E nehenehe outou e piri atu â i te Atua ma te haapii o vai o ˈna e ma te rave i te mau mea no te faaoaoa ia ˈna. Ia na reira outou “e faafatata mai oia ia outou.” (Iakobo 4:8) Te haapapu ra te Bibilia e “aita hoi oia i atea ia tatou tataitahi.”—Ohipa 17:27.

•  Eaha te rave no te ite o vai te Atua

•  Te mau manaˈo hape no nia i te Atua

 A taio i te Bibilia

•  Ta te Bibilia e parau ra: “Te mau Papai moˈa atoa, ua papaihia ïa i raro aˈe i te aratairaa a te varua o te Atua.”—Timoteo 2, 3:16.

•  Auraa: O te Atua te Fatu o te Bibilia. Ua aratai ïa te Atua i te feia papai Bibilia ia papai i to ˈna manaˈo. Maoti teie buka, ua faaite te Atua eaha te huru oraraa ta ˈna e hinaaro no tatou. Ua faaite atoa oia eaha to ˈna mau huru maitatai, mai to ˈna here, ta ˈna parau tia e to ˈna aroha hamani maitai.—Exodo 34:6; Deuteronomi 32:4.

•  Ta outou e nehenehe e rave: A taio te Bibilia i te mau mahana atoa. (Iosua 1:8) A feruri i nia i ta outou e taio ra e a ui ia outou iho: ‘Eaha ta te reira e haapii mai ra ia ˈu no nia i te huru o te Atua?’—Salamo 77:12.

   Ei hiˈoraa, a taio i te Ieremia 29:11 e a ui ia outou iho: ‘Eaha ta te Atua e hinaaro ra no ˈu, te hau aore ra te ati? E Atua tahoo anei te Atua aore ra te hinaaro ra o ˈna ia fanaˈo vau i te hoê oraraa maitai no a muri aˈe?’

 A hiˈo i te mau mea i poietehia

•  Ta te Bibilia e parau ra: “E ite-maitai-hia hoi [to te Atua] mau huru maitatai eita e ite-mata-hia, . . . mai te poieteraahia mai â te taata, no te mea e taa-maitai-hia te reira na roto i te mau mea i hamanihia.”—Roma 1:20.

•  Auraa: Te faaite ra te mau mea ta te Atua i poiete i to ˈna mau huru maitatai, mai te hoê hohoˈa penihia e faaite ra i te huru o te taata peni aore ra te hamaniraa o te hoê matini no nia i te taata hamani. Ei hiˈoraa, te faaite ra te hamaniraa o to tatou roro i te paari o te Atua, oia atoa te mahana e te mau fetia i te puai o te Atua.—Salamo 104:24; Isaia 40:26.

•  Ta outou e nehenehe e rave: A rave i te taime no te hiˈo e no te haapii no nia i te mau mea poietehia. E a ui ia outou iho: ‘Eaha ta te reira e haapii mai ra ia ˈu no nia i te Atua?’ a Papu maitai, eita te mau mea i poietehia e haapii pauroa mai no nia i to tatou Atua poiete. No reira oia i horoa mai ai i te Bibilia.

 A faaohipa i te iˈoa o te Atua

•  Ta te Bibilia e parau ra: “E paruru vau ia ˈna, te taa ra hoi ia ˈna to ˈu iˈoa. E tiaoro oia ia ˈu, e na ˈu e pahono ia ˈna.”—Salamo 91:14, 15.

•  Auraa: Te haapao maitai ra te Atua ra o Iehova i te feia o tei ite i to ˈna iˈoa e o te faaohipa ra i te reira ma te tura. b (Salamo 83:18; Malaki 3:16) Ua faaite te Atua ia tatou i to ˈna iˈoa ma te parau: “O vau o Iehova. O to ˈu iˈoa tera.”—Isaia 42:8.

•  Ta outou e nehenehe e rave: A faaohipa i te iˈoa o Iehova ia paraparau outou no nia ia ˈna.

 A paraparau ia Iehova na roto i te pure

•  Ta te Bibilia e parau ra: “Tei pihai iho Iehova i te feia e tiaoro ra ia ˈna.”—Salamo 145:18.

