1. а) Кыӵе оскиськон сётӥз милемлы Иегова? б) Мае возьматэ Иеговалы оскиськон? (Учке «Валэктонэз».)

 ИЕГОВА оскиськон сётӥз ваньмызлы, кинъёс сое ярато, азьпалан умой улон луоз шуыса. Ӝоген со быдтоз висёнъёсты, куректонэз но кулонэз (Усьт. 21:3, 4). Солэн кивалтэмез улсын зӥбыт-востэм адямиос музъемез райлы пӧрмытозы (Пс. 36:9—11). Соку милям инмысь Атаенымы эшшо но матысь кусыпъёсмы луозы. Туж шумпотоно, та кылсётонъёссэ Инмар быдэстоз шуыса! Но малы оскыны луэ, ваньмыз та озьы ик луоз шуыса? Малы ке шуоно Иегова сётэм кылзэ котьку но быдэстэ. Соин ик ми Инмарлы оскиськыны b быгатӥськомы (Пс. 26:14). Ойдолэ чидаса но шумпотыса возьмаломы, куке Иегова вань кылсётонъёссэ быдэстоз (Ис. 55:10, 11).

2. Кызьы Иегова возьматӥз, сётэм кылзэ быдэстэ шуыса?

² Иегова трос пол возьматъяз ини, сётэм кылзэ быдэстэ шуыса. Кылсярысь, Усьтӥськон книгаын гожтэмын Иеговалэн таӵе кылсётонэз: «вань выжыос, калыкъёс, пӧртэм кылын вераськисьёс, улыос-бечеос пӧлысь» адямиос асьме дыръёсы Иеговалы ужалозы-тыршозы.  Та адямиос нимамын «туж-туж трос калык» шуыса (Усьт. 7:9, 10). Отчы пӧртэм шаеръёсысь адямиос пыро ке но, соос одӥг бадӟым яратӥсь семья кадь (Пс. 132:1; Иоанн 10:16). Со сяна, соос ӟырдыт мылкыдын тодыто. Та калык котьку дась вуоноезлы оскиськонэз сярысь вераны котькинлы, кинъёс соосты кылзо (Матф. 28:19, 20; Усьт. 14:6, 7; 22:17). Тӥ но «туж-туж трос калык» пӧлы пыриськоды ке, тӥледлы вуоноезлы оскон дуно потэ, дыр.

3. Кыӵе ужпумез Шайтанлэн?

³ Шайтанлэн потэ, Инмарлэн ужась-тыршисьёсызлэн вуоноезлы осконзы медаз луы шуыса. Солэн ужпумез — оскытыны милемыз, Иеговалы ми дуно ум потӥське но со аслэсьтыз кылсётонъёссэ уз быдэсты шуыса. Шайтан быгатӥз ке осконмес лябӟытыны, ми кышканлы сётскомы, озьы ик Иеговалы ужамысь-тыршемысь дугдомы, вылды. Ӵапак озьы ик Шайтан тыршиз, Иов но Иеговалы ужамысь-тыршемысь мед дугдоз шуыса.

4. Мае ми эскеромы та статьяын? (Иов 1:9—12).

⁴ Та статьяын ми эскеромы, мар кариз Шайтан, Иов Иеговалэсь мед палэнскоз шуыса. (Лыдӟе Иов книгаез 1:9—12.) Озьы ик ми адӟомы, малы дышетэ милемыз Иовлэн учырез. Со сяна, ми вераськомы, малы тодамы возёно, Иегова милемыз яратэ но аслэсьтыз кылсётонъёссэ одно ик быдэстоз шуыса.

5, 6. Мар луиз Иовен вакчи дыр куспын?

⁵ Иовлэн ваньмыз туж умой вал. Иегова сое эшеныз лыдъяз. Солэн вал бадӟым семьяез. Со туж узыр вал (Иов 1:1—5). Но одӥг нунал куспын Иов ваньзэ тае ыштӥз. Нырысь со ваньбуртэк кылиз (Иов 1:13—17). Собере солэн вань нылпиосыз кулӥзы. Малпалэ гинэ, макем секыт луэ анай-атайёслы, кудъёсыз нылпизэс ышто. Нош макем секыт вал Иовлы но кышноезлы, куке соос тодӥзы, соослэн вань дас нылпиоссы кулӥзы шуыса. Кайгыременыз Иов «аслэсьтыз выл дӥськутсэ кесьыса лэзиз... музъем вылэ уськытскыса йыбырттӥз» (Иов 1:18—20).

