Ṱhanzi dza Yehova vha tenda uri maitele na ndaela zwine zwa wanala Bivhilini zwi nga ri thusa u ita phetho dzine dza takadza Mudzimu na dzine dza nga ri vhuyedza. (Yesaya 48:17, 18) A ro ngo sika enea maitele na ndaela, fhedzi ri tshila u tendelana nazwo. Ṱhogomelani nḓila ine maitele na ndaela zwa tshimbidzana ngayo na thero ya u ḓivhana. a

•   Mbingano ndi mbofho ya tshoṱhe. (Mateo 19:6) Ṱhanzi dza Yehova vha dzhia u ḓivhana hu ha ndeme nga ṅwambo wa uri ndi vhukando vhune ha livhisa kha mbingano.

•   U ḓivhana ndi ha vhathu vhe vha lugela u dzhenela mbingano. Vhenevho vha vha vho no “pfuka miṅwaha ya vhuswa,” kana vhuimo vhune lutamo lwa zwa vhudzekani lwa vha lu vhuimoni ha nṱha.—1 Vhakorinta 7:36.

•   Vhane vha khou ita zwa u ḓivhana vha tea u vha vhe na mbofholowo ya u dzhenela mbingano. Vhaṅwe vhathu vhe vha ṱalana nga lwa mulayo Mudzimu ha vha dzhii vhe na mbofholowo ya u dovha vha dzhenela mbingano, samusi tshilinganyo tshawe tshi tsha uri vhathu vha ṱalana arali muṅwe wavho o ita vhuyaḓa ha zwa vhudzekani.—Mateo 19:9.

•   Vhakriste vhane vha ṱoḓa u dzhenela mbingano vha laedzwa uri vha vhinge kana u vhingwa nga mutendi ngavho. (1 Vhakorinta 7:39) Ṱhanzi dza Yehova a vha dzhii heyi ndaela sa ine ya khou sokou ambela kha muthu ane a ṱhonifha zwine ra zwi tenda, fhedzi i ambela kha Ṱhanzi yo lovhedzwaho ine ya ita zwine ra zwi tenda. (2 Vhakorinta 6:14) Mudzimu u dzula o livhisa vhagwadameli vhawe uri vha vhingane na muthu ane a tenda zwine vha zwi tenda. (Genesi 24:3; Maleaxi 2:11) Heyi ndaela ndi ya ndeme, samusi vhaṱoḓisisi vha musalauno vho zwi ṱhogomela. b

•   Vhana vha fanela u thetshelesa vhabebi vhavho. (Mirero 1:8; Vhakolosa 3:20) Kha vhana vhane vha kha ḓi dzula hayani, heyi ndaela i katela u thetshelesa vhabebi vhavho kha phetho dzine vha dzi dzhia nga ha u ḓivhana. Hezwi zwi nga kha ḓi katela miṅwaha ine muṱhannga kana musidzana a nga thoma ngayo u ita zwa u ḓivhana na zwine vha nga tendelwa u zwi ita.

•   U ya nga vhulivhisi ha Maṅwalo, Ṱhanzi dzi tou ḓikhethela musi zwi tshi ḓa kha mafhungo a u ḓivhana nahone dza khetha ane dza nga ḓivhana nae: “Muṅwe na muṅwe u ḓo hwala muhwalo wawe.” (Vhagalata 6:5) Naho zwo ralo, musi zwi tshi ḓa kha u ḓivhana, vhanzhi vha ṱoḓa nyeletshedzo kha Ṱhanzi dzo vhibvaho dzine dza vha tamela zwivhuya.—Mirero 1:5.

•   Zwithu zwinzhi zwo ḓoweleaho zwine vhathu vha zwi ita musi vha tshi khou ḓivhana zwi vha zwi zwivhi zwihulwane. Sa tsumbo, Bivhili i ri ṋea ndaela ya uri ri iledze vhuaḓa ha zwa vhudzekani. Honovhu vhuaḓa a vhu kateli u ita zwa vhudzekani fhedzi, fhedzi vhu katela na nyito dzi songo kunaho dzine dza itwa nga vhathu vha songo vhinganaho, dzi ngaho u fara-fara zwiraḓo zwa mbeu zwa muṅwe muthu kana u dzhenisa tshiraḓo tsha mbeu mulomoni kana nga murahu. (1 Vhakorinta 6:9-11) Naho hu maitele a dzikusaho maḓipfele a zwa vhudzekani ane a itwa nga vhathu vha songo vhinganaho ane a nga ita uri vha ḓifare luvhi nga zwa vhudzekani ndi “vhuyaḓa” vhune ha sinyusa Mudzimu. (Vhagalata 5:19-21) Nyambedzano dzi songo kunaho dzine dza katela zwiambo zwa “vhuḓabaḓaba” na dzone dzo iledzwa Bivhilini.—Vhakolosa 3:8.

•   Mbilu kana muthu wa nga ngomu, ndi mudzia-tshimbevha. (Yeremia 17:9) Mbilu i nga ita uri muthu a ite zwithu zwine a ḓivha uri zwo khakhea. U itela u iledza uri mbilu dzavho dzi si vha fhure, vhathu vhane vha khou ḓivhana vha fanela u iledza u vha vhe vhavhili fhethu hune vha nga lingea. Vha nga ḓitsireledza nga u khetha u dzula fhethu hune ha vha na vhathu vhanzhi kana nga u vha na muthu wa vhuraru. (Mirero 28:26) Vhakriste vha siho mbinganoni vhane vha ṱoḓa u dzhenela mbingano vha fanela u ṱhogomela khombo dzine dza nga vha hone nga u shumisa website dza zwa u ḓivhana, zwihuluhulu khombo ya u funana na muthu ane vha si mu ḓivhe zwavhuḓi.—Psalme ya 26:4.