Ove pamue o lipula ndoco: ‘Nda Suku wa kũlĩha ale ovisimĩlo vietu lovina tu sukila, momo lie tu likutililila vali kokuaye?’ Epulilo eli li kuete esilivilo. Yesu ka popele hẽ okuti Suku “wa kũlĩha ovina vio sesameli osimbu ka wa vi pingili.” (Mateo 6:8) Soma Daviti wo ko Isareli yosimbu wa ci kũlĩhĩle kuenda wa soneha hati: “Ka ku li ondaka kelimi liange te ove, a Yehova, wa yi kũlĩha yosi.” (Osamo 139:4) Oco hẽ, momo lie tu likutililila ku Suku? Oco tu tambulule epulilo eli, tu kũlĩhisi eci Embimbiliya li popia catiamẽla kolohutililo viafendeli va Suku. *

Ndaño Embimbiliya li popia okuti Yehova * Suku wa kũliha ovina viosi, olio li lekisavo okuti eye ka yongola ño oku kũlĩha ovitangi viafendeli vaye. (Osamo 139:6; Va Roma 11:33) Olondunge viaye vina via longa, ka vi kasi ndokomputador yi soleka ulandu watiamẽla komunu lomunu. Pole, Suku wa kapako ovisimĩlo vietu momo, o yongola okuti tu kuata ukamba laye. (Osamo 139:23, 24; Tiago 4:8) Eli olio esunga lieci Yesu a vetiyila olondonge viaye oku likutilila ndaño Isiavo wa kũlĩhile ale ovina tu sukila. (Mateo 6:6-8) Omo liaco, nda tua likolisilako oku situluila ovisimĩlo vietu Kululiki wetu, ukamba wetu laye u livokiya.

Olonjanja vimue tu kuata ocitangi coku tukula ovina tu sukila oku pinga vohutililo. Kapuluvi aco, Suku o pondola oku limbuka eci ci kasi vovisimĩlo vietu kuenje omo wa kũlĩhisa ciwa ekalo lietu o tu ĩha ovina tu sukila. (Va Roma 8:26, 27; Va Efeso 3:20) Eci tu limbuka okuti komuenyo wetu Suku wa siata oku tu kuatisa volonjila via litepa, ci tu vetiya oku amẽla kokuaye.

Embimbiliya li lekisa okuti, Suku Ukuonenewosi o tambulula olohutililo via fendeli vaye vakuekolelo pole, li lombololavo esunga lieci ka yevelila olohutililo vimue. Eci evĩho lia kala oku livokiya ko Isareli yosimbu, Suku wa tuma uprofeto Isaya oco a sapuile omanu hati: “Leci vu likutilila olohutililo via lua siu yevi, momo ovaka ene a kusuka ngẽ osonde.” (Isaya 1:15) Omo liaco, vana ka va pokola kovihandeleko via Suku ale va likutilila lovisimĩlo ka via sungulukile, ka va yeviwa Laye.—Olosapo 28:9; Tiago 4:3.

Embimbiliya li popia hati: “Nda tu pinga cimue ca sungulukila ocipango caye eye o tu yeva.” (1 Yoano 5:14) Anga hẽ, eci ci lomboloka okuti Suku olonjanja viosi o tambulula apingilo afendeli vaye? Sio, haicoko. Kũlĩhisa ulandu wupostolo Paulu una wa pinga ku Suku olonjanja vitatu oco o upe “osongo vetimba.” (2 Va Korindo 12:7, 8) Citava okuti Paulu wa kuata ocitangi cimue viso. Ocitangi caco ca enda oku u nenela esumuo! Ocili okuti, Paulu wa tambuile unene woku sakula ava va vela, loku pindula vana va fa, pole wa sukilile oku pandikisa luvei waye. (Ovilinga 19:11, 12; 20:9, 10) Ndaño olohutililo viaye ka via tambuluiwile ndomo a yonguile, Paulu wa lekisa olopandu ketambululo lia Suku.—2 Va Korindo 12:9, 10.

Ocili okuti omanu vamue va tukuiwa Vembimbiliya olohutililo viavo via tambuluiwa lonjila yimue yi komohĩsa. (2 Olosoma 20:1-7) Pole a tambululo aco kosimbu ka a siatele. Vamue pokati komanu vaye va enda oku sumua eci va limbuka okuti Suku ka tambuluile olohutililo viavo. Soma Daviti wa pula hati: “A Yehova, toke eteke lipi? O njivala hẽ otembo ka yi pui?” (Osamo 13:1) Pole, eci ulume ukuekolelo a ivaluka okuti olonjanja vialua Yehova wa enda oku u popela, Daviti wa pamisa ekolelo liaye ku Suku. Vohutililo yimuamue Daviti wa popia hati: “Ame puãi nda kolela ocisola cove ka ci pui.” (Osamo 13:5) Ndeci ca pita la Daviti, afendeli va Suku koloneke vilo va sukilavo oku pandikisa loku likutilila toke eci Suku atambulula apingilo avo.—Va Roma 12:12.

Suku wa kapako ovina tu sukila.

Olonjali vakuacisola halonjanja viosiko va eca komãla vavo ovina va va pinga vepuluvi liaco. Cimuamue haico catiamẽla ku Suku okuti, halonjanja viosiko a tambulula apingilo etu ndomo tu yongola ale vepuluvi tu lavoka. Pole tu sukila oku kolela okuti Ululike wetu, o tu ĩha ovina tu sukila votembo a sokiya kuenda lonjila ya sunguluka ndeci ci linga onjali yimue ukuacisola.—Luka 11:11-13.

