Onjava onjila yimue yinene yo vokalunga okuti poku iñila onutui vo kalunga, yi pondola oku lupuka cisoka 190 kolokilometulu vowohola. Eci onjila yaco yi limbotuila vovava yi pondola oku linga ongusu yalua 20 kolonjanja okuti ongosu yi kokela ovina viosi posi ci sule. Ndamupi onjava yi tẽla oku puluka kuenda oku pitulula onutui yaco yi komohĩsa?

 Kũlĩhĩsa ndoco: Osimbu onjava ka ye pitĩlile vovava yi tiukilisa konyima avava ayo oco a kale ndosongo. Handi vali yi tuvika ovaso lolupela lumue lueteyuilo kuenda u kokavo okuti ovimatamata vimue viosingo levi viovonete vi yukisiwa lofela kuenje ci tepulula ongusu yalua nda ya linga poku limbotuila vovava.

 Eci onjava yi limbotuila vokalunga, upinyo waye, utue kuenda osingu vi kala ndokone yimue. Lonjila eyi, ongusu yaco yi li sanduila volonumba viosi viosingo. Kuenje vocipikipiki yi setisa ovaso oco yi vanje kosi yokalunga.

 Ocinala cipi onjava yi pondola oku enda poku iñila onutui? Longusu yo nutui, yi pondola oku enda ocinala ci panda 11 kolometulu, pole, yi tẽla oku loka vali calua nda ya veta avava lonjila ya ketikiwa kuenda lovolu ocilele. Ocili okuti, kua limbukiwa ale vimue pokati kolonjila evi vi pondola oku enda kosi ocinala cisoka 25 kolometulu. Noke yoku limbotuila vovava onjava yi telela okuti ka yi ci lingi longusu toke kilu liovava, oco yi palãle onjanja yi kuavo.

 Tala olonjava oku iñila onutui

 Vamue vakuakukonomuisa va luvikiya olomakina vimue vi kasi ndolonjava oco vi kuatise kovapange oku sandilia kuenda oku yovola. Olomakina viaco via ponduile oku tẽla oku pãlala loku iñila onutui vovava kuenda oku pãlala vali onjanja yikuavo. Pole, vokuenda kuoloseteko, omakina yaco yateka olonjanja vialua, omo liongusu ya enda oku limbotuila layo vovava. Eci ca vetiya vakuakukonuisa oku pitila petosi liokuti ocimãleho cavo, ka ci kuete epondolo lioku limbotuila vovava, poku ci sokisa lonjava.

 Nye o sima? Uloño woku iñila onutui wonjava wa tukuluka ño? Ale wa lulikiwa?