⁶ Собере Иов туж секыт висьыны усиз (Иов 2:6—8; 7:5). Куке но адямиос Иовез туж гажазы, со доры визь-кенеш курыны ветлӥзы (Иов 31:18). Нош табере соос солэсь палэнскыны кутскизы. Вын-агайёсызлы, эшъёсызлы но ляльчиосызлы со юрӟым потыны кутскиз (Иов 19:13, 14, 16).

7. а) Кинэ Иов курадӟонъёсыз понна янгыше уськытӥз, вылды, но мае со ӧз кары? б) Учке суредэз. Мар луыны быгатэ котькуд христиан муртэн?

⁷ Шайтан Иовез оскытыны тыршиз, Иеговалы со ярамон ӧвӧл шуыса. Кылсярысь, Инмарлэн тушмонэз лэзиз кужмо тӧлэз корка вылэ, кудаз Иовлэн вань нылпиосыз люкаськемын вал (Иов 1:18, 19). Озьы ик со лэзиз инмысь тылэз, кудӥз Иовлэсь уллёоссэ но пудо возьмасьёссэ быдтӥз (Иов 1:16). Оло нош, Иов малпаз: «Тӧл но тыл инмысь васькизы бере, сое Иегова лэзиз. Мон солэсь вожзэ поттӥ, луоз?» Кыӵе гинэ малпанъёсыз Иовлэн медаз луэ, инмысь Атаез сярысь со номыр уродзэ ӧз вера. Со тодаз возиз ваньзэ умойзэ, мае лэсьтӥз со понна Иегова. Соин ик Иов малпаз, Инмарлэсь умойзэ но, уродзэ но басьтыны кулэ  шуыса. Со вераз: «Кузё-Инмарлэн нимыз данлыко мед луоз!» (Иов 1:20, 21; 2:10). Туж секыт дыръя но Иов Инмарлы оскымон кылиз. Но Шайтан озьы гинэ ӧз сётскы.

8. Мар эшшо Шайтан кариз на, Иовлэсь осконзэ лябӟытон понна?

⁸ Шайтан эшшо таӵе амал кутӥз на: Иовлэн куинь тодмоосыз пыр со Иовез оскытыны кутскиз, со номырлы ярасьтэм адями шуыса. Та пиосмуртъёс лыктӥзы но Иовез янгыше уськытыны кутскизы, со сьӧлыко но курадӟонъёсыз понна ачиз янгыш шуыса (Иов 22:5—9). Соос Иовез оскытыны малпазы, улонэз ӵоже со трос умойзэ лэсьтӥз ке но, Инмарлы со нокыӵе но уг поты шуыса (Иов 4:18; 22:2, 3; 25:4). Озьы ик соос Иовлы малпан пыӵатыны тыршизы, Инмар сое уг яраты, со сярысь уг сюлмаськы но солы ужан-тыршон нокыӵе пайда уг вайы шуыса. Та куинь пиосмуртъёслэн кылъёссы Иовлэсь осконзэ чылкак лябӟытыны быгатӥзы.

9. Мар юрттӥз Иовлы юн но кужмо луыны?

⁹ Пуктэ син азяды, макем секыт вал Иовлы. Висемезлы чидатэк, со пуке пень вылын (Иов 2:8). Одӥг дыре ик со трос шуг-секытъёсын пумиськоно луиз. Со вань нылпиоссэ ыштӥз. Ваньмыз та сэрен Иовлэн сюлмыз ик куректӥз. Кӧня ке нунал ӵоже Иов пал кыл но поттыны ӧз быгаты. Со шыпыт улӥз бере, солэн «эшъёсыз» малпазы, дыр, со Инмарезлэсь но палэнскиз шуыса (Иов 2:13—3:1). Но со озьы ӧй вал. Кыӵе ке но дыре Иов йырзэ ӝутӥз но эшъёсызлэн синмазы ик учкыса вераз: «Кулытозям мон аслэсьтым дун-шектэм луонме ватыса уг возьы» (Иов 27:5). Мар юрттӥз Иовлы юн но кужмо луыны? Солы чидантэм секыт вал ке но, со  вуоноезлы оскиськыса улӥз. Со возьмаз, Инмар курадӟонъёсызлы пум поноз шуыса. Иов тодӥз: кулӥз ке но, Иегова сое улӟытоз (Иов 14:13—15).