•  Auraa: E faafatata Iehova i te feia o te pure ra ia ˈna ma te faaroo. E tuhaa te pure o ta tatou haamoriraa e e faaite te reira i to tatou faatura i te Atua.

•  Ta outou e nehenehe e rave: A pure ia Iehova i te mau taime atoa. (Tesalonia 1, 5:17) A faaite ia ˈna eaha te mea e haapeapea ra ia outou e i to outou huru aau.—Salamo 62:8. c

 A faatupu i te faaroo i te Atua

•  Ta te Bibilia e parau ra: “E ore roa te Atua e mauruuru i te taata aita e faaroo to ˈna.”—Hebera 11:6.

•  Auraa: No te faafatata ˈtu i te Atua, e tia ia faatupu tatou i te faaroo ia ˈna. I roto i te Bibilia, e ere noa ïa te faatupuraa i te faaroo i te tiaturiraa e te vai mau ra te Atua. E titauhia ia tiaturi papu ia ˈna, i ta ˈna mau parau fafau e i ta ˈna mau ture aveia. No te faatupu i te hoê auhoaraa maitai e te hoê taata, mea faufaa ia tiaturi tatou ia ˈna.

•  Ta outou e nehenehe e rave: Ua niuhia to tatou faaroo mau i nia i ta tatou i ite. (Roma 10:17) A haapii i te Bibilia e ite ïa outou e e nehenehe outou e tiaturi i te Atua e i ta ˈna mau aˈoraa. E oaoa te mau Ite no Iehova i te haapii i te Bibilia na muri ia outou. d

 A rave i te mea no te faaoaoa i te Atua

•  Ta te Bibilia e parau ra: “Teie . . . te here i te Atua, ia haapao tatou i ta ˈna mau faaueraa.”—Ioane 1, 5:3.

•  Auraa: Tei pihai iho Iehova i te feia o te faaite i to ratou here ia ˈna ma te rave i tei maraa ia ratou no te auraro i ta ˈna mau faaueraa.

•  Ta outou e nehenehe e rave: I roto i ta outou haapiiraa Bibilia, a tapao eaha ta te Atua e au e ta ˈna e ore e au. A ui ia outou iho: ‘Eaha te mau faatanoraa ta ˈu e nehenehe e rave no te faaoaoa i to ˈu Atua poiete?’—Tesalonia 1, 4:1.

 A ite i ta te Atua aupuru ma te pee i ta ˈna mau aˈoraa

•  Ta te Bibilia e parau ra: “A tamata e ia ite outou i te maitai o Iehova.”—Salamo 34:8.

•  Auraa: Te hinaaro ra te Atua ia ite tatou i to ˈna maitai. Ia ite tatou i to ˈna here e ta ˈna tauturu, e hinaaro tatou e faafatata ˈtu ia ˈna.

•  Ta outou e nehenehe e rave: A taio ai outou i te Bibilia, a faaohipa i te mau aˈoraa a te Atua e a ite i te mau haamaitairaa o ta te reira e hopoi mai. (Isaia 48:17, 18) Hau atu, a hiˈo atoa i te mau hiˈoraa o te tahi mau taata ta te Atua i tauturu ia faaruru i to ratou mau fifi, ia haamaitai i to ratou oraraa e to to ratou utuafare e ia ite mai i te hoê oraraa oaoa. e

 Manaˈo hape: Eita ta tatou e nehenehe e ite o vai te Atua.

 Tupuraa mau: Te vai ra te tahi mau mea no nia i te Atua mea fifi ia taa, mai te parau e varua ite-ore-hia te Atua. Tera râ, e nehenehe tatou e ite o vai te Atua. Te parau ra hoi te Bibilia e titauhia ia ite tatou o vai o ˈna no te fanaˈo i te ora mure ore. (Ioane 17:3) Na roto i te mau parau ohie ia taa, te faaite mai ra te Bibilia no nia i te Atua poiete, to ˈna mau huru maitatai, ta ˈna opuaraa no te huitaata e no te fenua e no ta ˈna mau ture aveia. (Isaia 45:18, 19; Timoteo 1, 2:4) Mai tei faahitihia na, te faaite atoa mai ra te Bibilia i te iˈoa o te Atua. (Salamo 83:18) E nehenehe ïa tatou e ite o vai te Atua, oia atoa, e faafatata ˈtu ia ˈna.—Iakobo 4:8.