Ca leluka oku tava okuti Satana una tua siata oku tanga Vembimbiliya, ocindekaise covina viosi vĩvi. Anga hẽ eci oco Embimbiliya li longisa? Nda oco, momo lie Embimbiliya li popela hati Satana wa vangula la Yesu Kristu kuenda la Suku Ukuonene Wosi? Kũlĩhĩsa ovolandu avali.

Eci Yesu a fetika upange waye woku kunda, Eliapu lio seteka layonjo atatu. Tete, Satana wa seteka Yesu poku u vetiya oku talavaya lunene Suku o wiha oco a tẽlise onjongole yaye yoku lia. Noke Eliapu lia vetiya Yesu oco a kape omuenyo waye kohele kuenda oku livelisapo. Oku sulako, Satana wa sapuila Yesu siti, nda wo fendela eca kokuaye ovosoma osi okilu lieve lulamba wao. Kayonjo osi atatu, Yesu ka ecelele oku yapuisiwa kuenda wa liteyuila poku tukula Ovisonehua.​—Mateo 4:1-11; Luka 4:1-13.

Yesu wa sapela lelie? Anga hẽ, wa kala oku sapela locituwa cimue cĩvi ca kala vokuaye muẽle? Ndomo ca lekisiwa Vovisonehua, Yesu wa “yonjaiwa kovina viosi ndetu, haimo ka la linga ekandu.” (Va Heveru 4:15) Embimbiliya li popia ndoco: “Eye ka lingile ekandu, lelimbi ka lia sangiwile vomela waye.” (1 Petulu 2:22) Yesu wa amamako loku lipua kuenda oku kakatela kekolelo liaye. Eye ka ecelele okuti vutima waye mu kala ocituwa cimue ka ca sungulukile. Ocili okuti, Yesu ka kaile oku vangula locina cimue cĩvi ci kasi vokuaye, pole, wa vangula lomunu umue.

Ulandu owu u lekisa okuti Satana omunu umue wocili.

• Ivaluka okuti Eliapu lia likuminyile oku eca ku Yesu ovosoma osi okilu lieve nda wo fendelele. (Mateo 4:8, 9) Nda Satana ka kaile omunu, ombanjaile eyi nda ka ya kuatele esilivilo. Handi vali, Yesu ka kuatele atatãhãi vokuti, Satana o kuete omoko lovina viaco.

• Yesu noke yoku likala ayonjo, Eliapu “lio sia toke kevelo lia sunguluka.” (Luka 4:13) Anga hẽ ulandu owu u lekisa okuti Satana ocituwa cimue civĩ ale unyali o koka ohele?

• Ivaluka okuti noke, “ovangelo veya, [kuenje va] kuatisa” Yesu. (Mateo 4:11) Anga hẽ ovangelo va lembeleka Yesu loku u kuatisa, va kala oviluvo viespiritu? Ocili okuti va kala. Nda oco, Satana haciluvokovo cespiritu?

Vulandu wavali mua kongela Yovi, ulume umue wa sumbilile Suku. Ulandu waco u lekisa apuluvi avali Eliapu lia vangula la Suku. Vapuluvi aco avali, Suku wa pandiya Yovi omo liekolelo liaye. Satana wa lombolola okuti Yovi wa kala ño oku vumba Suku omo liocipululu covokuasi, loku lekisa okuti Suku wa landa ekolelo liaye. Satana wa popiavo hoti, wa kũlĩle ciwa Yovi okuti Suku ci sule. Omo liaco, Yehova wa ecelela okuti Satana upa ovina viosi Yovi a kuete ndeci, omãla vaye kuenda uhayele waye. * Vokuenda kuotembo, ca limbukiwa okuti ovina Yehova a popele viatiamẽla ku Yovi viocili kuenda Satana ohembi. Suku wa sumũlũisa Yovi omo liekolelo liaye.​—Yovi 1:6-12; 2:1-7.

