NGUDO 2
Naa Mudzimu Ni A Mu Ḓivha?
1. Ndi ngani ri tshi fanela u gwadamela Mudzimu?
Mudzimu Ramaanḓaoṱhe ndi ene Musiki wa zwithu zwoṱhe. Ha na mathomo nahone a nga si vhuye a vha na magumo. (Phisalema 90:2) Mafhungo maḓifha a re Bivhilini a bva khae. (1 Timotheo 1:11) Samusi Mudzimu o ri ṋea vhutshilo, ri tea u gwadamela ene fhedzi.—Vhalani Nzumbululo 4:11.
2. Mudzimu u hani?
A hu na muthu we a vhuya a vhona Mudzimu ngauri ndi Muya, zwine zwa amba uri tshivhumbeo tshawe a tshi fani na tsha zwivhumbiwa zwine zwa tshila kha ḽifhasi. (Yohane 1:18; 4:24) Fhedzi ri nga vhona zwine Mudzimu a vha zwone kha zwithu zwe a zwi sika. Sa tsumbo, mitshelo na maluvha zwo fhambananaho zwi ri sumbedza uri Mudzimu u na lufuno na vhuṱali. Nḓila ye ḽifhasi na ḽiṱaḓulu zwa hula ngayo zwi sumbedza uri u na maanḓa.—Vhalani Vharoma 1:20.
Ri nga guda zwinzhi nga ha zwine Mudzimu a vha zwone nga u vhala Bivhili. Sa tsumbo, i ri vhudza zwine Mudzimu a zwi funa na zwine a zwi vhenga, nḓila ine a fara ngayo vhathu na nḓila ine a sumbedza ngayo uri u ḓipfa hani kha vhuimo vhu sa fani.—Vhalani Phisalema 103:7-10.
3. Dzina ḽa Mudzimu ndi nnyi?
Yesu o ri: “Khotsi ashu wa ṱaḓulu, dzina ḽau nga ḽi vhe ḽikhethwa.” (Mateo 6:9) Naho Mudzimu e na madzina-zwao manzhi, u na dzina ḽithihi fhedzi. Ḽi vhidzwa nga nḓila dzo fhambananaho kha luambo luṅwe na luṅwe. Nga Tshivenḓa ḽi pfi “Yehova.”—Vhalani Phisalema 83:18.
Dzina ḽa Mudzimu ḽo bviswa kha Bivhili nnzhi, ha dzheniswa madzina-zwao a ngaho Murena kana Mudzimu. Fhedzi musi hu tshi ṅwalwa Bivhili, dzina ḽa Mudzimu ḽo vha ḽi tshi bvelela lu ṱoḓaho u vha 7 000. Yesu o ita uri dzina ḽa Mudzimu ḽi ḓivhiwe nga u ḽi shumisa musi a tshi funza vhathu nga ha Mudzimu.—Vhalani Yohane 17:26.
Ṱalelani vidio ine ya ri, Naa Mudzimu U Na Dzina?
4. Naa Yehova u na ndavha na riṋe?
Naa u shengela ha vhathu zwi sumbedza uri Yehova ha na ndavha na riṋe? Vhaṅwe vhathu vha amba uri u ita uri ri shengele u itela u ri linga, fhedzi zwenezwo ndi mazwifhi madala-dala.—Vhalani Yakobo 1:13.
Mudzimu o sumbedza uri u a ri dzhiela nṱha nga u ri ṋea mbofholowo ya u ḓikhethela. Ri fanela u dzhiela nṱha mbofholowo ye Mudzimu a ri ṋea yone ya u ḓikhethela arali ri tshi ṱoḓa u mu shumela. (Yoshua 24:15) Fhedzi vhaṅwe vha shengela ngauri vhunzhi ha vhathu vha itela vhaṅwe zwithu zwivhi. Yehova u a pfa vhuṱungu musi a tshi vhona vhathu vha tshi farana nga nḓila i si yavhuḓi.—Vhalani Genesi 6:5, 6.
Yehova u na ndavha na riṋe. U ṱoḓa uri ri ḓiphiṋe nga vhutshilo. Hu si kale u ḓo fhelisa tshengelo na vhane vha i bveledza. Zwazwino u na tshiitisi tshi pfalaho tsha u tendela tshengelo i tshi bvela phanḓa lwa tshifhinganyana. Ri ḓo guda nga ha tshenetsho tshiitisi kha Ngudo 8.—Vhalani 2 Petro 2:9; 3:7, 13.
5. Ri nga sendela hani tsini na Mudzimu?
Yehova u a ri ramba uri ri sendele tsini nae nga u amba nae nga thabelo. U na ndavha na riṋe. (Phisalema 65:2; 145:18) O ḓiimisela u ri hangwela. U a zwi vhona musi ri tshi lingedza u mu takadza naho ri tshi kundelwa nga zwiṅwe zwifhinga. Naho ri vhaitazwivhi, ri nga vha na vhushaka havhuḓi na Mudzimu.—Vhalani Phisalema 103:12-14; Yakobo 4:8.
Samusi Yehova o ri ṋea vhutshilo, ri tea u mu funa u fhira muthu naho e ufhio. (Marko 12:30) Ni ḓo sendela tsini na Mudzimu musi ni tshi sumbedza nḓila ine na mu funa ngayo nga u guda zwo engedzeaho nga hae na nga u ita zwine a zwi funa.—Vhalani 1 Timotheo 2:4; 1 Yohane 5:3.