E se fakaaoga i te Tusi Tapu a te pati ko te “faka‵tōga o pepe” i te auala telā e fakauiga ki te tamate fakavave o te pepe e seki fanau mai. Kae e uke a tusi fai‵tau i te Tusi Tapu, e fakaasi mai i ei te kilokiloga a te Atua ki te ola o tino, e aofia i ei a te ola o se pepe e seki fanau mai.

A te ola se meaalofa mai te Atua. (Kenese 9:6; Salamo 36:9) E fakatāua ne ia a ola katoa, e aofia i ei te ola o se pepe i loto i te moegatama. Tela la, kafai e tamate ne se tino se pepe e seki fanau mai, a te mea tenā ko te tatino.

Ne fai mai te Tulafono a te Atua ki tino Isalaelu: “Kafai e ‵fusu ne tāgata kae pakia i ei se fafine faitama kae tō tena tama kae e se mate, e ‵tau o toe ‵togi atu ne te tino telā e ‵se a mea kolā ne fakamasei e ‵tusa mo mea kolā e fai mai ne te avaga a te fafine tenā; kae e ‵tau o ‵togi ne ia e auala i famasino. Kafai e mate se tino, ko ‵tau ei mo koe o sui te ola ki te ola.”—Esoto 21:22, 23. *

•  E kamata i te taimi fea a te ola o se tino?

•  E mata, ka fakamagalo ne te Atua a te tino telā ne fakatō tena pepe?

•  E mata, e se ‵lei ke fakatō se pepe māfai ko fakamataku a te ola o te mātua io me ko te pepe?

I te kilokiloga a te Atua, e kamata a te ola o se tino i te taimi e fakafua ei. I tena Muna, ko te Tusi Tapu, e fakasino atu faeloa te Atua ki te pepe e seki fanau mai, e pelā eiloa me se tino matua. Mafaufau ki nisi fakaakoakoga kolā e fakaasi mai i ei me e ‵pau eiloa ki te Atua a te ola o se pepe i loto i te moegatama, mo te pepe telā ko oti ne fanau mai.

• Ne fakaosofia a te Tupu ko Tavita ke fai atu ki te Atua: “Ne kilo mai ou mata ki a au e pelā me se pepe e seki fanau.” (Salamo 139:16) Ne kilo atu a te Atua ki a Tavita e pelā me se tino, kae koi tuai foki eiloa o fanau mai.

• E se gata i ei, ne iloa ne te Atua me e isi se galuega fakapito e ‵tau o fai ne te pelofeta ko Ielemia kae koi tuai o fanau mai tou tagata. Ne fai atu te Atua: “Koi tuai o faite ne au koe i loto i te moegatama ne iloa ne au koe, kae koi tuai o fanau mai koe ne fakatapu ne au koe. Ne fai ne au koe mo pelofeta ki atufenua.”—Ielemia 1:5.

• Ne fakaaoga foki ne Luka, se tokita kae se tino tusitala o te Tusi Tapu, a te pati penā i te ‵gana Eleni, ke fakamatala i ei a te pepe e seki fanau mai, e pelā mo tena fakamatalaga e uiga ki se pepe fou telā ko oti ne fanau.—Luka 1:41; 2:12, 16.

A latou kolā ne faka‵tō olotou pepe e mafai o fakamagalo ne te Atua. Kafai ko talia nei ne latou a te kilokiloga a te Atua ki te ola, e se ‵tau o tō fanoa‵noa malosi latou. “A Ieova e alofa fakamagalo kae alofa atafai . . . E pelā mo te ‵mao o te saegala mai te togala, e penā loa te faka‵mao ne ia o tatou mai i ‵tou amioga solitulafono.” * (Salamo 103:8-12) Ka fakamagalo eiloa ne Ieova a latou katoa kolā e sala‵mō tonu ki olotou agasala mua, e aofia i ei te faka‵tōga o pepe.—Salamo 86:5.

E ‵tusa mo te mea e fai mai i te Tusi Tapu e uiga ki te ola o se pepe telā e seki fanau mai, e se ‵tau o fakaaoga ne se tino e pelā me se fakamasakoga, ke fakatō se pepe māfai e fakamataku ki te ola o te mātua io me ko te pepe.

Kae e a māfai ko tupu se fakalavelave i te taimi e fanau ei se pepe, kae e ‵tau o filifili aka ke fakaola te mātua io me ko te pepe? I tulaga penā, e ‵tau o filifili aka ne tino kolā e aofia i ei a te tino telā e fia fakasao ne latou.