خۇدا بىلەن دوست بولۇش ئۈچۈن نېمە قىلسام بولىدۇ؟
35-باب
خۇدا بىلەن دوست بولۇش ئۈچۈن نېمە قىلسام بولىدۇ؟
جېرېمى بېشىدىن ئۆتكۈزگەن ئېغىر كۈنلەردىن كېيىن خۇدا بىلەن دوست بولۇشنىڭ ئەھمىيىتىنى چۈشەنگەن ئىدى. ئۇ: «12 يېشىمدا دادام بىزنى تاشلاپ كەتتى. بىر كۈنى كەچتە مەن دۇئادا يەھۋا خۇدادىن ئۇنى ئۆيگە قايتۇرۇشنى يالۋۇرۇپ سورىدىم»،— دەيدۇ.
چۈشكۈنلۈككە چۈشكەن جېرېمى مۇقەددەس كىتاب ئوقۇشقا باشلىدى. ئۇ زەبۇر 10:14-ئايەتتىكى سۆزلەرنى ئوقۇغاندىن كېيىن ئىنتايىن تەسىرلەندى. بۇ ئايەتتە يەھۋا خۇدا توغرۇلۇق شۇنداق دەپ يېزىلغان: «دەردمەنلەر ئۆزلىرىنى ساڭا ئامانەت قىلىدۇ؛ چۈنكى سەن يىتىم-يېسىرلەرگە يار-يۆلەك بولۇپ كەلگەنسەن». جېرېمى ئېسىگە ئېلىپ: «مەن يەھۋانىڭ مېنىڭ بىلەن شەخسەن سۆزلىشىۋاتقانلىقىنى ھېس قىلدىم. خۇددى ئۇ ماڭا مەن سېنىڭ داداڭ ۋە ساڭا يار-يۆلەك بولۇمەن دەپ مېنى ئىشەندۈرگەندەك بولدى. خۇدادىن باشقا كۆيۈمچان ئاتا يوقتۇر»،— دەيدۇ ئۇ.
بەلكىم، سىزنىڭ ئەھۋالىڭىز جېرېمىنىڭ بېشىدىن ئۆتكۈزگەنلىرىگە ئوخشىسۇن ياكى ئوخشىمىسۇن، يەھۋا ئۇنىڭ دوستى بولۇشىڭىزنى خالايدۇ. مۇقەددەس كىتابتا: «خۇداغا يېقىنلىشىڭلار ھەم ئۇمۇ سىلەرگە يېقىنلىشىدۇ»،— دەپ يېزىلغان (ياقۇپ 4:8). بۇ سۆزلەرنىڭ مەنىسى ھەققىدە ئويلىنىپ كۆرۈڭ. گەرچە سىز يەھۋانى كۆرەلمىسىڭىز ياكى ئۇ سىزنىڭ تەڭتۇشىڭىز بولمىسىمۇ، ئۇ سىزنى دوست بولۇشقا تەكلىپ قىلىدۇ.
بىراق، يەھۋانىڭ دوستى بولۇشىڭىز ئۈچۈن كۈچ چىقىرىشىڭىز كېرەك. ئۆيىڭىزدە بىر گۈل ئۆستۈرۈۋاتقانلىقىڭىزنى تەسەۋۋۇر قىلىپ كۆرۈڭ. ئەگەر ئۇنىڭغا غەمخورلۇق قىلمىسىڭىز، مەسىلەن سۇ قۇيمىسىڭىز ۋە ئوغۇتلىمىسىڭىز، ئۇ ئۆسمەيدۇ، ھەتتا قۇرۇپ قالىدۇ. خۇددى شۇنىڭغا ئوخشاش، خۇدا بىلەن دوستلۇق ئورنىتىپ، ئۇنى كۈچەيتىش مۇھىم. ئۇنى قانداق كۈچەيتەلەيسىز؟
مۇقەددەس كىتابنى ئۆگىنىشنىڭ ئەھمىيىتى
دوستلۇق — ھەمىشە ئىككى تەرەپنى ئۆز ئىچىگە ئالىدۇ. ئادەتتە دوستلار بىر-بىرى بىلەن مۇڭدىشىپ سۆھبەتلىشىدۇ ھەم تىڭشايدۇ. شۇنىڭغا ئوخشاش، مۇقەددەس كىتابنى ئوقۇغاندا، بىز خۇدانىڭ ئېيتماقچى بولغان سۆزلىرىگە قۇلاق سالىمىز (زەبۇر 1:2، 3).