Suku o pondola oku tambulula olohutililo vietu lonjila yimue okuti ka tu ci limbuka.

Nye ci popiwa, nda tu kasi oku likutilila omo liocitangi cimue ka ci kasi oku pita? Anga hẽ, tu kuata ovisimĩlo viokuti omo Yehova ka kasi oku tu tambulula locikomo, ci lomboloka okuti ka yevele ohutililo yetu? Sio. Tu sukila oku ivaluka okuti, Suku o tu kuatisa volonjila via litepa. Pamue ekamba limue li vetiyiwa oku tu lingila ocina cimue tu sukila vepuluvi liaco. (Olosapo 17:17) Anga hẽ, Yehova eye wa vetiya ekamba liaco oku iya kokuetu? Handi vali, olonjanja vimue etambululo lia Suku kapingilo etu, li yilila kovipama Viembimbiliya. Vembimbiliya tu sangamo olondunge vi tu kuatisa oku liyaka locitangi cimue tu kasi laco.—2 Timoteo 3:16, 17.

Suku ka maliko ovitangi viomanu vaye, pole, olonjanja vimue eca kokuavo unene u va kuatisa oku pandikisa lovitangi viaco. (2 Va Korindo 4:7) Yesu eci a pinga ku Isiaye oco a maleko ocitangi a kala oku liyaka laco, omo liohele yokuti ocitangi caco ci pondola oku tondala onduko ya Suku, Yehova wa tuma ungelo umue oco a pamise Omõlaye. (Luka 22:42, 43) Cimuamue haico okuti, Suku o pondola oku tuma ekamba limue oco li tu sapuile ondaka yimue yelembeleko tu sukila. (Olosapo 12:25) Omo okuti etambululo liaco liyilila vonjila yimue okuti ka tu ci limbuka, tu sukila oku kũlĩhĩsa lutate ndomo Suku a tambulula olohutililo vietu.

Atambululo amue a sukila oku talamela epuluvi Suku a sokiya.

Embimbiliya li lekisa okuti Suku Ukuonenewosi o kuetele ohenda vana valiketisa “votembo yaye.” (1 Petulu 5:6) Nda tua limbuka okuti Yehova ka kasi oku tambulula lonjanga olohutililo vietu, ka tu sukila oku sima okuti eye ka tu kapeleko. Omo okuti Ululiki wetu wa piãla kolondunge, wa kapako apingilo etu kuenda wa kũlĩha ovina viwa tu sukila.

Kũlĩhisa ocindekaise eci: Sokolola okuti omõlove utito, oku pinga osikaleta. Anga hẽ, vepuluvi liaco o wĩha lonjanga osikaleta a pinga? Nda wa kũlĩha okuti eye ka kuete utunga ale olondunge vioku enda losikaleta, o nõlapo oku yi landela kotembo yikuavo ya sunguluka. Olonjanja vimue, o likuminya oku tambulula epingilo liaye vepuluvi lina wa kũlĩha nda wa cilinga ci u kuatisa. Cimuamue haico okuti, Suku o pondola oku tẽlisa “onjongole yi kasi vutima [wetu] votembo a sokiya nda tu amamako oku likutilila.—Osamo 37:4.

Embimbiliya li vetiya Akristão vocili oco ka va ka siepo oku limbuka esilivilo liohutililo. Vamue citava okuti va popia ndoco: ‘Ca leluka oku ci popia, pole ka ca lelukile oku ci linga.’ Ocili okuti, nda tu liyaka locitangi cimue ka ci kasi oku pita ale tua lingiwa ocina cimue cĩvi, ka ci leluka oku talamela etambululo lia Suku. Tu sukila oku ivaluka okuti, Yesu wa longisa eci catiamẽla koku pandikisa kolohutililo.

Yesu wata olusapo lukãi umue ocimbumba haeye o suke wa endaile konganji yimue ka ya sungulukile oco o tetuluile lesunga. (Luka 18:1-3) Ndaño kefetikilo onganji yaco ka ya yonguile oku u kuatisa, noke wa popia lutima waye hati: “Ndi ci popela sanga ci ñavisa lokuiyaiya kuaco.” (Luka 18:4, 5) Ndomo ca lekisiwa kelimi liatete, onganji ya tambulula epingilo liocimbumba caco oco ka “ko vete viso” ale vupopi ukuavo oco “ka ka sepule onduko yaye.” * Nda onganji yina ka ya sungulukile ya kuata ohele londuko yaye loku kuatisa ocimbumba ohukũi, Suku yetu ukuesunga o kuatisa “ava vo vilikaiya utanya luteke”! Ndomo Yesu a ci popia, Suku “o ka va tetuluila lombili.”—Luka 18:6-8.

Ndaño okuti olonjanja vimue tu kava omo lioku pinga ekuatiso, ka tu ka tokoki. Poku pandikisa lolohutililo, tu lekisa okuti, tu yongola oku kuatisiwa la Suku. Tu sukilavo oku ivaluka okuti atambulula a Suku kapingilo a pamisa ukamba wetu laye. Omo liaco tu koleli okuti, nda tu amamako oku pinga lekolelo, Yehova o ka tambulula olohutililo vietu.—Luka 11:9.