Eci oco ca popia kafeko umue o kuete 13 kanyamo eci a tambula ombua yimue ndombanjaile. Ulume umue ukualomĩlo wa popia okuti, o kombutador isiaye owĩhile eci a kala oku tanga, ya kala ombanjaile yimue ya pongolola omuenyo waye. Ulume umue wa kuela ndopo, wa popia okuti ukanda ukãi waye a soneha eci va tẽlisa unyamo tunde eci va kuela, wa kala ombanjaile ya velapo a tambuile.

Anyamo osi omanu valua va siata oku pesela otembo kuenda va likolisilako oku sandiliya ombanjaile yimue “ya velapo” oco va yece kekamba ale komunu umue ukuepata vepuluvi limue lilikasi. Omanu valua va sole oku yeva olondaka ndevi via tukuiwa. Nye ci popiwa kokuove? O sole hẽ oku eca ale oku tambula olombanjaile vi soliwe calua?

Ocisimĩlo caco ci vetiya calua, momo ka ci vetiya lika omo liesilivilo yi ka kuata komunu wa yi tambula pole omo liesanju omunu o yeca a pondola oku kuata. Embimbiliya li popia hati: “Esanju li tunda koku eca olio lia velapo, li tunda koku tambula li sule.” (Ovilinga 20:35) Kuenje esanju li tunda koku eca li livokiya nda omunu wa yi tambula o yi tenda ndocina cimue ca velapo.

Anga hẽ, o pondola oku koka okuti ombanjaile eca yinena esanju kokuove kuenda komunu o yi tambula? Nda wa eca ombanjaile yimue ya “velapo” okuti ka ca lelukile oku yi sanga, nye o pondola oku linga oco ombanjaile wa eca yi soliwe?