ئەگەر ئوقۇشنى ياخشى كۆرمىسىڭىزچۇ؟ مەسىلەن، ياشلارنىڭ كۆپىنچىسى تېلېۋىزور كۆرۈشنى، ئويۇنلارنى ئويناشنى ياكى دوستلىرى بىلەن ۋاقىت ئۆتكۈزۈشنى ئەۋزەل كۆرىدۇ. بىراق، خۇدا بىلەن ئورناتقان دوستلۇقنى كۈچەيتىشنى خالىسىڭىز، مۇقەددەس كىتابنى تەتقىق قىلىپ، ئۇنىڭغا قۇلاق سېلىشىڭىز مۇھىم.
مۇقەددەس كىتابنى تەتقىق قىلىش ئېغىر بىر يۈكنى توشۇشقا ئوخشىمايدۇ. ھەتتا سىز كىتابلارنى ئوقۇشنى ياخشى كۆرمىسىڭىزمۇ، تەتقىق قىلىشتىن خۇشاللىق تېپىشنى ئۆگىنەلەيسىز. ئەڭ ئاۋۋال مۇقەددەس كىتابنى تەتقىق قىلىش ئۈچۈن ۋاقىت چىقىرىڭ. لايېش ئىسىملىك بىر قىز مۇنداق دەيدۇ: «مېنىڭدە بىر جەدۋەل بار. ھەر كۈنى ئەتىگەندە مۇقەددەس كىتابنىڭ بىر بابىنى ئوقۇيمەن». 15 ياشلىق مارىيە بولسا، باشقا جەدۋەلنى ئىشلىتىدۇ. «ئادەتتە مەن ھەر كۈنى ئۇخلاشتىن بۇرۇن يازمىلارنى ئازىراق ئوقۇيمەن»،— دەيدۇ ئۇ.
جەدۋەل بويىچە ئوقۇشتىن بۇرۇن 292-بەتتىكى رامكىغا قاراڭ. كېيىن مۇقەددەس كىتابنى تەتقىق قىلىشقا تەخمىنەن 30 مىنۇت سەرپ قىلالىشىڭىز ئۈچۈن ۋاقىتنى تۆۋەنگە يېزىپ قويۇڭ.
....
ھەممىسى جەدۋەل بىلەن چەكلەنمەيدۇ. ئەمەلىيەتتە تەتقىق قىلىشنى باشلىغاندىلا، مۇقەددەس كىتابنى ئوقۇش ئاسان ئەمەسلىكىنى بايقىشىڭىز مۇمكىن. بەلكىم سىز 11 ياشلىق جېزرېئېل ئىسىملىك يىگىتنىڭ ئوي-پىكىرىگە قوشۇلىدىغانسىز. ئۇ: «مۇقەددەس كىتابتىكى بەزى ئۈزۈندىلەرنى ئوقۇش قىيىن ۋە ئانچە قىزىقارلىق ئەمەس»،— دەيدۇ. بىراق، بەل قويۇۋەتمەڭ. مۇقەددەس كىتاب ئوقۇشنى دوستىڭىز يەھۋانىڭ سۆزلىرىنى تىڭشاشنىڭ پۇرسىتى دەپ قاراڭ. ئېنىقكى، قانچە كۈچ چىقارسىڭىز، مۇقەددەس كىتابنى تەتقىق قىلىش شۇنچە قىزىقارلىق ۋە پايدىلىق بولىدۇ.
دۇئا قىلىشنىڭ مۇھىملىقى
دۇئا — خۇدا بىلەن سۆزلىشىش يولى. خۇدا سىزگە ئاجايىپ بىر سوۋغاتنى بەرگەنلىكى ھەققىدە بىراز ئويلىنىپ بېقىڭ. سىز ئۇنىڭغا ھەرقاچان سۆزلىيەلەيسىز. ياراتقۇچى يەھۋا سىزنى تىڭشاشقا ھەرقاچان تەييار. ئۇ ھەتتا بۇنى خالايدۇ. شۇڭا، مۇقەددەس كىتابتا: «ھەر قانداق تەلىپىڭلار بولسا، دۇئا-تىلاۋەت ئارقىلىق خۇدادىن تىلەڭلار ۋە شۈكۈر ئېيتىڭلار»،— دەپ يېزىلغان (فىلىپپىلىقلارغا 4:6).
