Kha Vharoma 6:1-23
6 Zwino ri nga ri mini? Naa ri fanela u bvela phanḓa ri tshi ita tshivhi uri vhuthu vhuhulu vhu engedzee?
2 Na khathihi! Ri nga bvela hani phanḓa ri tshi khou tshila zwivhini+ samusi ro vhofhololwa kha tshivhi?+
3 Kani a ni zwi ḓivhi uri roṱhe ro lovhedzwaho ri vhathihi na Kristo Yesu,+ ro lovhedzelwa lufuni lwawe?+
4 Ro vhulungwa nae nge ra lovhedzelwa lufuni lwawe,+ uri samusi Kristo o vuswa vhafuni nga vhugala ha Khotsi, na riṋe ri fanela u tshila vhutshilo vhuswa.+
5 Arali ro fa u fana nae,+ ri ḓo vuswa u fana nae, nga yeneyo nḓila ri vha vhathihi nae.+
6 Ngauri ri a zwi ḓivha uri vhumuthu hashu ha kale ho ombelwa kha danda nae,+ uri mivhili yashu i re na tshivhi i si tsha vha na maanḓa,+ uri ri si tsha vha phuli dza tshivhi.+
7 Ngauri o faho o vhofhololwa kha* zwivhi zwawe.
8 Zwiṅwe hafhu, arali ro fa na Kristo, ri tenda uri ri ḓo dovha ra tshila nae.
9 Ngauri ri a ḓivha uri samusi Kristo o vuswa vhafuni,+ ha tsha ḓo dovha a fa;+ lufu a lu tshee na maanḓa khae.
10 Ngauri o fa luthihi uri tshivhi tshi fheliswe lwa tshoṱhe,+ fhedzi zwino u tshilela u ita zwine Mudzimu a zwi funa.
11 Na inwi ivhani vho faho siani ḽa tshivhi, fhedzi ni vhe vha tshilelaho u ita zwine Mudzimu a zwi funa nga Kristo Yesu.+
12 Ni songo tendela tshivhi tshi tshi bvela phanḓa tshi tshi vhusa mivhili yaṋu,+ na vho tevhela nyemulo dza muvhili.
13 Ni songo kumedzela muvhili* waṋu kha tshivhi uri ni ite zwi songo lugaho. Nṱhani hazwo ḓikumedzeleni kha Mudzimu sa vho vuswaho vhafuni. Kumedzelani muvhili* waṋu kha Mudzimu uri ni ite zwo lugaho.+
14 Samusi ni siho fhasi ha mulayo,+ a no ngo fanela u langiwa nga tshivhi, ngauri no wana vhuthu vhuhulu ha Mudzimu.+
15 Zwino ri nga ri mini? Naa ri ḓo ita tshivhi ngauri ro wana vhuthu vhuhulu ha Mudzimu na uri a ri ho fhasi ha mulayo?+ Na khathihi!
16 Naa a ni zwi ḓivhi uri ni mulanda wa ane na dzula ni tshi mu thetshelesa?+ Arali ni phuli dza tshivhi,+ ni ḓo fa.+ Fhedzi arali ni vhalanda vha Mudzimu, ni tshi mu thetshelesa, ni ḓo pfi vho lugaho.
17 Fhedzi ri livhuwa Mudzimu uri naho kale no vha ni phuli dza tshivhi, zwino ni vho thetshelesa zwi tshi bva mbiluni pfunzo ye na funzwa yone.
18 Samusi no vhofhololwa kha tshivhi,+ zwino ni vhalanda vha itaho zwo lugaho.+
19 Ndi khou amba mafhungo ane vhathu vha a pfesesa nga nṱhani ha vhushayanungo haṋu; zwino kumedzelani miraḓo yaṋu uri ni vhe vhalanda vha itaho zwo lugaho uri ni ite mishumo mikhethwa,+ samusi no vha no kumedzela miraḓo yaṋu, ni vhalanda vha itaho zwithu zwi songo kunaho na vhutshinyi ni tshi ita mishumo mivhi.
20 Musi ni tshi kha ḓi vha phuli dza tshivhi, no vha ni sa vhuswi nga u luga.
21 No vha ni tshi aṋwa mitshelo ifhio nga tshenetsho tshifhinga? Ndi ine zwino ya ni shonisa. Ngauri yeneyo mitshelo i isa lufuni.+
22 Samusi no vhofhololwa kha tshivhi na vha vhalanda vha Mudzimu, ni khou aṋwa mitshelo yaṋu nga nḓila i re khethwa,+ i isa vhutshiloni vhu sa fheli.+
23 Ngauri malamba a tshivhi ndi lufu,+ fhedzi tshifhiwa tshine Mudzimu a tshi ṋea ndi u tshila tshoṱhe+ nga Kristo Yesu Murena washu.+
Ṱhaluso dzi re magumoni a siaṱari
^ Kana “o hangwelwa.”
^ Thevhedz., “miraḓo.”
^ Thevhedz., “miraḓo.”