Anga hẽ ombangulo Suku a kuata la Satana ya lekisa okuti Yehova wa kala oku vangula locituwa cimue cĩvi ca kala vokuaye muẽle? Embimbiliya li popia ndoco: “Suku, ... ovilinga viaye via sunguluka.” (2 Samuele 22:31) Ondaka ya Suku yi popiavo hati: “O kola, o kola, o kola, Yehova Suku, Tõlo.” (Esituluilo 4:8) Ondaka oku kola yi lomboloka oku yela, okuti ca litepa lekandu. Yehova wa lipua kuenda ka kuete etime. Eye ka kuete ovituwa vĩvi.

Omanu vamue va siata oku popia hati, Yovi ka kaile komuenyo kuenda ombangulo yaco ya luvikiyiwa. Ange hẽ, ocisimĩlo caco cocili? Ovinimbu vikuavo Viembimbiliya vi lekisa okuti Yovi wa kala muẽle omunu. Kelivulu lia Tiago 5:7-11, Yovi wa tukuiwa ndongangu yimue yiwa Akristão va sukila oku kuama yoku lekisa epandi kotembo yohali, kuenda wecavo elembeleko momo u lekisa okuti, Yehova o sumũluisa vana va pandikisa. Yovi nda ka kaile omunu kuenda ayonjo a Satana a luvikiyiwa ño, anga hẽ ulandu waco nda wa lembeleka? Handi vali, kelivulu lia Esekiele 14:14, 20, Yovi wa tukuiwa kumosi la Noha kuenda Daniele hati alume vatatu vakuesunga. Yovi wa kala muẽle omunu haeye ulume umue ukuekolelo ndeci Noha la Daniele. Nda Yovi wa kala omunu, ovitangi viaye ndeci elambalalo, ka ci lomboloka okuti kuli umue wa vi koka?

Embimbiliya li lekisa okuti Satana omunu umue ukuetimba liespiritu. Ove pamue o lipula ndoco: Anga hẽ koloneke vilo o pondolavo oku ndi nenela ovitangi kumue lepata liange?

Sokolola ndeci okuti, ocisoko cimue covingumba ci li sanduila volupale luene. Omuenyo womanu kuenda ovituwa viavo vi kala kohele. Kaliye sokolola ndoco: Satana kuenda olondele viaye​—okuti oviluvo viespiritu vina via sinĩla Suku—​va imbiwa kilu lieve. Nye ce yililako? Sokolola ovina wa siata oku mola vasapulo vofeka yove kuenda o kolofeka vikuavo:

• Anga hẽ wa siata oku mola evokiyo liovituwa vĩvi, ungangala, ndaño lalikolisilo a siata oku lingiwa oku mãlako ovina viaco?

• Wa siata hẽ oku mola evokiyo liovitalukilo mua kongela olondele ndaño okuti olonjali vialua via sakalala lovina viaco?

• O lete hẽ ndomo ongongo yi kasi oku nyoliwa ndaño lalikolisilo a siata oku lingiwa oku yi teyuila?

• Wa limbuka hẽ okuti kuli ovina vimue omanu va kasi oku linga via siata oku nena ovilemawe?

Kũlĩhĩsa u Embimbiliya li tukula okuti eye wa siata oku koka ovitangi: Embimbiliya li popia hoti: Ocinyoha caco cinene ca takumuiwa, haico onyoha yosiahũlu, yina ya tukuiwa eliapu, haeye Satana, una endaenda oku kemba oluali luosi, haeye wa imbiwa kilu lieve, lovangelo vaye va imbiwa kumosi laye. . . . Oco yoleli, ailu lene wa tungimo. Puãi ove a ngongo, love a kalunga, ngongo yene! Momo eliapu lia lokila kokuene lonyeño ya lua, omo lia limbuka okuti oloneke vialio vitito.” (Esituluilo 12:9, 12) Omanu valua noke yoku kũlĩhĩsa ovolandu, va siata oku limbuka okuti Satana ociluvo cimue cespiritu ci koka ohele, una o kasi oku yapuisa oluali.

Ove pamue o li pula oku o pondola oku sanga eteyuilo. O kuete esunga lioku lekisa esakalalo liaco. Ocipama ci kuãimo ci ka eca ekuatiso likuavo.