بۇ ئايەتتىن كۆرگىنىمىزدەك، يەھۋا بىلەن كۆپ نەرسىلەر ھەققىدە پاراڭلىشىشقا بولىدۇ. سىز ئۆز قىيىنچىلىقلىرىڭىز ۋە غەم-تەشۋىشلىرىڭىز ھەققىدە ئېيتىپ بېرەلەيسىز. ئەگەر دوستىڭىز سىزگە ياخشىلىق قىلغان بولسا، ئۇنىڭغا رەھمەت، دەپ چوقۇم مىننەتدارلىقىڭىزنى ئىپادىلەيسىز. بىراق، ھېچبىر دوستىڭىز يەھۋا قىلغان ياخشىلىقنى سىزگە ھېچقاچان قىلالمايدۇ. شۇڭا، ئۇنىڭغا مىننەتدارلىقىڭىزنى بىلدۈرۈڭ (زەبۇر 106:1).
تۆۋەنگە سىز نېمە ئۈچۈن يەھۋاغا مىننەتدار ئىكەنلىكىڭىزنى يېزىپ قويۇڭ.
.....
شۈبھىسىزكى، بەزىدە قورقۇنچ ۋە غەم-تەشۋىشلەر پەيدا بولۇشى مۇمكىن. مۇقەددەس كىتابتا: «پەرۋەردىگارغا تاپشۇر غەم-قايغۇڭنى، ئۇ قوللاپ-قۇۋۋەتلەر سېنى. پەرۋەردىگار يىقىتماس ھەرگىز، توغرا يولدا ماڭغان ئادەمنى»،— دەپ يېزىلغان (زەبۇر 55:22 23).
تۆۋەنگە دۇئادا يەھۋاغا ئېيتىپ بەرمەكچى بولغان غەم-تەشۋىشلىرىڭىزنى يېزىپ قويۇڭ.
.....
باشتىن ئۆتكۈزگەن شەخسىي ۋەقەلەر
خۇدا بىلەن بولغان دوستلۇق يەنە بىر مۇمكىنچىلىك بېرىدۇ. زەبۇر يازغۇچىسى داۋۇت پەيغەمبەر مۇنداق دەپ يازغان: «ھېس قىلغىن ۋە بىلگىن خۇدانىڭ مېھرىبانلىقىنى» (زەبۇر 34:8). داۋۇت 34-زەبۇرنى يازغاندا، ئۇ بىر قانچە قېتىم ئۆلۈم خەتىرى ئاستىدا بولغان. سائۇل پادىشاھ ئۇنى ئۆلتۈرۈشكە بۇيرۇق بەرگەن. داۋۇتقا ئۆز دۈشمىنى بولغان فىلىستىيەلىكلەر ئارىسىدا يوشۇرۇنۇپ يۈرۈشكە توغرا كەلگەن. ئۇ ئۆلۈم خەۋپىگە دۇچ كەلگەندە، ئەتەي ئۆزىنى ساراڭ ئادەمدەك كۆرسىتىپ ئامان قالغان.
داۋۇت مەن ئۆز ئەقىل-پاراسىتىمگە تايىنىپ ئامان قالدىم دەپ ئويلىمىغان، ئەكسىنچە بار شان-شەرەپنى يەھۋاغا كەلتۈرگەن. مەزكۇر زەبۇردا، ئۇ: «ئىجابەت قىلىپ پەرۋەردىگار دۇئايىمنى، ھەممە ۋەھىمىلەردىن خالاس قىلدى مېنى»،— دېگەن (زەبۇر 34:4). بۇنى داۋۇت ئۆزى بېشىدىن كەچۈرگەچ، باشقىلارغىمۇ «پەرۋەردىگارنىڭ مېھرىبانلىقىنى تېتىپ، بىلگىن» * دەپ دەۋەت قىلالىغان.
يەھۋانىڭ سىزگە غەمخورلۇق قىلغانلىقىنى ھېس قىلغان ۋاقىت ئېسىڭىزدىمۇ؟ بۇ ۋەقەنى تۆۋەنگە يېزىپ قويۇڭ. ئۇ ئاجايىپ بىر ھەيران قالارلىق ئىش بولۇشى زۆرۈر ئەمەس. بەلكىم ئۇ كۈندىلىك تۇرمۇشىڭىزدا يۈز بېرىۋاتقان ئاددىي ئىش-ۋەقە بولۇشى مۇمكىن.
.....
بەلكىم، ئاتا-ئانىڭىز مۇقەددەس كىتابتىكى ھەقىقەتلەرنى سىزگە ئۆگەتكەندۇ. ئەگەر شۇنداق بولسا، بۇ بەرىكەت! بىراق، سىز ئۆزىڭىز خۇدا بىلەن شەخسىي دوستلۇق ئورنىتىپ، ئۇنى راۋاجلاندۇرۇشىڭىز كېرەك. ئەگەر بۇنى تېخى قىلمىغان بولسىڭىز، ئۇنداقتا بۇ كىتابتىكى مۇشۇ بابنىڭ مەزمۇنى سىزگە ياردەم بېرىدۇ. يەھۋا تىرىشچانلىقىڭىزنى بەرىكەتلەيدۇ. مۇقەددەس كىتابتا: «تىلەڭلار، خۇدا تىلىگىنىڭلارنى بېرىدۇ. ئىزدەڭلار تاپىسىلەر»، دەيدۇ (مەتتا 7:7).
