Бир катап бир кижи оолдан айтырган: «Алдын чоос мөңгүн чоостан ийи катап аар өртектиг деп билбезиң ол бе?» Оол хүлүмзүргеш, харыылаан: «Ийе, билир мен». «Ындыг болза, чүге үргүлчү мөңгүн чоосту шилип алыр кижи сен?» — деп, ол айтырган. Оол: «Бир эвес алдын чоосту шилип аар болзумза, оюн төнүп каар. Мээң чеже мөңгүн чоос чыып алганымны билген болзуңарза, кайгап каар силер!» — деп чугаалаан. Ол оол мерген угаанныг болган.

«Быжырымчалыг бодаар [мерген-угаанны] болгаш бодамчалыг чорукту кадагалап ал... Ынчан сээң орууңга айыыл таварышпас, а будуң чүге-даа илдикпес» — деп Библияда бижээн (У. ч. 3:21, 23). Ынчап кээрге, мерген-угаан деп чүл ол дээрзин, ол ышкаш ону канчаар ажыглаарын билип алыры — айыыл чок чорувуустуң үндезини. Ол чүүл биске алыс шынның оруунга илдикпейн, туруштуг чоруурунга дузалаар.

Мерген угаан — анаа чүгле билиглер биле угаап билир чорук эвес-тир. Билиглерлиг кижи барымдааларны болгаш информацияны чыып чоруур. Угаап билип турар кижи барымдааларның аразында харылзаазын көрүп турар. А мерген угаанныг кижи билиглерни угаап билгеш, амыдыралынга ажыглап турар.

Чижектен көрээлиңер. Библияны өөредип турар кижиңер өөренир дептерни номчааш, утказын дораан билип алган дижик. Кады сайгарып туруңарда, ол шупту айтырыгларга шын харыылап турар. Ол чыыштарже барып, безин сайгарылга үезинде киржип, эки харыыларны берип турар. Бо бүгү ооң өзүп-мандып турарын көргүзүп болур. Ынчалза-даа ону мерген угаанныг апарган деп болур бе? Шуут-ла ындыг деп болбас. Ол анаа чүгле билиглерни дүрген шиңгээдип ап турар чадавас. Ынчалзажок кажан ол билиглерин угаап билип, оларны шын ажыглап тургаш, алыс шынга дүүштүр чурттап эгелей бээр болза, ынчан ол мерген угаанныг апаар. Бир эвес ол эки бодангаш, угаан-сарыылдыг шиитпирлер хүлээп турар болза, ону мерген угаанныг чорукту көргүзүп турар деп болур.

Матфей 7:24—27-де бажың тудуп алган ийи кижиниң дугайында Иисус Христостуң чугаалаан чижээ бар. Оларның бирээзи «угаанныг» болган. Баш бурунгаар боданып тургаш, ол бажыңын даш кырынга тудуп алган. Ол бодамчалыг чорукту илереткен. Элезин кырынга бажың тудары белен, а чарыгдалдары эвээш болур деп, ол бодаваан. Мерген угаанныг бооп, келир үеде чүү бооп болурун эки бодангаш, ол хөделген. Ынчангаш күштүг хат-шуурган эгелей бээрге, ооң бажыңы бузулбаан. Ынчап кээрге, мерген угаанны чедип алгаш, ону канчаар кадагалап ап болур бис?

Бирээде, Михей 6:9-та: «Мерген угаан дээрге... [Бурганның] адындан коргары болгай»  дээн сөстерже кичээнгейиңерни салыңар. Бурганның адындан коргар кижи аңаа хамаарышкан бүгү чүүлдерге, ол ышкаш Ооң негелделеринге хүндүткелдиг хамаарылгалыг. Кижиниң кандыг үзел-бодалдардан туттунуп турарын билбейн чыткаш, ону хүндүлээри болдунмас. Чүгле оозун билип алгаш, ол кижиге бүзүреп, оон өөренип, мерген шиитпирлерни хүлээринге хамаарыштыр ону өттүнүп болур бис. Шиитпирлеривис Иегова-биле харылзаавысче кандыг салдар чедирерин бодап, оларны Бурганның негелделеринге дүүштүр хүлээр болзувусса, мерген угаанныг апаар бис.

Ийиде, Чугаалар 18:1-де сөстерни кичээнгейге ап болур бис. Ында: «Бодун бодаар [аңгыланыр] кижи күзээн чүвезин кылырынче чүткүүр, угаанныг сүмелерге удурланыр» — дээн. Оваарымчалыг болбас болзувусса, Иеговадан база Ооң чонундан ырай берип болур бис. Аңгыланмас дизивиссе, Бурганның адын болгаш Ооң негелделерин хүндүлеп турар улус-биле аралажыр ужурлуг бис. Аргавыс бар болза, Хурал залынче доктаамал барып, аңаа акы-угбалар-биле аралажыр болзувусса эки. Чыышта дыңнап турар бодалдарывыс угаан-чүрээвисче салдар чедирер кылдыр чөпшээрээр ужурлуг бис.

Оон аңгыда чүрээвисте чүү барын Иеговага чугаалаап бээр болзувусса, Аңаа чоок апаар бис (У. ч. 3:5, 6). Библиядан азы Иегованың организациязының үндүрүп турар дептерлеринден номчаан чүүлүвүстүң дугайында ханы боданыр болзувусса, кылган херектеривистиң уржуктары кандыг болурун баш удур билип, шын шиитпирлерни хүлээп шыдаар боор бис. Ол ышкаш кады  бүзүрээн чедишкен акыларның берген сүмелерин хүлээри чугула (У. ч. 19:20). Ынчан мерген угаанга удурланмайн, харын-даа ону чедип алыр бис.

