I TE taeao o te Aso Tolu, Ianuali 24, 2018, ne maua eiloa ne te kāiga Peteli i Iunaite Sitete mo Kanata se faka‵pulaga fakapito: A te Taina ko Kenneth Cook, Jr., ko oti nei ne fai mo sui o te Potukau Pule a Molimau a Ieova.

A te Taina ko Cook ne fanau kae ne puti aka i te feitu ki saute o Pennsylvania, U.S.A. Ne tauloto ne ia te munatonu mai se tamaliki o tena vasega mai mua o oti ana akoakoga i te akoga lasaga lua kae ne papatiso i a Iuni po 7, 1980. Ne kamata o kau atu a ia ki te taviniga tumau e pelā me se paenia tumau i a Setema 1, 1982. Mai tua o se lua tausaga ne paenia ei, ne ‵kami tou tagata ki te Peteli, kae ne kamata tena taviniga i te Peteli i Wallkill, New York, i a Oketopa 12, 1984.

Mō se 25 tausaga, ne galue eiloa te taina ko Cook i matagaluega kese‵kese i te fale ‵Lomi Tusi mo te Ofisa i te Peteli. Ne avaga a ia ki a Jamie, i te 1996, kae ne tavini fakatasi atu lāua i te Peteli i Wallkill. I a Tesema 2009, ne toe olo atu a te taina ko Cook mo tena avaga ki te Watchtower Educational Center i Patterson, New York, telā ne ‵tofi aka i ei a te taina ko Cook ke ga‵lue fakatasi mo te Matagaluega Tusitusi. I a Apelila 2016, i te taimi ne toe ‵foki atu ei ki Wallkill mō se taimi toetoe, ne ‵toe avatu foki a te taina ko Cook mo tena avaga ki Brooklyn, New York. Lima masina mai tua, ne toe avatu lāua ke ‵nofo i te laumua o tatou i Warwick, New York. I a Ianuali 2017, ne ‵tofi aka a te Taina ko Cook e pelā me se tino fesoasoani ki te Komiti Tusitusi a te Potukau Pule.