بۇ ھەققىدە، كىتابنىڭ 1-قىسىم، 38 ۋە 39-بابلاردىن كۆپرەك مەلۇماتلارنى بىلىۋېلىڭ
كېيىنكى بابتا
خۇدا توغرۇلۇق باشقىلار بىلەن سۆزلىشىش سىز ئۈچۈن قىيىنمۇ؟ ئۆز ئېتىقادىڭىزنى قانداق ھىمايە قىلالايدىغانلىقىڭىز ھەققىدە بىلىۋېلىڭ.
[بهت ئاستی ئىزاهاتی]
^ مۇقەددەس كىتابنىڭ بەزى تەرجىمىلىرىدە «تېتىپ، بىلگىن» دېگەن سۆز-ئىبارە، «ھېس قىلغىن ۋە بىلگىن» دەپ تەرجىمە قىلىنغان (ئۇيغۇرچە «مۇقەددەس كىتاب» جەمئىيىتىنىڭ «ھازىرقى زامان ئۇيغۇرچە تەرجىمىسى»).
مۇھىم ئايەت
«ئۆزىنىڭ خۇداغا بولغان مۇھتاجلىقىنى تونۇپ يەتكەنلەر نەقەدەر بەختلىك!» (مەتتا 5:3).
مەسلىھەت
ھەر كۈنى مۇقەددەس كىتابتىن پەقەت 4 بابنى ئوقۇسىڭىز، بىر يىلدا پۈتۈن كىتابنى تولۇق بىر قېتىم ئوقۇپ تۈگىتەلەيسىز.
بىلەمسىز؟
شەك-شۈبھىسىزكى، مۇقەددەس كىتابنى ئوقۇپ، ئۇنىڭدىكى مەسلىھەتلەرگە ئەمەل قىلغىنىڭىز، يەھۋانىڭ سىزگە شەخسەن كۆڭۈل بۆلۈۋاتقانلىقىنى كۆرسىتىدۇ (يۇھاننا 6:44).
ھەرىكەت پىلانى!
مۇقەددەس كىتابنى شەخسىي تەتقىق قىلىشنىڭ كۆپرەك پايدىسىنى كۆرۈش ئۈچۈن، مەن . . .
ھەمىشە دۇئا قىلىش ئۈچۈن، مەن . . .
ئاتا-ئانامدىن سورىماقچى بولغان سوئاللىرىم — . . .
سىزنىڭچە؟
● مۇقەددەس كىتاب شەخسىي تەتقىق ئۆگىنىشىڭىزنى تېخىمۇ قىزىقارلىق قىلىش ئۈچۈن نېمىلەرنى قىلسىڭىز بولىدۇ؟
● نېمە ئۈچۈن يەھۋا نامۇكەممەل ئىنسانلارنىڭ دۇئالىرىغا قۇلاق سالىدۇ؟
● دۇئالىرىڭىزنىڭ مەزمۇنىنى تېخىمۇ ياخشىلاش ئۈچۈن نېمە قىلالايسىز؟
[قىستۇرما تېكىسىت]
«بۇرۇن مەن دۇئايىمدا سۆزلەرنى تەكرارلايتىم. ئەمدى مەن كۈن بويى قانداق ئىشلار يۈز بەرگەنلىكى ھەققىدە، يەھۋاغا ئېيتىپ بېرىشكە تىرىشىۋاتىمەن. كۈن كۈندىن پەرقلىنىدۇ. شۇڭا، مەن دۇئايىمدا گەپنى قايتا-قايتا تەكرارلىمايمەن».— يېۋا
[رامكا\سۈرەت]
مۇقەددەس كىتابنى تەتقىق قىلىڭ
1. مۇقەددەس كىتابتىن ئوقۇماقچى بولغان ئۈزۈندىنى تاللاڭ. بۇ ئۈزۈندىنى چۈشىنىش ئۈچۈن دۇئادا يەھۋادىن دانالىقنى سوراڭ.
