Nga dzi 24 January 2023, vhorasaintsi vho amba uri Tshifhinga Tsha Vhufhelo, (‘Doomsday Clock’) a tshi tsini vhukuma na vhukati ha vhusiku, zwine zwa amba uri vhufhelo ha shango vhu tsinisa.

•   “Tshifhinga Tsha Vhufhelo ha shango tshi imela nḓila ine vhathu vha khou vhea ngayo ḽifhasi na vhutshilo havho khomboni. Zwiitea zwi ngaho, nndwa i re Ukraine, u ofha nndwa ya nuclear na u shanduka ha mutsho, zwo ita uri vhorasaintsi vha sendedze ‘Tshifhinga Tsha Vhufhelo’ tsini na vhukati ha vhusiku nga Ḽavhuvhili.”—AFP International Text Wire.

•   “Nga Ḽavhuvhili, vhorasaintsi vho bvisela khagala uri ‘Tshifhinga Tsha Vhufhelo’ tsho sendedzwa tsini na vhukati ha vhusiku nga mithethe ya 90. Ndi vhuimo vhu sumbedzaho uri vhathu vha tsini vhukuma na u fhelisa ḽifhasi na vhone vhaṋe.”—ABC News.

•   “U mona na shango, vhorasaintsi vho sevha uri vhathu vha khomboni ya u fhelisa ḽifhasi na vhone vhaṋe u fhira naho hu lini.”—The Guardian.

 Naa vhathu na ḽifhasi ḽashu zwi tsini na u fheliswa? Naa ri fanela u ofha zwine zwa ḓo itea tshifhingani tshi ḓaho? Bivhili i ri mini?

 Bivhili i ri “ḽifhasi ḽi ḓi dzula ḽi hone lini na lini” nahone hu na vhathu vhane “vha ḓo dzula khaḽo lini na lini.” (Muhuweleli 1:4; Phisalema 37:29) Nga zwenezwo, vhathu vha nga si fhelise ḽifhasi kana u ita uri hu si tsha vha na tshithu tsho no tshila khaḽo.

 Naho zwo ralo, Bivhili i a amba uri hu ḓo vha na vhufhelo. Sa tsumbo, i amba uri “shango ḽi ḓo lovha.”—1 Yohane 2:17.

•   U itela u ḓivha uri Bivhili i vha i tshi khou amba mini musi i tshi amba nga ha vhufhelo ha shango, vhalani thero ine ya ri: “Is the World Coming to an End? What Is the Apocalypse?”

•   U itela u guda zwine Bivhili ya amba nga ha zwiitea zwi ḓaho, vhalani thero ine ya ri: “When Will the World End?”

 Bivhili i nga ri thusa uri ri dzule ri na mavhonele avhuḓi hu sa londwi khaedu dzine ra khou dzi vhona shangoni. Nga nḓila-ḓe?

•   Bivhili i ri ṋea vhulivhisi havhuḓi. (2 Timotheo 3:16, 17) Sa tsumbo, vhalani thero “How to Control Worry” u itela u vhona uri Bivhili i nga ni thusa hani uri ni dzule ni na mavhonele avhuḓi hu sa londwi khaedu nnzhi vhutshiloni.

•   Bivhili i a ri khwaṱhisedza uri ri nga vha na fhulufhelo ḽa vhumatshelo havhuḓi. (Vharoma 15:4) I ri ṱalutshedza uri ri nga lavhelela uri hu itee mini zwino na tshifhingani tshi ḓaho nahone zwenezwi zwi ri thusa uri ri si ofhe hu sa londwi zwine zwa khou itea zwino.

 U itela u vhuyelwa nga zwi re Bivhilini, ri khou ni ramba uri ni gude Bivhili ni tshi khou thuswa nga muṅwe muthu mahala ṋamusi.