tapu ko oti ne maua aka. Ne lavea atu me e isi ne nai mea e ‵kese i ei. E fakaasi mai ei me isi ne mea ‵se ne fai i te taimi ne ‵kopi ei. A nisi mea ‵se konei ne mea fo‵liki fua kolā e se mafuli i ei a te uiga o te fekau. Kae e isi ne nisi mea ‵se ne maua aka kae e foliga mai me ne taumafaiga ne fai ke ‵fuli aka ei a te fekau i te Tusi Tapu. Ke mafau‵fau ki mea e lua:

1. I te 1 Ioane 5:7, e ‵fuli i nisi Tusi Tapu mua a pati i ei penei: “i te lagi, te Tamana, te Muna, mo te Agaga Tapu: kae ko latou konei e tasi.” Kae ne fakamaoni aka mai nisi tusitusiga me i pati konei e seai i loto i tusitusiga mua. Ne fatoa faulu fakamuli fua. * Tenā te pogai ne tapale ei a pati konā i nisi ‵fuliga o te Tusi Tapu i aso nei.

2. Ne sae mai fakafia afe taimi a te igoa totino o te Atua i tusitusiga mua o te Tusi Tapu. Kae e uke a ‵fuliga o te Tusi Tapu ko oti ne sui ne latou a te igoa ki tofi e pelā mo “te Aliki” io me ko “te Atua.”

Ke oko mai nei, e uke a tusitusiga ko oti ne maua aka, kae ko faigofie fua ke maua a mea ‵se i ei i lō aso mua. * I fakatusatusaga ne fai ki tusitusiga konei, ne a mea e fakaasi mai ei e uiga ki te ‵tonu o te Tusi Tapu i ‵tou aso nei?

• Ne fai mai te tagata poto ko William H. Green e uiga ki pati i Tusitusiga Epelu (telā e taku foki ko te “Feagaiga Mua”): “Se mea tonu ke fai atu me seai eiloa se ‵fuliga o tusi i aso mua e mafai o fakatusa ki te ‵tonu o te ‵fuliga o te tusi tenei.”

• Ne tusi mai se tino poto i te Tusi Tapu ko F. F. Bruce e uiga ki Tusitusiga Eleni, io me ko te “Feagaiga Fou”: “E sili fakafia atu te ‵lei o fakamaoniga e uiga ki tusitusiga o te ‵tou Feagaiga Fou i lō fakamaoniga ki tusitusiga a tino tusitala i aso mua, e seai se tino e mafai o fakafesili ne ia a te ‵tonu o tusitusiga konā.”

• Ne fai mai a Sir Frederic Kenyon, se tino poto i mea tau tusitusiga o te Tusi Tapu, me e mafai ne se tino o “puke te Tusi Tapu kātoa i tena lima kae fai fakavave atu e aunoa mo te mataku me ko puke i ana lima a te Muna tonu a te Atua, telā ne tuku mai ki a tatou ne se fia tupulaga mai i ana mua i te fia senitenali ko ‵teka, e aunoa mo se mea e galo i ei.”

• Ne tusi ne tino laga tusi Iutaia mo Kelisiano a tala kolā e fakaasi mai ei a mea ‵se ne fai ne tino o te Atua. * (Numela 20:12; 2 Samuelu 11:​2-4; Kalatia 2:​11-​14) E se gata i ei, ne tusi foki ne latou a tala kolā e taku fakamasei ei a te sē faka‵logo o tino Iutaia, kae fakaasi faka‵sau atu i ei a akoakoga ‵se a tāgata. (Hosea 4:2; Malaki 2:​8, 9; Mataio 23:​8, 9; 1 Ioane 5:​21) Mai te ‵tonu o tala ne ‵kopi ne latou, ne fakaasi mai ne tino laga tusi a te lotou tali‵tonu katoatoa mo te lasi o te lotou āva ki te Muna tapu a te Atua.

• E mata, e se fakaasi mai ei me i te Atua, telā ne fakaosofia ne ia te tusiga o te Tusi Tapu i te taimi muamua ka fai foki ne ia ko te fekau i ei ke tumau i te ‵tonu? * (Isaia 40:8; 1 Petelu 1:​24, 25) E se gata i ei, ne manako a ia ke aoga te fekau i ei e se ki tino fua i aso mua, kae ki a tatou foki i aso nei. (1 Kolinito 10:11) Se mea tonu, me “i mea katoa kolā ne tusi i aso mua ne tusi ke akoako ei tatou, me e auala i te ‵tou kufaki mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.”​—Loma 15:4.

• Ne siki mai ne Iesu mo ana soko a pati mai tusitusiga Epelu, kae ne seki fakalotolotolua latou ki te ‵tonu o pati i tusitusiga mua konā.​—Luka 4:​16-​21; Galuega 17:​1-3.