Te Tusi a Mataio 5:1-48
-
LĀUGA I LUGA I TE MAUGA (1-48)
-
Ko kamata o akoako atu Iesu i luga i te mauga (1, 2)
-
Mea fakafia‵fia e iva (3-12)
-
Te masima mo te mainaga (13-16)
-
Ko fakataunu ne Iesu te Tulafono (17-20)
-
Pati fakatonutonu ki te kaitaua (21-26), te mulilua (27-30), te ‵talaga o avaga (31, 32), tautoga (33-37), te toe taui atu (38-42), te alofa ki ou fili (43-48)
-
5 I te taimi ne matea ei ne Iesu te vaitino, fanaka ei a ia ki luga i te mauga; kae i te otiga ne sagasaga ki lalo, ne o‵mai ana soko ki a ia.
2 Tenā ne kamata ei a ia o akoako atu ki a latou, ana muna:
3 “E fia‵fia a latou kolā e iloa ‵lei ne latou olotou manakoga faka-te-agaga,*+ me ka fai mō latou te Malo o te lagi.
4 “E fia‵fia a latou kolā e fanoa‵noa, me ka fakamafanafanagina latou.+
5 “E fia‵fia a latou kolā e loto maulalo,*+ me ka fai mō latou te lalolagi.+
6 “E fia‵fia a latou kolā e fia‵kai kae fiainu+ ki te amiotonu, me ka ma‵kona* eiloa latou.+
7 “E fia‵fia a latou kolā e a‵lofa fakamagalo,+ me ka fakaasi atu a te alofa fakamagalo ki a latou.
8 “E fia‵fia a latou kolā e loto ‵ma,+ me ka matea ne latou te Atua.
9 “E fia‵fia a latou kolā e fakatupu te filemu,*+ me ka taku latou ko tama a te Atua.
10 “E fia‵fia a latou kolā e fakasauagina ona ko te amiotonu,+ me ka fai mō latou te Malo o te lagi.
11 “E fia‵fia koutou māfai e fakatauemu+ kae fakasauagina koutou ne tino,+ kae ‵losi atu a vaegā mea ma‵sei katoa ki a koutou ona ko au.+
12 Ke fia‵fia kae ‵lifu,+ me i te otou taui+ e lasi ‵ki i te lagi, me ne penā foki o fakasaua ne latou a pelofeta kolā ne ‵mua atu i a koutou.+
13 “A koutou ko te masima+ o te lalolagi, kae kafai ko galo te malosi o te masima, e mafai la pefea o toe ‵kona? Ko seai se mea e toe aoga ki ei, na ko te ‵pei atu fua ki tua+ ke lakalaka ne tino.
14 “A koutou ko te mainaga o te lalolagi.+ E se mafai o se matea se fakai māfai e tu i luga i se mauga.
15 E faka‵ka ne tino te moli kae e se tuku mai lalo i se kete,* kae i luga i te tugamoli, ko maina atu ei ki tino katoa i loto i te fale.+
16 Ke penā foki o maina atu te otou mainaga ki tino,+ ko te mea ke mafai o matea ne latou otou galuega ‵lei+ kae ‵viki atu ei ki te otou Tamana telā i te lagi.+
17 “Sa mafaufau i a au ne vau o ofa te Tulafono io me ko muna a Pelofeta. Au ne seki vau o ofa kae o fakataunu faka‵lei.+
18 E tonu, au e fai atu ki a koutou me e faigofie o galo atu te lagi mo te lalolagi kae e se mafai o galo atu te ‵toe mataimanu foliki e tasi io me se vaega o se mataimanu i te Tulafono seiloga ko oti ne fakataunu a mea katoa.+
19 Tela la, so se tino e soli ne ia se fakatonuga foliki e tasi i konei kae akoako atu a nisi tino ke fai penā, ka taku a ia ko te ‵toe tino fatauva i te Malo o te lagi. Kae ko so se tino e fai ne ia a mea konā kae akoako atu foki ne ia, ka taku a ia se tino maluga i te Malo o te lagi.
