Mulwa-na-Kristo a si muthu muthihi kana tshigwada tshithihi fhedzi, ngauri Bivhili i amba uri hu na “vhalwa-na-Kristo vhanzhi.” (1 Yohane 2:18) Nṱhani hazwo, ipfi ḽa Lugerika ḽo ṱalutshedzelwaho nga uri “mulwa-na-Kristo” ḽine ḽa amba “u lwa na Kristo,” ḽi ambela kha ane a ita zwi tevhelaho:

•   U hanedza uri Yesu ndi ene Kristo (Messia) kana uri ndi Murwa wa Mudzimu.​—1 Yohane 2:22.

•   U lwisana na Kristo, Muḓodzwa wa Mudzimu.​—Psalme ya 2:1, 2; Luka 11:23.

•   U ḓiita Kristo.​—Mateo 24:24.

•   U tovhola vhatevheli vha Kristo, samusi Yesu o amba uri zwo itwaho khavho na ene vho mu ita zwi fanaho.​—Mishumo 9:5.

•   U ḓiita u nga u Mukriste, ngeno a tshi ita zwithu zwi songo lugaho kana a tshi zwifha.​—Mateo 7:22, 23; 2 Vhakorinta 11:13.

 Bivhili i tshi ri mulwa-na-Kristo a i khou amba nga ha muthu muthihi fhedzi, i dovha ya vha bula sa tshigwada tsha “vhalwa-na-Kristo.” (2 Yohane 7) Tshigwada tsha vhalwa-na-Kristo tsho thoma u vha hone tshifhingani tsha vhaapostola nahone tshi tshee hone na ṋamusi. Bivhili yo dzula yo amba hu tshee nga phanḓa nga ha u vha hone ha tshenetsho tshigwada.​—1 Yohane 4:3.

•   Vha amba mazwifhi nga ha Yesu. (Mateo 24:9, 11) Sa tsumbo, vhane vha funza nga ha Vhuraruthihi kana uri Yesu ndi Mudzimu Ramaanḓaoṱhe vha hanedzana na pfunzo ya Yesu, we a ri: “Khotsi ndi muhulwane kha nṋe.”​—Yohane 14:28.

•   Vhalwa-na-Kristo a vha tendelani na zwe Yesu a zwi amba nga ha nḓila ine Muvhuso wa Mudzimu wa shuma ngayo. Sa tsumbo, vhaṅwe vharangaphanḓa vha vhurereli vha amba uri Kristo u shumisana na mivhuso ya vhathu. Naho zwo ralo, yeneyo pfunzo i hanedzana na zwe Yesu a zwi amba musi a tshi ri: “Muvhuso wanga a si tshipiḓa tsha ḽino shango.”​—Yohane 18:36.

•   Vha amba uri Yesu ndi Murena wavho, fhedzi a vha tevhedzi milayo yawe, u katela na wa u huwelela mafhungo maḓifha a Muvhuso.​—Mateo 28:19, 20; Luka 6:46; Mishumo 10:42.