TUMU PARAU MATAMUA | PARAU HAAVARE NO NIA I TE ATUA
Te parau haavare e mea ino te Atua
TA TE RAHIRAA E TIATURI
“I muri iti noa ˈˈe i te pohe, e pou te mau varua o te taata i rave i te hara pohe i te po auahi, i reira ratou e mauiui ai i te faautuaraa o te po auahi, ‘te auahi mure ore.’” (Catéchisme de l’Église catholique) Ua parau vetahi tia haapaoraa e e vahi tera e faataa-ê-roa-hia ratou i te Atua.
TE PARAU MAU I ROTO I TE BIBILIA
“O tei rave i te hara ra, o te pohe ïa.” (Ezekiela 18:4) Aita “a te feia i pohe ra e parau itea.” (Koheleta 9:5) Mai te peu e e pohe tei hara e aita hoê aˈe mea o to ˈna tino e ohipa faahou ra, e nafea o ˈna e mauiui ai i “te auahi mure ore” aore ra i te faataa-ê-raa i te Atua?
E rave rahi te manaˈo nei e te parau “Hade” o te hoê ïa vahi e haamauiuihia ˈi te taata i te auahi mure ore. Ia au râ i te Bibilia, ua taaihia te reira i te pohe. Ei hiˈoraa, te faahiti ra te Bibilia i te tahi parau tohu no nia ia Iesu: “E ore hoi oe e vaiiho i tau varua i hade [aore ra menema].” (Ohipa 2:27) Mea papu e aita Iesu i haere i te hoê vahi haamauiuiraa a faataa-ê-hia ˈtu ai o ˈna i te Atua, ua pohe noa râ o ˈna.
TE FAUFAARAA IA ITE
E hinaaro anei tatou e haafatata ˈtu i te Atua mai te peu e e mea ino o ˈna? Te parau ra te tahi vahine no Mehiko o Rocío te iˈoa: “I to ˈu tamariiraa, ua haapiihia ia ˈu te parau o te po auahi. E riaria na vau i te Atua a manaˈo atu ai e aita to ˈna e huru maitatai. No ˈu, e riri rahi to te Atua e e mea ino roa atoa.”
Ua taui râ to Rocío manaˈo a ite ai oia i ta te Bibilia e parau ra no nia i ta te Atua mau haavaraa e te tupu i muri aˈe i te pohe. Te na ô ra o ˈna: “Ua topa roa to ˈu hau. Ua haamata ˈtura vau i te tiaturi e te hinaaro mau ra te Atua i to tatou maitai, te here ra oia ia tatou a nehenehe atu ai te taata e here atoa ia ˈna. E au o ˈna i te hoê metua tane o te rave i ta ˈna tamarii na te rima e o te hinaaro i to ˈna maitai.”—Isaia 41:13.
No to ratou riaria i te po auahi, e rave rahi te haamori nei i te Atua ma te faatia ture noa. Eita râ hoi te Atua e hinaaro ia tavini te taata ia ˈna no te riaria. Ua na ô Iesu: “E hinaaro [aore ra here] oe i to Atua ia Iehova.” (Mareko 12:29, 30) Hau atu â, ia papu ia tatou e eita te Atua e rave i te ohipa tia ore, e tiaturi ïa tatou i ta ˈna mau haavaraa no a muri aˈe. Mai ia Elihu, te hoa o Ioba, e parau anaˈe: “Eiaha roa te Puaihope ia parauhia i te rave parau ino!”—Ioba 34:10.