20 Au e fai atu ki a koutou me kafai e se sili atu te otou amiotonu i lō failautusi mo Falesaio,+ ka se mafai eiloa o ulu atu koutou ki loto i te Malo o te lagi.+
21 “Ne lagona ne koutou me ne fai atu penei ki tino i aso mua: ‘E se ‵tau mo koe o tatino,+ kae ko so se tino e tatino ka tu a ia i te fono fakamasino.’+
22 Kae e fai atu au ki a koutou me i so se tino e tumau tena ita+ ki tena taina ka fakamasino a ia i te fono,* kae ko so se tino e muna masei ki tena taina ka fakamasino a ia i te Fono Maluga; kae ko so se tino e fai atu penei, ‘A koe se tino valea!’ ka ‵pei ki loto i te afi i Kena.*+
23 “Tela la, kafai e avatu ne koe tau meaalofa ki te fatafaitaulaga+ kae masaua ne koe me e isi se mea e ita ei tou taina ki a koe,
24 tuku la tau meaalofa i mua o te fatafaitaulaga, kae fano. Fai muamua ke ‵lei koulua mo tou taina ko foki mai ei koe o ofo atu tau meaalofa.+
25 “Ke vave o faka‵lei te fakalavelave mo te tino telā e isi sena tagi ki a koe, kae koi olo koulua ki te fono, ko te mea ke se tuku atu koe ne te tino i a ia te tagi ki te famasino, kae ko te famasino ki te pulisimani, ko ‵pei ei koe ki loto i te falepuipui.+
26 Au e fai ‵tonu atu ki a koe, ka se mafai o ‵tala mai koe mai konā seiloga ko oti ne ‵togi atu au tupe katoa.*
27 “Ne lagona ne koutou a pati konei: ‘E se ‵tau mo koe o mulilua.’+
28 Kae e fai atu au ki a koutou me ko so se tino e onoono faeloa ki se fafine+ kae e fiafai ki ei ko mulilua a ia i tena loto.+
29 Tela la, kafai ko tou mata fakaatamai e fai ne ia koe ke agasala,* ‵kape kae ‵pei kea‵tea.+ Me e ‵lei atu ki a koe ke galo se vaega e tasi o tou foitino i lō te ‵pei o tou foitino kātoa ki loto i Kena.*+
30 Kafai foki ko tou lima fakaatamai e fai ne ia koe ke agasala, ‵kati kae ‵pei kea‵tea.+ Me e ‵lei atu ki a koe ke galo se vaega e tasi o tou foitino i lō te ‵pei o tou foitino kātoa ki loto i Kena.*+
31 “E se gata i ei, ne fai atu foki penei: ‘So se tagata e ‵tala ne ia tena avaga, ke tuku atu la ne ia ki tou fafine se pepa fakamaoni o te ‵talaga o te avaga.’+
32 Kae e fai atu au ki a koutou me ko so se tagata telā e ‵tala ne ia tena avaga kae seki agasala a ia i amioga fakatauavaga sē ‵tau,* e fai ne ia ke mulilua tena avaga, kae ko so se tagata e avaga ki se fafine ne ‵tala tena avaga ko mulilua foki a ia.+
33 “Ne lagona foki ne koutou me ne fai atu penei ki tino i aso mua: ‘E se ‵tau mo koutou o tauto kae e se fai ne koutou,+ kae ‵tau mo koutou o tausi ki otou tautoga ne fai ki a Ieova.’*+
34 Kae e fai atu au ki a koutou: Ke mo a eiloa ma tauto koutou+ ki te lagi me ko te nofogaaliki tenā o te Atua;
35 io me ki te lalolagi me tenā te koga e tuku ei ana vae;+ io me ki Ielusalema me ko te fakai tenā o te Tupu sili.+
36 Sa tauto ki tou ulu, me e se mafai ne koe o ‵fuli sou laulu e tasi ke ‵kena io me uli.
37 Ke fakauiga fua tau pati ‘Ao’ ki te ao, kae ko tau ‘Ikai’ ki te ikai;+ me i so se mea i tafa o mea konei e maua mai eiloa i te tino masei.+
38 “Ne lagona ne koutou a pati konei: ‘E sui te mata ki te mata kae ko te nifo ki te nifo.’+
39 Kae e fai atu au ki a koutou: Sa ‵teke ki te tino masei, kae ko so se tino e ‵pa ne ia tou kalafou fakaatamai, toe ‵fuli atu ki ei tou suā kalafou.+
40 Kae kafai e manako se tino o ave koe ki te fono ke maua ne ia ou gatu ‵tao loto, tuku atu foki ki ei ou gatu i tua;+
41 kae kafai e isi se tino pule e fakatonu atu ke amo ne koe se amoga i se maila* e tasi, olo mo ia i maila e lua.
42 Tuku atu ki te tino telā e fakamolemole atu ki a koe, kae sa fulitua ki te tino telā e manako o kaitalafu* mai i a koe.+
43 “Ne lagona ne koutou a pati konei: ‘E ‵tau mo koe o alofa ki tou tuakoi+ kae takalialia ki tou fili.’
44 Kae e fai atu au ki a koutou: Tumau i te a‵lofa ki otou fili+ kae ‵talo mō latou kolā e fakasaua atu ki a koutou,+
45 ko te mea ke fai koutou mo tama a te otou Tamana telā i te lagi,+ me e fakamaina mai ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.+
46 Me kafai e a‵lofa koutou ki tino kolā e a‵lofa atu ki a koutou, se a la te taui e maua ne koutou?+ E mata, e se fai foki ne tino ‵tae lafoga a te mea tenā?
47 Kae kafai e fakatalofa atu fua koutou ki otou taina, se a la te mea fakaofoofogia e fai ne koutou? E mata, e se fai foki ne tino o fenua fakaa‵tea a te mea tenā?
48 Tela la, e ‵tau mo koutou o ‵lei katoatoa e pelā mo te otou Tamana i te lagi e ‵lei katoatoa.+
Fakamatalaga mai lalo
^ Io me “latou kolā e ma‵tiva faka-te-agaga.”
^ Io me “agamalu.”
^ Io me “lotomalie.”
^ Io me “uiga filemu.”
^ Io me “se kete e fua ki ei a mea.”
^ Io me “te Sanetulini.”
^ Eleni, “siga io me pakū.”
^ Telā ko te kaitalafu e aunoa mo se pasene.
