Одӥг эскеронъя, Америкаын улӥсь быдэ вуэм адямиос пӧлысь 80 процентэз ялан вӧсясько, но соос пӧлысь ӝыныез гинэ нуналлы быдэ вӧсясько. Куд-огъёсызлэн юанзы кылдылӥз, луоз: «Вӧсяськон — со астэ буйгатон гинэ яке со эшшо кыӵе ке пайда вае на?»

•  Мар со сыӵе вӧсяськон?

•  Кылзэ-а Инмар вӧсяськонъёсты?

•  Мар сярысь мон вӧсяськыны быгатӥсько?

•  Мар верало огъёзъёсыд?

Вӧсяськон — со Кылдытӥсен вераськон. Малпалэ гинэ, Иегова адямиослэсь котьма ласянь умойгес луэ ке но, со «ваньмылы асьмелы матын улэ» (Апостолъёслэн ужъёссы 17:27). Со сяна, Библиын вань таӵе ӧтён: «Инмарлы матэ кариське, Со но тӥляд матады лыктоз» (Иаков 4:8).

Кызьы Инмарлы матэ кариськоно?

• Нырысетӥез, вӧсяськыса — озьы тон Инмарен вераськиськод.

• Кыкетӥез, Библиез эскерыса — озьы Инмар тонэн «вераське».

Сыӵе вераськон — вӧсяськыса но Библиез эскерыса — юрттоз тыныд Инмарен юн эшъяськыны.

«Иеговаен, Вылысь Инмарен, вераськыны, солы малпанъёстэ усьтыны луонлык — адями понна со тужгес но бадӟым дан» (Джереми).

«Куке мон, Иеговалы вӧсяськыкум, сюлэмме усьтӥсько, мон солы матэгес луисько кадь» (Миранда).

Тон Инмарлы оскиськод ке но, озьы ик солы вӧсяськиськод ке но, куддыръя оскыны секыт, со тонэ зэмзэ ик кылзэ шуыса. Озьы ке но Библиын гожтэмын, Иегова вӧсяськемез кылэ шуыса (Псалтирь 64:3). Со сяна, отын гожтэмын: «Вань сюлмаськонъёстэс Со доры вае». Малы? «Уго Со тӥ сярысь сюлмаське» (1 Пётр 5:7).

Мар сярысь малпаськоно. Тон матысь эшъёсыныд ялан вераськиськод ук? Ӵапак озьы ик тон быгатӥськод Инмарен но вераськыны. Котьку солы вӧсяськы, Иегова нимызъя вазиськыса (Псалтирь 85:5—7; 87:10). Зэмзэ вераса, Библиын таӵе ӧтён вань: «Дугдылытэк вӧсяське» (1 Фессалоникаослы 5:17).

«Вӧсяськон — со инмысь Атаеным вераськон, куке мон солы сюлэмме усьтӥсько» (Мойзе́с).

«Мон Иеговаен ваньмыз сярысь пыр-поч вераськисько: озьы, кызьы ӵем дыръя анаеным яке матысь эшеным вераськисько» (Карен).

Библиын гожтэмын: «Номыр понна но эн сюлмаське, но ялан вӧсяськыса, тау карыса, Инмар азьын мар куронды вань, курелэ» (Филиппыослы 4:6).

Возьматэ-а со, вӧсяськыку шуг-секытъёс сярысь вераны луэ шуыса? Одно ик луэ! Библиын таӵе но кылъёс вань: «Сюлмаськонъёстэ Кузё-Инмар кие сёт, Со тонэ утёз-вордоз» (Псалтирь 54:23).

Валамон, вӧсяськыку шуг-секытъёс сярысь гинэ верано ӧвӧл. Шантель нимо егит кышномурт вера: «Уз луы вераны, мон Иеговаен юн эшъяськисько шуыса, юрттэт курыса гинэ солы вӧсяськи ке. Мон малпамъя, нырысь Инмарез тау кароно. Нош малпано ке, сое тау карон понна, мынам трос мугъёсы вань».

Мар сярысь малпаськоно. Мар понна тынад Инмарлы тау шуэмед потэ? Быгатӥськод-а тон вераны куинь мугъёсты, кудъёсыз понна туннэ Иеговаез тау каремед потэ?

«Вӧсяськыку Иеговалы тау шуыны луэ мар ке но огшорыез понна но, кылсярысь, туж чебер сяська адӟем понна» (Анита).

«Малпаськы, Инмарлэн кыӵе кылдытэмез тонэ тужгес но паймытэ, яке Библиысь кыӵе кылбур тынад сюлмад ик пыре. Собере со понна Иеговалы тау шу» (Брайан)