Мерген угаан өг-бүле иштинге эки хамаарылганы кадагалаарынга дузалаар. Библияда: «Кадайы ашаан хүндүлезин» — дээн (Эф. 5:33). Ашаа кадайының хүндүткелин канчаар чаалап ап болур? Бир эвес ашаа кадайының хүндүткелин негеп, кадыг-дошкун боор болза, ол чүнү-даа чедип албас. Кадайы ооң-биле кырышпас дээш, ооң чанынга ону хүндүлеп турар кылдыр алдынар чадавас. Ынчалза-даа ашаа чанынга чок турда, ол бир өскээр алдынар чадавас. Кадайы ону херек кырында хүндүлээр кылдыр, ашаа канчаар алдынарының дугайында боданыр ужурлуг. Бир эвес ол сүлдениң үре-түңнелин илередип, кадайынга ынакшылдыг, чылыг-чымчак хамаарылга көргүзер болза, ол ооң хүндүткелин чаалап алыр. Чугаажок, христиан херээженнер ашактары хүндүткелге төлеп чок-даа болза, оларны дөмей-ле хүндүлээр ужурлуг (Гал. 5:22, 23).

Библияда: «Ашактар... кадайларынга ынак боор ужурлуг» — дээн (Эф. 5:28, 33). Ашааның ынакшылын чидиреринден корткаш, кадайы ооң билир боор ужурлуг, ынчалза-даа ооң сеткилинге кирбес чүүлдерни чажырып болур. Ону мерген угаанныг чорук деп болур бе? Ол бүгүнү ашаа билип кааш, канчаарыл? Ол чүүл оларның аразында харылзаазын кошкадып болур. Ынчалзажок кадайы таарымчалыг үени тып алгаш, шупту чүвени ашаанга ажыы-биле чугаалап бээр болза, ашаа ооң шынчы чоруун үнелеп, аңаа оон-даа ынак апаар.

Бурганның оруктарынга өөредип турар ада-иезин ажы-төл дыңнаар ужурлуг (Эф. 6:1, 4). Ол дээрге ада-ие ажы-төлүнүң чүнү кылыр-кылбазының дүрүмнер даңзызын тургузар дээни ол бе? Мерген угаанныг ада-ие ажы-төлүнден чүнү негеп турарын, ол ышкаш олар дыңнангыр эвес боор болза, оларны кандыг кеземче манап турарын чугаалаарындан аңгыда, чүге ажы-төлү оларны дыңнаар ужурлуун тайылбырлап бээр.

Чижээ, төл авазы азы ачазы-биле хүндүткел чок чугаалажып турар дижик. Бир эвес ада-ие төлче алгырып, хорадаан уу-биле ону кезедир болза, ол бодун куду көрдүрген кылдыр миннип, хагдынчак апарып болур. Ол ада-иезинге хомудап, олардан ырай берип болур.

Мерген угаанныг ада-иелер ажы-төлүн канчаар кезедирин, ол ышкаш кеземчениң оларже кандыг салдар чедирерин бодап чоруур. Хорадап тургаш, төлдү кезедири шын эвес. Ооң орнунга, өскелер дыңнавайн турда, ооң-биле оожум, чымчак чугаалашкаш, Иегованың ону ада-иезин хүндүлеп, черге мөңге чурттазын деп күзеп турарын тайылбырлап болур. Ынчан төл ада-иезин хүндүлеп турары-биле Иегованы хүндүлеп турарын билип каар (Эф. 6:2, 3). Ындыг хамаарылга төлдүң чүрээнге дээштиг болур. Ынчан ада-иези аңаа ынак дээрзин ол билип кааш, оларны оон-даа артык хүндүлеп эгелээр. Бир эвес ону дүвүредиптер айтырыглар тыптып кээр болза, ол ада-иези-биле үлежиринден кортпас боор.

Чамдык ада-иелер төлдү хомудатпас дээш, кезетпейн турар. Ынчалза-даа төл өзүп келгеш, кандыг кижи боорул? Ол Иеговадан коргар боор бе? Бурганның негелделери-биле чурттаары мерген угаанныг деп чүүлдү билип шыдаптар бе? Сеткилиниң ханызындан Иегованың сургаашкынын хүлээп алыр бе? Азы аңгыланып, Иегованы херекке албас боор бе? (У. ч. 13:1; 29:21).

Ус-шевер даш чонукчузу чүнү кылыр деп турарын эки билир. Ол анаа-ла дашты чонуп орар болза, оон чараш дүрзү үнүп келбес болгай. Мерген угаанныг ада-иелер Иегованың негелделерин билип алырынче болгаш оларны ажыглаарынче үени үндүрүп тургаш, Ооң адын хүндүлеп турарын көргүзүп чоруур. Олар Иеговадан болгаш Ооң организациязындан аңгыланмайн, мерген угаанныг апарып, өг-бүлезин быжыктырып турар.

Бис хүннүң-не шиитпирлерни хүлээп турар бис. Оларның чамдыызы бүгү чуртталгавысче улуг салдарны чедирип болур. Ынчангаш оларны далаш-биле хүлээген ажыы чок. Ооң орнунга эки боданыр болза эки. Ооң уржуктарының дугайында бодаңар. Ынчангаш Иеговадан удуртулганы дилеп, Бурганның мерген угаанын ажыглаңар. Шак ынчаар мерген угаанны кадагалап ап, мөңге чуртталганы чедип ап болур силер (У. ч. 3:21, 22).