10. Малы дышетэ милемыз Иовлэн учырез?

¹⁰ Иовен луэм учыр возьматэ: Шайтан уг быгаты милемыз Иеговалэсь палэнтыны. Озьы ик Иегова туж умой тодэ, маин милемлы пумиськоно луэ. Ойдолэ эшшо эскеромы на, малы дышетскыны луэ Иовлэн учырысьтыз.

11. Мар луоз, ми азьланяз но Иеговалы оскиськимы ке? (Иаков 4:7).

¹¹ Иовлэн улонэз возьматэ: ми азьланяз но Иеговалы оскиськимы ке, котькыӵе шуг-секыт пыр потыны быгатомы но Шайтанлы ум сётске. Соку, кызьы вера Библия, Шайтан ми дорысь бызьыса кошкоз. (Лыдӟе Иаковлэсь 4:7.)

12. Кызьы улӟытонлы оскон Иовлы юрттӥз?

¹² Милемлы юн оскыны кулэ, кулэмъёсты улӟытон луоз шуыса. Кызьы ми эскеримы кылем статьяын, Шайтан милемыз кулонэн кышкатэ, ми Инмарлэсь мед куштӥськомы шуыса. Иовлэн учыраз кадь ик, со вера: аслэсьтыз улонзэ утён понна, адями номыре но уз жаля, Инмарен кусыпъёссэ но. Но Шайтан туж янгыша. Кулымон секыт дыръёсы но Иов Иеговалы оскымон кылиз. Со юн оскиз: Иегова туж ӟеч, соин ик со ваньзэ тупатоз. Та малпан Иовез туж юнматӥз. Со оскиз, кулоно ке но луиз, Иегова сое улӟытоз шуыса. Иов туж зол оскиз улӟытонлы. Ми но улӟытонлы оскимы ке, кулонлэсь кышкан уз люкеты милемлы Иеговалы оскымон кыльыны.

13. Малы милемлы тодыны кулэ Шайтанлэсь амалъёссэ?

¹³ Туннэ Шайтан таӵе ик амалэз кутэ. Милемлы умой тодыны кулэ солэсь амалъёссэ. Висъялэ саклыктэс, кызьы со янгыше уськытӥз: «Аслаз улонэз понна адями [Иов гинэ ӧвӧл] сётоз ваньзэ, маиз солэн вань» (Иов 2:4, 5). Мукет кылъёсын вераса, Шайтан вераз, ми Иеговаез ум яратӥське но секыт дыръёсы солэсь палэнскомы шуыса. Шайтан милемыз оскытыны тырше: Инмар милемыз уг яраты но ми ноку ум быгатэ сое шумпоттыны. Ми Шайтанлэсь ужпумъёссэ тодӥськомы бере, ми ноку но ум оске солэн пӧяськемезлы.

14. Мае возьматыны быгато шуг-секытъёс? Вералэ пример.

¹⁴ Шуг-секытъёс дыръя ми асьмеды умойгес тодыны быгатӥськомы. Шуг-секытъёс, кудъёсыныз Иов пумиськиз, юрттӥзы солы тырмымтэоссэ адӟыны но соосты тупатыны. Кылсярысь, со валаз, солы зӥбыт-востэм сям уг тырмы шуыса (Иов 42:3). Шуг-секытъёс милемлы но ляб палъёсмес адӟыны юртто. Николай c, кудзэ, урод тазалыкез шоры учкытэк, пытсэтэ пуктӥзы, вера: «Пытсэт — со рентген аппарат кадь, кудӥз христиан муртлэсь сямъёссэ возьматэ, вань-а соос, ӧвӧл-а». Ляб интыосмес адӟыса, ми соосты тупатыны быгатӥськомы.

15. Кинэ милемлы кылзоно но малы?