2. بۇ ئۈزۈندىنى كۆڭۈل قويۇپ ئوقۇڭ. ئالدىرماي ئوقۇڭ. تەسەۋۋۇر قىلىش قابىلىيىتىنى ئىشلىتىڭ. ئوقۇغانلىرىڭىزنى كۆز ئالدىڭىزغا كەلتۈرۈڭ. تىلغا ئېلىنغان ئادەملەرنىڭ ئاۋازىنى ئاڭلاشقا، پۇراقلارنى پۇراشقا ۋە تاماقنى تېتىپ بېقىشقا تىرىشىپ كۆرۈڭ. يەنى شۇ ۋەقەنى جانلاندۇرۇڭ!
3. ئوقۇغانلىرىڭىز ئۈستىدىن چوڭقۇر ئويلىنىڭ. ئۆز-ئۆزىڭىزدىن سوراڭ:
● نېمە ئۈچۈن يەھۋا خۇدا دەل شۇ ۋەقەنى ئۆز سۆزىگە يازدۇرغان؟
● تىلغا ئېلىنغان ئادەملەرنىڭ قايسى مىساللىرىدىن ئۈلگە ئالسام ياكى ئاگاھلاندۇرۇش سۈپىتىدە ئۆگەنسەم بولىدۇ؟
● ئوقۇغانلىرىمدىن نېمىلەرنى ئەمەلىيەتتە قوللانسام بولىدۇ؟
● ياراتقۇچى يەھۋا ۋە ئۇنىڭ ئىش-ھەرىكەتلىرى ھەققىدە نېمىلەرنى بىلىۋالدىم؟
4. قىسقىچە يەھۋاغا دۇئا قىلىڭ: ئۇنىڭغا نېمىنى ئۆگەنگەنلىكىڭىزنى ۋە ئەمەلىيەتتە قوللانماقچى بولغان نەرسىلەرنى ئېيتىپ بېرىڭ. يەھۋانىڭ سىزگە ئاجايىپ سوۋغات سۈپىتىدە بەرگەن ئۆز سۆزى مۇقەددەس كىتاب ئۈچۈن، ئۇنىڭغا مىننەتدارلىق بىلدۈرۈڭ!
[سۈرەت]
«چىراق بولۇپ سۆزۈڭ پۇتلىرىمغا، نۇر بېرەر ئۇ يوللىرىمغا» (زەبۇر 119:105).
[رامكا\سۈرەت]
ئاۋۋال تاشلارنى، كېيىن قۇمنى سېلىڭ
دۇئا قىلىشقا ۋاقىت يوقمۇ؟ مۇقەددەس كىتابنى تەتقىق قىلىشقا ۋاقىت يوقمۇ؟ ئادەتتە بۇ سوئاللارغا قانداق جاۋاب بېرىش نېمىنى بىرىنچى ئورۇنغا قويۇشىڭىزغا باغلىق.
سىناپ كۆرۈڭ: چېلەككە ئاۋۋال بىر نەچچە تاشلارنى سېلىپ، كېيىن قۇمنى قۇيۇڭ. قاراڭ، چېلەككە تاشلار ۋە قۇم لىق تولىدۇ.
ئەمدى بولسا، قايتىدىن بوش چېلەككە ئاۋۋال قۇمنى قۇيۇپ، كېيىن تاشلارنى سېلىڭ. خوش، نېمە بولدى؟ ئاۋۋال قۇمنى سېلىشنى باشلىغاچ، تاشلارنىڭ ھەممىسى چېلەككە سىغماي قالدى.
قانداق خۇلاسە چىقارساق بولىدۇ؟ مۇقەددەس كىتاب بىزنى «مۇھىمراق نەرسىگە كۆز [يەتكۈزۈڭلار]» دەپ دەۋەت قىلىدۇ (فىلىپپىلىقلارغا 1:10). ئەگەر «قۇمنى»، يەنى ئويۇن-تاماشىلارنى بىرىنچى ئورۇنغا قويسىڭىز، روھىي ئىشلارنى قىلىش ئۈچۈن ۋاقىت تاپالمايسىز. ئەگەر ھاياتىڭىزدا نېمىنىڭ مۇھىمراق ئىكەنلىكىگە كۆز يەتكۈزسىڭىز، ھەم خۇداغا خىزمەت قىلىش ھەم ھاردۇق چىقىرىش ئۈچۈنمۇ ۋاقىت تاپالايسىز. بۇلارنىڭ ھەممىسى ئاۋۋال چېلەككە نېمىنى سېلىشىڭىزغا باغلىق!
[سۈرەت]
خۇددى ئۆيدىكى گۈلگە ئوخشاش، يەھۋا بىلەن بولغان دوستلۇقنى كۈچەيتىش ئۈچۈن ئۇنىڭغا غەمخورلۇق قىلىش كېرەك.