¹⁵ Тушмонъёсмес интые, Иеговаез кылзыны кулэ. Куке Инмар Иовен вераськиз, Иов сое сак кылзӥз. Вераны луоз, Иегова Иовлы шуиз: «Учкы кылдытэмъёсы шоры. Тон адӟиськод-а, мон туж  кужмо шуыса? Мон туж умой тодӥсько ваньзэ, маин тыныд пумиськоно луэ. Эн малпа, мон тонэ вунэтӥ шуыса». Иовлэн кылъёсысьтыз адӟиське, Иеговалэн ӟечлыкез понна со туж тау кариз шуыса. Иов вераз: «Тон сярысь мон пельыным кылӥ вал, нош табере мынам синъёсы но Тонэ адӟо ни» (Иов 42:5). Ку Иов вераз та кылъёсты? Пень вылын пукыкуз, вылды. Солэн мугорыз гижлочерен шобырскемын вал, нош сюлмыз нылпиосыз кулэмен куректыса улӥз. Иовлэн югдурез воштӥськемын ӧй вал на ке но, Иегова Иовез оскытӥз, сое яратэ но дунъя шуыса (Иов 42:7, 8).

16. Мар сярысь вунэтоно ӧвӧл шуг-секытъёс дыръя? (Исаия 49:15, 16).

¹⁶ Туннэ но адямиос милемыз ултӥяса возё. Тушмонъёсмы милесьтым но организацимылэсь ӟеч нимзэ саптаны тыршо но ми сярысь уродзэ верало (Матф. 5:11). Но Иовлэн учырез возьматэ: Иегова юн оске, шуг-секытъёс дыръя ми солы оскымон луомы шуыса. Инмысь Атаймы милемыз туж яратэ но ноку уз кельты. (Лыдӟе Исаиялэсь 49:15, 16.) Инмарлэн тушмонъёсыз кыл вӧлдыса уло. Мар гинэ соос медам вералэ, эн кылзэ соосты! Турциысь Джеймс агайлэн семьяез туж бадӟым шуг-секытъёс пыр потӥз. Со вера: «Ми валамы, Инмарлэн калыкез сярысь уродзэ кылзӥмы ке, ми лябӟомы шуыса. Соин ик ми саклыкмес висъямы осконлы, кудзэ Иегова сётэ, озьы ик азьланяз но ӟырдыт мылкыдын тодытыны тыршимы. Та юрттӥз милемлы шумпотонмес  ыштытэк улыны». Иов сямен, ми Иеговаез кылзӥськомы. Соин ик тушмонъёсмылэн урод кылъёссы вуоноезлы осконмес лушканы уз быгатэ.

17. Малы тӥ дышетскыны быгатӥськоды Инмарлы оскымон пиосмуртъёслэсь но кышномуртъёслэсь, кудъёсыз сярысь вераське Еврейёслы 11-тӥ люкетын?

¹⁷ Иов сяна, Иеговалэн вань на мукет ужась-тыршисьёсыз но, кудъёсыз шуг-секытъёслэсь ӧз кышкалэ но солы оскымон кылизы. Апостол Павел еврейёслы гожтэтаз вера «пилем мында адӟисьёс-ивортӥсьёс» сярысь, кудъёсыз Инмарлы оскымон кылизы (Евр. 12:1). Ваньзы соос бадӟым шуг-секытъёс дыръя но Иеговалэсь кылзӥськыса улӥзы (Евр. 11:36—40). Соос ас синмынызы ӧз адӟе ке но, кызьы Иегова кылсётонъёссэ быдэстӥз, соослэн чидамзы юнме ӧй вал. Соос быдэсак Инмарлы оскиськизы но тодӥзы, Иеговалы ярамон луо но Инмар сётэм кылзэ одно ик быдэстоз шуыса (Евр. 11:4, 5). Соослэсь адӟем карыса, ми но быгатомы Иеговалы оскиськыса улыны.

18. Мар карыны тӥляд мылкыдды вань? (Еврейёслы 11:6).

¹⁸ Та дуннеысь адямиос асьсэды уродгес но уродгес возё (2 Тим. 3:13). Шайтан Инмарлэн калыкез вылэ урдскылэмысь уг дугды. Соин ик ми трос шуг-секытъёсын пумиськомы на, вылды. Но «асьмеос улэп Инмарлы оскиськомы» (1 Тим. 4:10). Ойдолэ вань кужмысьтымы солы ужаломы-тыршомы! Со, кызьы Иов бакель каремын вал, оскытэ милемыз, «Кузё-Инмар ӟеч сюлэмо, ваньзэ гажась-жалясь» шуыса (Иак. 5:11). Иов сямен, Иеговалы оскымон луэ но эн вунэтэ: «Ассэ утчасьёсты» Иегова одно ик бакель кароз шуыса! (Лыдӟе Еврейёслы 11:6.)